သျှမ်းပြည် တာချီလိတ်မြို့တွင် အချိန်အခါမဟုတ်ဘဲ ရွာသွန်းသည့်မိုးကြောင့် မယ်ခေါင်ချောင်းရေလျှံပြီး မြို့တွင်း၌ ရေကြီးနေကြောင်း စုံစမ်းသိရသည်။
ယမန်နေ့ (အောက်တိုဘာ ၃၀ ရက်) ညတွင် အချိန်အခါမဟုတ်ဘဲ မိုးသည်းထန်စွာ ရွာသွန်းမှုကြောင့် ယနေ့နံနက်မှစ၍ တာချီလိတ်မြို့တွင် မယ်ခေါင်ချောင်းရေလျှံပြီး မြို့တွင်းရှိ လမ်းများပေါ်၌ ရေကြီးရေလျှံနေကြောင်း တာချီလိတ်ဒေသခံများက ပြောသည်။
“နမ့်မယ်ခေါင် ရေကြီးနေတာ။ မနေ့ညက တစ်ညလုံး မိုးကြီးတော့ ရေတက်လာတာ။ ကျိုင်းတုံဘက်ကနေလာတဲ့ မြို့အဝင်တံတားကနေ ရေစကြီးနေတာ။ မြို့ထဲက လမ်းတွေမှာတော့ ဒီမနက်ကစပြီး ရေတက်လာတာ။ အခု တစ်မြို့လုံးရေကြီးနေပြီ။ ဒီည မိုးထပ်ရွာရင်တော့ ပိုဆိုးပြီ”ဟု တာချီလိတ်ဒေသခံ စိုင်းဆေက သျှမ်းသံတော်ဆင့်ကို ပြောသည်။
လက်ရှိတွင် မြို့တွင်းလမ်းမကြီးတစ်လျှောက် ရေကြီးရေလျှံဖြစ်နေပြီး အနိမ့်ပိုင်းရပ်ကွက်ရှိ နေအိမ်များတွင် ရေဝင်ရောက်နေပြီဟု တာချီလိတ်ဒေသခံများက ပြောသည်။
သျှမ်းပြည်အရှေ့ပိုင်း တာချီလိတ်မြို့နယ်၊ ကျိုင်းတုံမြို့နယ် နှင့် မိုင်းဆတ်မြို့နယ်တို့တွင် ယခုနှစ်ရေကြီးမှုသည် ယခင်ကထက် ပိုမိုများလာကြောင်း သိရသည်။
သျှမ်းပြည်အရှေ့ ပိုင်း တာချီလိတ်မြို့နယ်အတွင်း သယံဇာတ ဓာတ်သတ္တုတူးဖော်မှုများကို တွင်တွင်ကျယ်ကျယ် ပြုလုပ်နေကြသဖြင့် သဘာဝ ပတ်ဝန်းကျင်များသည် ယခင်ကထက် ပျက်စီးကာ မိုးရာသီတွင် ရေကြီးရေလျှံမှုဖြစ်ပြီး၊ နွေရာသီတွင် ရေခန်းခြောက်မှုကို ပြည်သူများ မကြာခန ကြုံတွေ့လာရသည်။
