မြန်မာနိုင်ငံတွင် အွန်လိုင်းမှ ဂိမ်းကစားရုံ၊ ရင်းနှီးမြုပ်နှံရုံဖြင့် နေ့စဉ် အမြတ်ငွေများ ရရှိမည်ဆိုပြီး KLFB၊ I Wealth၊ Miami၊ CFATI နှင့် FCFB စသည့် Online Application များတွင် ရင်းနှီး မြုပ်နှံကြသူများမှာ အများအားဖြင့် အခြေခံ လူတန်းစားများ ဖြစ်ကြပြီး လူပေါင်းသိန်းချီ ငွေများ အလိမ်ခံလိုက်ရကြောင်း သိရှိရသည်။
“ကျနော်တို့ကတော့ ဒီလို အစစအရာရာ ခက်ခဲနေတဲ့အချိန်မှာ နေ့တိုင်း အပိုဝင်ငွေရအောင်ဆိုပြီး မရှိတဲ့ကြားက ချေးကြ ငှားကြ ရင်းနှီးထားကြတာပေါ့။ လိမ်ခံလိုက်ရတာကတော့ ကျနော် နဲ့ အလုပ်ကလူတွေ အကုန်လုံးနီးပါးပဲ၊ အတော်များများကတော့ ရုန်းကန်နေရတဲ့ အခြေခံလူတန်းစားတွေချည်းပဲ။ ဒီလိုဖြစ်တော့ အကုန်လုံး စိတ်ဆင်းရဲကြတာပေါ့၊ အရင်းအနှီးကြီးလေ အမြတ်များလေဆိုပြီး တချို့ဆို ရှိသမျှပေါင်ပြီး ရင်းနှီးထားရတာ” ဟု လိမ်လည်ခံရသူ တစ်ဦးမှ ပြောသည်။
၎င်း Online Game Application များ၏ လုပ်ဆောင်မှုတွင် ဘောလုံးပွဲ လောင်းခြင်း နှင့် ပစ္စည်းအော်ဒါတင်ခြင်းတို့ အဓိက ပါဝင်ပြီး အသုံးပြု ရင်းနှီးမြုပ်နှံသူများ ထပ်တိုးရှာခြင်းဖြင့် နေ့စဉ်အမြတ်အစွန်းအပြင် လူရှာခကို ထိုဂိမ်းကုမ္ပဏီများမှ လစာ ပေးကြောင်းလည်း သိရသည်။
“အဓိက ကတော့ အွန်လိုင်းကနေ ငွေရှာချင်တဲ့သူတွေ ခံရတာပေါ့။ အဲ့လို application တွေသုံးပြီး ငွေဘယ်လောက်တောင် ရနေပြီ ဆိုပြီး စည်းရုံးကြတော့ တခြားသူတွေပါ ဝင်လုပ်ကြကုန်ရော။ ပြီးရင် အဲ့စည်းရုံးတဲ့သူတွေက ကော်မရှင်ခတွေ ရကြတယ်” ဟု ထိုသူမှ ထပ်လောင်းပြောသည်။
အဆိုပါ အွန်လိုင်း ငွေကြေး ရင်းနှီးမှု လုပ်ငန်းများတွင် မြန်မာနိုင်ငံရှိ ပြည်သူများမှ ငွေကြေးပမာဏ အများအပြား လိမ်လည်ခံရမှုမှာ ပြီးခဲ့သည့် အောက်တိုဘာလ အတွင်း (၅) ကြိမ် တိုင်အောင် ရှိခဲ့ကြောင်း သိရသည်။
“ဒီဆိုဒ်တွေရဲ့ သဘောက စစလုပ်ချင်းဆို သူတို့ အမြတ်ပေးမယ်ဗျာ၊ အချိန်တစ်ခု ရောက်လာရင်တော့ သူတို့ လိမ်ပြေးသွားတာချည်းပဲ။ ပထမတစ်ခါ လိမ်ခံလိုက်ရပြီးကတည်းက ရပ်လိုက်သင့်တာ။ ဒါပေမယ့် ပါသွားတဲ့ အရင်းအနှီးတွေ ပြန်ရအောင်ဆိုပြီး နောက်ထပ်ထွက်လာတဲ့ဆိုဒ်တွေမှာ ဆက်လိုက်လုပ်ရင်းနဲ့ အကုန်ပါကုန်တာ။ သူတို့က ဒီကုမ္ပဏီနာမည် နဲ့ လိမ်သွားပြီးရင် နောက်ထပ်နာမည်တစ်ခုနဲ့ ထပ်ပေါ်လာကြတာ” ဟု ၎င်းက ဆက်ပြောသည်။
အဆိုပါ အွန်လိုင်းဂိမ်းများကို ဦးဆောင်သူများတွင် နိုင်ငံခြားသားများရော မြန်မာနိုင်ငံသားများပါ ပါဝင်ပြီး အများစုမှာ လောက်ကိုင်မြို့တွင် အခြေစိုက်ကြောင်းလည်း သိရှိရသည်။
ထိုကဲ့သို့ မြန်မာနိုင်ငံမှာ အွန်လိုင်းမှ တစ်ဆင့် နည်းမျိုးစုံနှင့် ငွေကြေး လိမ်လည်မှုများ မကြာခဏ ကြုံတွေ့လာရသဖြင့် ပြည်သူများအနေနဲ့ အထူး သတိထားရန် လိုအပ်ကြောင်း ယခု လိမ်လည်ခံလိုက်ရသူများက ပြောကြားသည်။
နော်လာဝါ မှ သတင်းပေးပို့သည်။
