လားရှိုးမြို့နယ်တွင် ယနေ့ ( နိုဝင်ဘာလ ၄) ရက် နံနက်ပိုင်း ၇ နာရီခန့်တွင် စစ်ကောင်စီ ၄၁ တပ်မှ ပစ်ခတ်လိုက်သည့် လက်နက်ကြီးကြောင့် ပန်ဟုန်းအုပ်စု ဟွေလော့ကျေးရွာက အမျိုးသမီးတစ်ဦး သေဆုံးခဲ့ကြောင်း စုံစမ်းသိရှိရသည်။
“၁၀၂၇ စစ်ဆင်ရေး” စတင်ပြီးနောက် လားရှိုးမြို့နယ် မြို့တွင်း နှင့် မြို့ ပတ်ပတ်လည် တွင် တည်ရှိသည့် စစ်ကောင်စီတပ်များသည် လက်နက်ကြီးများဖြင့် ပစ်ခတ်ခြင်းကို နေ့ည မရွေး ရမ်းသမ်းပစ်ခတ်နေမှုကြောင့် အရပ်သားများနေထိုင်ရာ ကျေးရွာများ နေအိမ်များကို ထိခိုက်ခဲ့သည်။
“မနက်က လက်နက်ကြီးထိလို့ အမျိုးသမီးတစ်ယောက် ဆုံးသွားတာ ဟုတ်တယ်။ ဆေးရုံပို့နေတုန်း မန်အိုင်ရွာမှာ ဆုံးသွားတာပါ” ဟု အထက်မန်အိုင်ကျေးရွာ ဒေသခံ တစ်ဦးက သျှမ်းသံတော်ဆင့်ကို ပြောသည်။
လားရှိုးမြို့တွင် အခြေချ လှုပ်ရှားနေသည့် စစ်ကောင်စီ၏ ၄၁တပ် က အထက်မန်အိုင်ကျေးရွာ ကနေ လှမ်းပစ်လိုက်ပြီး ပန်ဟုန်းကျေးရွာအုပ်စု ဟွေလော့ကျေးရွာရှိ နေအိမ်ပေါ်ကျကာ အသက် ၃၈ နှစ်အရွယ် ရှိ အမျိုးသမီးကို ထိမှန်ခဲ့ပြီး၊ လားရှိုးဆေးရုံသို့ ပို့ဆောင်နေစဉ် သေဆုံးသွားကြောင်း အထက်မန်အိုင်ကျေးရွာ ဒေသခံက ပြောသည်။
“မနက်က လက်နက်ကြီးကျခဲ့တဲ့ ရွာက အထက်မန်အိုင်ရွာကနေတောင် နာရီဝက် တနာရီခန့် ထပ်သွားရမှာ ဖြစ်ပြီး လမ်းခရီး မလုံခြုံတာ၊ လမ်းဆိုးတာကြောင့် ဆက်သွယ်လာရင်တောင် ဘယ်လိုမှ သွားခေါ်လို့မရနိုင်ပါဘူး” ဟု လူမှုကူညီရေးအသင်း တစ်ဦးက ပြောသည်။
လားရှိုးမြို့တွင် “၁၀၂၇ Operation” စတင်ခဲ့သည့် အောက်တိုဘာ ၂၇ ရက်တွင်လည်း အထက်မန်အိုင်ရွာ နေအိမ်တစ်အိမ်ပေါ် လက်နက်ကြီး ကျပေါက်ကွဲခဲ့ပြီး မိသားစုဝင် ၄ ဦး ထိခိုက်ဒဏ်ရာ ရရှိခဲ့သည်။
၁၀၂၇ စစ်ဆင်ရေး တိုက်ပွဲအတွင်း အရပ်သားသေဆုံးမှုသည် (၂၀) ဦး အထက်ရှိလာပြီး ထိခိုက်ဒဏ်ရာရရှိသူ ၄၀ ကျော် ထိရှိကြောင်း သိရသည်။
Leave a Comments