ကိုးကန့်တပ်ဖွဲ့ MNDAA က စစ်ကောင်စီတပ်အ‌ပေါ် ရုတ်တရက်ဆင်နွှဲခဲ့သည့် စစ်ဆင်ရေးကြောင့် “ဝ”ဒေသအတွင်းရှိ နယ်မြေနှင့်လေပိုင်နက်တို့ကို စစ်ရေးအရ ကျူးကျော်မှုများ ရှိလာပါက ကိုင်တွယ်ဖြေရှင်းသွားမည်ဟု “ဝ”ပြည် သွေးစည်းညီညွတ်‌ရေးပါတီ (UWSP/UWSA)က ယနေ့ (နိုဝင်ဘာ ၁ ရက်)တွင် သတင်းထုတ်ပြန်လာသည်။

လက်ရှိဖြစ်ပွားနေသော ကိုးကန့်ဒေသရှိ လက်နက်ကိုင် ပဋိပက္ခများကို “ဝ”တပ်ဖွဲ့ UWSP အနေဖြင့် ဘက်မလိုက်ဘဲ အင်အားစုအသီးသီးက အပစ်အခတ်ရပ်စဲရေးကို အမြန်ဆုံးလုပ်ဆောင်ပြီး ပြဿနာကို ဖြေရှင်းရန် တောင်းဆိုထားသည်။

“ဝ”တပ်ဖွဲ့ UWSP အနေဖြင့် “ဝ”ဒေသရှိ နယ်မြေလုံခြုံရေးနှင့် အရပ်သားများ၏ အသက်နှင့် ဥစ္စာပစ္စည်း လုံခြုံမှုရှိစေရေးတို့ကို ခြွင်းချက်မရှိ အကာအကွယ်ပေးမည်ဖြစ်ပြီး နယ်မြေနှင့်လေပိုင်နက်တို့ကို စစ်ရေးအရ ကျူးကျော်မှုများ ရှိလာပါက ကိုင်တွယ်ဖြေရှင်းသွားမည်ဟု ထုတ်ပြန်ထားသည်။

မြန်မာနိုင်ငံ ငြိမ်းချမ်းရေးနှင့် တည်ငြိမ်ရေးအတွက် အခက်အခဲနှင့် စိန်ခေါ်မှုအသစ်များ ဖြစ်ပေါ်လာပြီး ပဋိပက္ခများကြောင့် ပြည်သူအများအပြား ထွက်ပြေးနေရသည်ဟု ထုတ်ပြန်ချက်တွင် ဆိုထားသည်။

ကိုးကန့်တပ်ဖွဲ့ MNDAA ပါဝင်သည့် ညီနောင်မဟာမိတ် ၃ ဖွဲ့၏ “စစ်ဆင်ရေး-၁၀၂၇” စတင်သည့် ပထမရက်ကတည်းက ချင်းရွှေဟော်မြို့၏ အရှေ့တောင်ဘက်ခြမ်းရှိ “ဝ”နယ်မြေတစ်ခုဖြစ်သည့် နမ့်တစ်မြို့တွင် ချင်း‌ရွှေဟော်၊ လောက်ကိုင်မြို့တို့မှ စစ်ဘေးရှောင် ဒေသခံ ၅၀၀၀ ကျော်ကို ကူညီပေးထားသည်ဟု “ဝ” ပြည်သွေးစည်းညီညွတ်ရေးပါတီ ပြင်ပဆက်ဆံရေးတာဝန်ခံ ဦးညီရန်း၏ ပြောကြားချက်အရ သိရသည်။

ပြီးခဲ့သည့် အောက်တိုဘာ ၃၀ ရက်နေ့တွင် စစ်ကောင်စီ၏ သတင်းထုတ်ပြန်ရေးအဖွဲ့ ခေါင်းဆောင် ဗိုလ်ချုပ်ဇော်မင်းထွန်းက တရုတ်မီဒီယာတစ်ခုနှင့် အင်တာဗျူးဖြေစဉ်အတွင်း “ဝ”နှင့် မိုင်းလားဒေသတို့ကို တရားဥပဒေနှင့်အညီ နေထိုင်ရန်၊ ၎င်းဒေသအတွင်း မြန်မာနိုင်ငံ၏ တရားဥပဒေ စိုးမိုးရေးအဖွဲ့များဖြစ်သည့် ရဲ၊ လဝက၊ အကောက်ခွန်တို့ကို ပေးဝင်ရန် တရုတ်နှင့်မြန်မာ နှစ်နိုင်ငံပူးပေါင်းပြီး ဖိအားပေးရန်တို့ကို ပြောကြားခဲ့သည်ဟု သိရသည်။