သျှမ်းပြည် ကွမ်းလုံမြို့ပေါ် ရပ်ကွက်များရှိ ပြည်သူများကို မြို့မှထွက်ခွာရန် ညီနောင်မဟာမိတ် ၃ ဖွဲ့မှ သတိပေးလာကြောင်း စုံစမ်းသိရသည်။
ညီနောင်မဟာမိတ် ၃ ဖွဲ့နှင့် စစ်ကောင်စီတပ်တို့သည် ယမန်နေ့ (နိုဝင်ဘာလ ၂ ရက်)က ကွမ်းလုံမြို့တွင် တစ်နေကုန် တိုက်ပွဲပြင်းထန်ခဲ့ပြီး ကွမ်းလုံမြို့ပေါ် ရပ်ကွက်များရှိ ပြည်သူများကို မြို့မှထွက်ခွာရန် ညီနောင်မဟာမိတ် ၃ ဖွဲ့မှ သတိပေးလာကြောင်း ကွမ်းလုံမြို့နယ် ဒေသခံများက ပြောသည်။
“ကွမ်းလုံမြို့ပေါ်မှာက စစ်ကောင်စီတပ်တွေအများကြီးရှိတော့ ညီနောင်မဟာမိတ် ၃ ဖွဲ့က ထိုးစစ်ဆင်ပြီး တိုက်နေတာ။ အဲ့ဒါကြောင့် သူတို့က မြို့ထဲကလူတွေကို အကုန်ရွှေ့ခိုင်းတာ။ ညီနောင်မဟာမိတ်တွေက ဒရုန်းနဲ့ မြို့ထဲကို ဗုံးကြဲတာ။ မြို့ထဲမှာကို ချနေကြပြီ။ မြို့ပေါ်ကလူတွေလဲ အကုန်လုံး ကြောက်လန့်နေကြပြီး ညီနောင်မဟာမိတ်တပ်ဖွဲ့တွေကလည်း ပြည်သူတွေ ရှောင်ကြဖို့ ပြောလာတယ်။ မနေ့တုန်းက နေ့လယ်လောက်က စပြီး မြို့ပေါ်ကလူတွေ ရွှေ့ကုန်ကြပြီ”ဟု ကွမ်းလုံမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (နိုဝင်ဘာ ၂ ရက်) ၁၁ နာရီခန့်တွင် ကွမ်းလုံအနောက်ဘက် တောင်ကုန်းရှိ စစ်ကောင်စီတပ်စခန်းကို ကိုးကန့်တပ်ဖွဲ့ (MNDAA) က တိုက်ခိုက်သိမ်းယူနိုင်ခဲ့သည်ဟု The Kokang က သတင်းထုတ်ပြန်ထားသည်။
“မနေ့က တစ်နေကုန် တိုက်ပွဲဖြစ်တယ်။ မြို့ထဲက တချို့လူတွေလည်း နမ့်ဟူးဘက်ကို ရှောင်လာကြပြီ။ နမ့်ဟူးနဲ့ကွမ်းလုံမြို့က ၉ မိုင်လောက်ပဲ ဝေးတယ်ဆိုပေမယ့် တပ်တွေလည်းမရှိတော့ အခုထိ ဘာမှမဖြစ်သေးဘူး။ တချို့ပြည်သူတွေလဲ “ဝ”နယ်ဘက်က နမ့်တစ်မြို့ဘက်ကို ပြေးကုန်ကြပြီ။ တိုက်ပွဲကြောင့် နေအိမ်တွေထိခိုက်တာ ရှိတယ်။ အကုန်လုံး မြို့ထဲကနေ ရှောင်ကုန်ကြပြီ။ ကွမ်းလုံမြို့ထဲမှာ မနေရဲကြတော့ဘူး”ဟု ကွမ်းလုံဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိအချိန်အထိ ကွမ်းလုံမြို့ ဟိုလီနှင့် တံတားဦးတို့တွင် တိုက်ပွဲဆက်လက်ဖြစ်ပွားနေပြီး ကွမ်းလုံမြို့ ဒေသခံများသည် ချင်းရွှေဟော်မြို့၏ အရှေ့တောင်ဘက်ခြမ်းရှိ “ဝ”နယ်မြေတစ်ခုဖြစ်သည့် နမ့်တစ်မြို့သို့ ထွက်ပြေးတိမ်းရှောင်နေကြသည်ဟု သိရသည်။
ပြီးခဲ့သည့် အောက်တိုဘာလ ၃၀ ရက်နေ့ကလည်း ကွမ်းလုံမြို့ ကာမိုင်းဒေသရှိ ခြေလျင်တပ်ရင်း ခလရ-၁၄၃ မှ စစ်ကောင်စီတပ်သား ၄၁ ဦး လက်နက်ချ အလင်းဝင်ပြီး လက်နက်ခဲယမ်းနှင့် ရိက္ခာများပါ သိမ်းဆည်းရမိသည်ဟု ကိုးကန့်တပ်ဖွဲ့ MNDAA ၏ ပြန်ကြားရေး The Kokang မီဒီယာက ထုတ်ပြန်ထားသည်။
