သျှမ်းပြည် မူဆယ်မြို့ အောက်တိုဘာလအတွင်း နေအိမ် ၂၀ ထက်မနည်း ဖောက်ထွင်းခိုးယူမှုများ နေ့စဉ်ဖြစ်ပွားနေကြောင်း ဒေသခံများထံမှ စုံစမ်းသိရသည်။
သျှမ်းပြည် မူဆယ်မြို့တွင် အမည်မသိ အမျိုးသားသုံးဦး သည် အဖြူရောင် (Crown) ကား ဖြင့် ရပ်ကွက်တိုင်းနီးပါးရှိ ပြည်သူ့နေအိမ်များကို အောက်တိုဘာလအတွင်း ဝင်ရောက်ဖောက်ထွင်းနေကြောင်း မူဆယ်ဒေသခံများက သျှမ်းသံတော်ဆင့်ကို ပြောပြသည်၊။
“ကျမရဲ့ အမနေအိမ်ဝင်တုန်းက အိမ်မှဘယ်သူမှမရှိဘူး။ ကျမတို့ အိမ်ပြန်ရောက်တော့ အဝတ်ဗီဒိုတွေ၊ အခန်းတွေ ရှုပ်ပွထားတာ။ CCTV ကနေ ကြည့်တော့ အဖြူရောင် Crown ကားနဲ့ အမျိုးသား၃ဦးဝင်ပြီး ဖောက်ထွင်းသွားတာ” ဟု မူဆယ်မြို့ တောင်ရပ်ကွက်နေ အမျိုးသမီးတစ်ဦးက သျှမ်းသံတော်ဆင့်ကို ပြောပြသည်။
ပြီးခဲ့သည့် အောက်တိုဘာလ ၂၅ ရက် ည ၆ နာရီခွဲ ဝန်းကျင်တွင် မူဆယ်မြို့ ဟိုမွန်ရပ်ကွက်တွင် နေအိမ် ကို ဖောက်ထွင်းသွားပြီး အမျိူးသမီးတစ်ဦးကို သေနတ်ဖြင့်ထောက်ပြီး ငွေကျပ် ၅ သိန်းကို ခိုးယူသွားကြောင်း လူအမျိုးသမီး တစ်ဦးက သျှမ်းသံတော်ဆင့်ကို ပြောသည်။
အလားတူ ယမန်နေ့ (အောက်တိုဘာ ၃၀)ရက် နံနက် ၂နာရီဝန်းကျင်တွင် မူဆယ်မြို့ တောင်ရပ်ကွက်ရှိ နေအိမ်တစ်အိမ် ကိုလည် နေအိမ်ဖောက်ထွင်းခံရပြီး ဆိုင်ကယ်တစ်စီး ခိုးယူသွားကြောင်း သိရသည်။
ထို အောက်တိုဘာ ၃၀ရက် တစ်ရက်တည်း နေအိမ် (၃)လုံး ဖောက်ထွင်းခံရပြီး၊ ယခု (အောက်တိုဘာလ)အတွင်း ပြည်သူနေအိမ် အလုံး (၂၀)နီးပါး ဖောက်ထွင်းခံရသည်။
“သူတို့ လာဖောက်ထွင်း၊လာခိုးတဲ့အချိန်မှာ အိမ်ထဲမှာ လူရှိနေရင် သေနတ်နဲ့ခြိမ်းခြောက်တယ်။ တရုတ်စကား တွေပဲပြောတယ်။ ဒီဘက်က တရုတ်လေသံတော့ မဟုတ်ဘူး” ဟု မူဆယ်မြို့ မြောက်ရပ်ကွက်နေ အမျိုးသမီးက ဆိုပြန်သည်။
မူဆယ်မြို့သည် မြန်မာ-တရုတ်နယ်စပ်မြို့ဖြစ်ပြီး၊ လူမျိုးစုံ၊ လက်နက်ကိုင်ပေါင်းစုံ လှုပ်ရှားသည့်နယ်မြေဖြစ်ကာ မကြာခဏ ဓားပြတိုက်ခြင်း၊ လုယက်ခြင်၊ ဒုစရိုက်သမားများပေါများသည့် ဒေသလည်းဖြစ်သည်။
ထို့ကြောင့် မူဆယ်မြို့နေထိုင်သည့် ပြည်သူများသည် အပြင်သွားအလုပ်လုပ်ခြင်း၊ ခရီးသွားခြင်း၊ အလုပ်သွားခြင်းတို့တွင် အိမ်ကို စိတ်မချဘဲစိုးရိမ်နေရကြောင်း သိရသည်။
Leave a Comments