သျှမ်းပြည် လားရှိုး-သန္နီကြားရှိ မိုင်းပါးစစ်တပ်စခန်းကို “ ၁၀၂၇ စစ်ဆင်ရေး “ တွင်ပါဝင်ဆင်နွဲထားသည့် ညီနောင်မဟာမိတ်အဖွဲ့ဝင် တအာင်း (ပလောင်) အမျိုးသားလွတ်မြောက်ရေး တပ်မတော် TNLA မှ ဝင်ရောက်တိုက်ခိုက်ခဲ့၍ စစ်ကောင်စီတပ်ဖွဲ့ဝင်များ စခန်းလုံးကျွတ် ထွက်ပြေးသွားခဲ့ကြောင်း TNLA မှ ယနေ့ အောက်တိုဘာလ ၃၁ ရက်တွင် ထုတ်ပြန်ထားသည်။
လက်ရှိမှာ မိုင်းပါးစစ်တပ်စခန်းကိုလည်း သိမ်းပိုင်နိုင်ခဲ့ပြီဖြစ်ကြောင်း ရေးသားဖော်ပြထားသည်။
အလားတူ ယနေ့ (အောက်တိုဘာလ ၃၁ ရက်) နံနက်ပိုင်းအချိန်တွင် ကျောက်မဲမြို့နယ် မြောက်ဘက်ရှိ စစ်ကောင်စီ တပ်စခန်းမှနေ၍ လက်နက်ကြီးဖြင့် ပန်စံကျေးရွာဘက်သို့ ရမ်းသမ်းပစ်ခတ် တိုက်ခိုက်နေလျက်ရှိကြောင်း သိရသည်။
ထို့အပြင် ပြည်သူများအနေဖြင့် စစ်ဆင်ရေးကာလအတွင်း ခရီးသွားလာခြင်း မပြုလုပ်ကြရန်၊ မဖြစ်မနေ ခရီးသွားလာရမည် ဆိုပါက သက်ဆိုင်ရာ PSLF/TNLA အုပ်ချုပ်ရေးအဖွဲ့/ တပ်ရင်း တပ်ဖွဲတို့ထံ သတင်းပို့ ခွင့်ပြုချက်တောင်းခံသွားရန် အသိပေးထားသည်။
