သျှမ်းပြည် မိုင်းရယ်မြို့နယ်အတွင်း ညီနောင်မဟာမိတ်တပ်များနှင့် စစ်ကောင်စီတပ်တို့၏ စစ်ရေးလှုပ်ရှားမှုများကြောင့် တိုက်ပွဲဖြစ်ပွားမည်ကို စိုးရိမ်ပြီး ဗုံးခိုကျင်းများ တူးထားရကြောင်း စုံစမ်းသိရသည်။
ယခု နိုဝင်ဘာ လဆန်းပိုင်းမှစပြီး မိုင်းရယ်မြို့နယ်အတွင်း TNLA တပ်ဖွဲ့နှင့် စစ်ကောင်စီတပ်တို့၏ စစ်ရေးလှုပ်ရှားမှုများကြောင့် မိုင်းရယ်မြို့ပေါ် ရပ်ကွက်များတွင် တိုက်ပွဲဖြစ်ပွားမည်ကို စိုးရိမ်ပြီး ဗုံးခိုကျင်းများ တူးထားရကြောင်း မိုင်းရယ်ဒေသခံများက ပြောသည်။
“လားရှိုးတို့ သိန္နီတို့ဘက်မှာ တိုက်ပွဲတွေက ပြင်းထန်နေတယ်လေ။ အဲ့ဒါကြောင့် မိုင်းရယ်က ပြည်သူတွေလည်း ကြောက်လန့်ပြီး မိုင်းရယ်ဘက်မှာလည်း တိုက်ပွဲဖြစ်မလားဆိုပြီး စိုးရိမ်နေကြတာ။ တချို့ မြို့ပေါ်က အိမ်တွေလည်း ဗုံးခိုကျင်းတူးနေကြပြီ”ဟု မိုင်းရယ်မြို့ခံတစ်ဦးက သျှမ်းသံတော်ဆင့်ကို ပြောသည်။
မိုင်းရယ်မြို့တွင် ခြေမြန်တပ်ရင်း ခမရ-၃၂၅ နှင့် အမြောက်တပ်တို့ အခြေစိုက်ပြီး သီပေါ၊ လားရှိုးမြို့သို့ သွားရာလမ်း၌ စစ်ကောင်စီတပ်သားများက မြို့ပတ်၍ ကင်းလှည့်နေပြီး မိုင်းရယ်မြို့ အရှေ့ဘက်ရှိ တောင်ကြောများတွင် TNLA တပ်ဖွဲ့များ ရောက်ရှိနေသည်ဟု မိုင်းရယ်ဒေသခံများက ပြောသည်။
“မိုင်းရယ်မြို့အရှေ့ဘက်က တောင်ကြောတွေပေါ်မှာ TNLA တပ်သားတွေ ရောက်လာနေကြတယ်လို့ ပြောကြတယ်။ နောက်ပြီးတော့ ရပ်ကွက် ၁ ဘက်မှာလဲ အဲ့ဘက်က လားရှိုး၊ သီပေါဘက်ကို သွားတဲ့လမ်းဆိုတော့လေ၊ အဲ့လမ်းဘက်မှာလဲ စစ်ကောင်စီတပ်သားတွေ မြို့ပတ်ပြီး ကင်းလှည့်နေတာကို ဒေသခံတွေ တွေ့တယ်”ဟု မိုင်းရယ်မြို့ခံတစ်ဦးက သျှမ်းသံတော်ဆင့်ကို ဆက်ပြောသည်။
မိုင်းရယ်မြို့နယ်ရှိ မိုင်းဟ ဌာနေပြည်သူ့စစ် ထိန်းချုပ်ရာ မိုင်းဟ/မိုင်းဟိုင်းနယ်မြေတွင် “ဝ”ဒေသ ပန်ဆန်းမြို့မှ ထွက်ပြေးလာသည့် တရုတ်အွန်လိုင်း ငွေလိမ်ဂိုဏ်းအဖွဲ့ဝင် စုစုပေါင်း ၈၀၀ ခန့် လာရောက်ခိုလှုံနေကြောင်း သိရသည်။
လက်ရှိအချိန်တွင် ညီနောင်မဟာမိတ် ၃ ဖွဲ့နှင့် စစ်ကောင်စီတပ်တို့ တိုက်ခိုက်နေသည့် “စစ်ဆင်ရေး-၁၀၂၇”သည် သျှမ်းပြည် မြောက်ပိုင်းရှိ နောင်ချို၊ ကျောက်မဲ၊ လားရှိုး၊ သိန္နီ၊ ကွတ်ခိုင်၊ မူဆယ် ပန်ဆိုင်း(ကြူကုတ်)နှင့် ချင်းရွှေဟော်မြို့များတွင် တိုက်ပွဲပြင်းထန်နေဆဲ ဖြစ်သည်။
Leave a Comments