သျှမ်းပြည် မူဆယ်ခရိုင် ပန်ဆိုင်းမြို့ (ကြူကုတ်) ရပ်ကွက် ၄ အနီးရှိ စစ်တပ်စခန်းကို ညီနောင်မဟာမိတ်အဖွဲ့ဝင် ကိုးကန့် MNDAA မှ ဒရုန်းဖြင့်လာရောက်တိုက်ခိုက်ပြီး စစ်ကောင်စီဘက်မှ လက်နက်ကြီးဖြင့် ပြန်လည်ပစ်ခတ်ကာ တိုက်ပွဲပြင်းထန် နေကြောင်း စုံစမ်းသိရှိရသည်။
ယနေ့ (အောက်တိုဘာလ ၃၁ ရက်) နံနက်ပိုင်းအချိန်မှစပြီး ပန်ဆိုင်းမြို့ (ကြူကုတ်) ရပ်ကွက် ၄ အနီးရှိ စစ်တပ်စခန်းကုန်း နှင့် အသီတိစေတီဘုရားပေါ် (ဒေသအခေါ်) တွင် တပ်စွဲထားသော စစ်ကောင်စီ တပ်ဖွဲ့ဝင်များကို ကိုးကန့် MNDAA မှ ဒရုန်းဖြင့်လာရောက် ဗုံးကြဲတိုက်ခိုက်နေသည်ဟု ဒေသခံတစ်ဦးက ပြောသည်။
ထိုသို့ စစ်ကောင်စီဘက်မှ ဒရုန်းဖြင့် ဗုံးကြဲတိုက်ခိုက်ခံရပြီးနောက် ၎င်းတို့မှလက်နက်ကြီးဖြင့် ပြန်လည်ပစ်ခတ်ရာ အနီးတဝိုက်ရှိ အရပ်သားနေအိမ် ၂ လုံးပေါ်သို့ ကျရောက်ပေါက်ကွဲခဲ့ကြောင်း ၎င်းကဆက်ပြောသည်။
“ တစ်လုံးပြီး တစ်လုံး ဒုရုန်းနဲ့ကြဲနေတာပဲ။ စစ်ကောင်စီဘက်က လက်နက်ကြီး ပြန်ပစ်နေတယ်။ သူတို့ပစ်တာ နေအိမ်ပေါ်ကို လာကျတာ။ ကျနော်တို့ အိမ်လည်း ကျည်စတွေလာမှန်တယ်။ မှန်တွေတောင်ကွဲတယ်။ ဒီနေ့တော့ နေအိမ်ပေါ် လက်နက်ကြီးကျတာ ၂ လုံးရှိပြီ “ ဟု ၎င်းက ဆက်ပြောသည်။
လက်ရှိသတင်းရေးသားချိန်ထိ နှစ်ဖက်တပ်ဖွဲ့အကြား အပြန်အလှန် ပစ်ခတ်တိုက်ခိုက်နေလျက်ရှိပြီး ဒေသခံများသည် အိမ်တွင်းမှ အိမ်ပြင်သို့ မထွက်ရဲကြကြောင်း ၎င်းကဆက်ပြောသည်။
တိုက်ပွဲသည် ယမန်နေ့ (အောက်တိုဘာလ ၃၀ ရက်) မှစ၍ ညီနောင်မဟာမိတ်တို့က စတင်ဝင်ရောက် တိုက်ခိုက်ခဲ့ရာ ယနေ့ထိ တိုက်ပွဲဆက်လက်ဖြစ်ပွားနေလျက်ရှိပြီး စစ်တပ်စခန်းကို သိမ်းပိုင်နိုင်သည့် အခြေအနေထိ တိုက်ပွဲ ပြင်းပြင်းထန်ထန် ဖြစ်ပွားနေသည်ဟု ဒေသခံတစ်ဦးက သုံးသပ်ပြောဆိုထားသည်။
Leave a Comments