သျှမ်းပြည် ကွမ်းလုံမြို့ တောင်ပိုင်းရှိ ကံမိုင်းဒေသတွင် အခြေချတပ်ထိုင်သော (ရမလ) လက်အောက်ခံ တပ်ရင်း ဖြစ်သည့် (ခလရ ၁၄၃) သည် ညီနောင်မဟာမိတ်တပ်ဖွဲ့ ၃ ဖွဲ့ထံ လက်နက်ချ အလင်းဝင် ရောက်လာကြောင်း The Kokang မှထုတ်ပြန်ထားသည်။

ညီနောင်မဟာမိတ် ၃ဖွဲ့ ထံလက်နက်ချ အလင်းဝင်လာသည်မှာ ၄၁ ဦးရှိပြီး ဒု-တပ်ရင်းတပ်မှူးချုပ် ၁ ဦး နှင့် တပ်ခွဲမှူး ၂ ဦး ပါဝင်ကြောင်း ထိုအလင်းဝင်ရောက်လာသော ၄၁ ဦးကို တစ်ဦး လျှင် လမ်းစရိတ် ၁၅ သိန်း (စုစုပေါင်း သိန်း ၇၀၀ ကျော်) ပေးပြီး လွှတ်ငြိမ်းချမ်းသာခွင့် ပေးခဲ့ကြောင်း ထုတ်ပြန်ချက်တွင် ရေးသားထားသည်။

အောက်တိုဘာ ၂၈ ရက် ညပိုင်းတွင် ညီနောင်မဟာမိတ်အဖွဲ့ ၃ ဖွဲ့ မှ စစ်ကောင်စီတပ်ရင်းကို အလင်းဝင် ရောက်ဖို့ ဆွေးနွေးခဲ့ပြီးနောက်၊ အောက်တိုဘာလ ၃၀ ရက်တွင် ခလရ ၁၄၃ တပ်ဖွဲ့ ဝင်များက အလင်းဝင်ရောင်လာခဲ့သည်။စစ်ရေးပစ္စည်းများ၊ လက်နက်ခဲယမ်းများကိုလည်း တပ်စခန်းတွင် ထားရှိခဲ့ပြီး ဆုတ်ခွာခဲ့ကြောင်း The Kokang မှ သတင်းထူးအနေဖြင့် ထုတ်ပြန်ခဲ့သည်။

“ ကာမိုင်းဒေသမှာရှိတဲ့ စစ်ကောင်စီတပ်ဟာ ယခုကဲ့သို့ တပ်ရင်း(၁)ရင်းလုံး လက်နက်ချ အလင်းဝင်တဲ့ အခြေအနေမျိုး လုံးဝမရှိခဲ့ကြောင်း၊ ဒါကိုကြည့်ခြင်းအားဖြင့် စစ်ကောင်စီတပ်၏ အတွင်းပိုင်းဟာ လုံးဝပျက်စီးနေပြီး ပြိုကွဲမည့်အခြေအနေသို့ရောက်ရှိနေပြီ ”ဟု MNDAA ၏ ရှေ့တန်းအရာရှိတစ်ဦးက ပြောဆိုခဲ့သည်။

ထိုပြင် ညီနောင်မဟာမိတ် ၃ ဖွဲ့ထံ နီးစပ်ရာ ဆက်သွယ်ပြီး လက်နက်နှင့်အတူ လက်နက်ချ အညံ့ခံ ကြသော သူများကို မိသားစု၊ ဆွေမျိုး၊ မောင်နှမ၊ သူငယ်ချင်းများ ထံသို့ ဆက်သွယ်၍ လွတ်မြောက်ရန် ကူညီ ဆောင်ရွက်ပေးပြီး လွတ်မြောက်သွားလူများလည်း အမြောက်အမြားရှိကြောင်း သိရသည်။

စစ်ဆင်ရေးစသည့်ရက်မှ စ၍ စစ်ကောင်စီမှ အလင်းဝင်ရောက်လာခဲ့သူ ၁၀၀ ကျော် အထိရှိကြောင်း ညီနောင်မဟာမိတ် ၃ ဖွဲ့မှ ထုတ်ပြန်ထားသည်။

အောက်တိုဘာလ ၃၁ ရက်နေ့မှ မြန်မာအမျိူးသား ဒီမိုကရက်တစ် တပ်မတော် MNDAA ၊ တအာင်း အမျိုးသား တပ်မတော် TNLA နှင့် ရက္ခိုင့်တပ်တော် AA တို့က အလင်းဝင်ရောက်ရန်အတွက် အထူး တိုက်တွန်းချက်အနေဖြင့် ထုတ်ပြန်ခဲ့ကြောင်း သိရသည်။

ညီနောင်မဟာမိတ် ၃ဖွဲ့မှ ၁၀၂၇ စစ်ဆင်ရေး စတင်ဆင်နွှဲပြီး ၅ ရက်တာကာလ အတွင်း စစ်ကောင်စီ၏ စခန်းကြီး၊စခန်းငယ်၊ စစ်ဖက်ဆိုင်ရာ တပ်စခန်းပေါင်း ၈၀ ကျော် အပါအဝင် ချင်းရွှေဟော်၊ ဖောင်းဆိုင်၊ သိန္နီမြို့တို့ကို ထိန်းချုပ်နိုင်ခဲ့ကြောင်း ညီနောင်မဟာမိတ် ၃ ဖွဲ့မှ ထုတ်ပြန်ထားသည်။

လက်ရှိအချိန် စစ်ကောင်စီတပ်ဖွဲ့တွင် လူအင်အားအလွန်ချို့တဲ့နေပြီး တပ်ရင်း (၁) ရင်းလျှင် လူ အင်အား (၁၀၀) ခန့်သာ ရှိပါတော့သည်။ ထို့ပြင် ထွက်ပြေးသူ၊ ကျဆုံးသူများလည်း နေ့စဉ်နှင့်အမျှ ဆက်တိုက်တိုးများနေပါသည်။