သျှမ်းပြည် မူဆယ်-ကွတ်ခိုင် ပြည်ထောင်စုကားလမ်းပေါ်ရှိ နမ့်ဖတ်ကာကျေးရွာတွင် လက်နက်ကြီးတစ်လုံး ကျပေါက်ကွဲမှုကြောင့် အမျိုးသမီးအပါအဝင် လူငယ် ၃ ဦး ပွဲချင်းပြီး သေဆုံးသွားခဲ့ကြောင်း စုံစမ်းသိရှိရသည်။
ယနေ့ (အောက်တိုဘာလ ၃၀ ရက်) ညနေပိုင်း ၅ နာရီကျော်တွင် မူဆယ်-ကွတ်ခိုင် ပြည်ထောင်စုကားလမ်းပေါ်ရှိ နမ့်ဖတ်ကားကျေးရွာ မောရှမ်းစားသောက်ဆိုင် ရှေ့သို့ လက်နက်ကြီး တစ်လုံးကျပေါက်ကွဲပြီး အနီးတဝှိက်မှ အသက် ၂၀ အရွယ်ရှိ အမျိုးသမီးတစ်ဦးအပါအဝင် အသက် ၁၈ နှစ်အောက် အမျိုးသား ၂ ဦး ပွဲချင်းပြီး သေဆုံးသွားခဲ့ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ ကွမ်းလာဝယ်တဲ့ ကောင်လေး ၂ ယောက်ကို မှန်သွားတာ။ နှစ်ယောက်စလုံးက ပွဲချင်းပြီးသွားတယ်။ အဲ့နီးနားတဝိုက်က ဆိုင်တွေကောမှန်တယ်။ အသက် ၂၀ နှစ်အရွယ် အမျိုးသမီးတစ်ယောက်ကိုလည်း ထိတယ်။ သူလည်း အဲ့မှာပွဲချင်းပြီးသွားတယ်။ တိုက်ပွဲကတော့ မဖြစ်ဘူး၊ တစ်ဖတ်သက်လက်နက်ကြီးတွေနဲ့ ပစ်နေတဲ့အသံပဲ ကြားရတာ “ ဟု ၎င်းဒေသခံတစ်ဦးက ပြောသည်။
အလားတူ မူဆယ် (၁၀၅) မိုင်တွင်လည်း ယနေ့ (အောက်တိုဘာလ ၃၀ ရက်) ညနေပိုင်း ၅ နာရီခွဲအချိန်၌ လက်နက်ကြီး ပစ်ခတ်သံများ ထွက်ပေါ်နေကြောင်း ဒေသခံအမျိုးသားတစ်ဦးက ဆက်ပြောသည်။
“ လောလောဆယ် ဒီလက်နက်ကြီးက သင်္ချိုင်းကုန်းဘက်မှာ ကြားနေရတယ်။ တိုက်နေလား ဘယ်လိုလဲတော့ မသိဘူး။ သင်္ချိုင်းကုန်းနားမှာက စစ်တပ် တပ်ခွဲတစ်ခုရှိတယ်။ အဲ့မှာလက်နက်ကြီးသံကြားနေတယ်။ ဟိုဘက်ကို ပြန်ပစ်လိုက်တဲ့ ပုံစံလိုလို ကြားနေရတယ်။ ဟိုဘက်ကလည်း ဒရုန်းလာချတာထင်တယ်။ ညညဆိုရင် သူတို့ဒရုန်းနဲ့လာချတတ်တယ် “ ဟု ၎င်းအမျိုးသားတစ်ဦးက ပြောသည်။
ထို့အပြင် ယနေ့ (အောက်တိုဘာလ ၃၀) ရက် နေ့လယ်ပိုင်းအချိန်တွင်လည်း မူဆယ်ခရိုင် နမ့်ခမ်းမြို့နယ်နှင့် ပန်ဆိုင်းမြို့နယ်တွင် စစ်ကောင်စီတပ်ဖွဲ့နှင့် ညီနောင်မဟာမိတ်တပ်ဖွဲ့တို့အကြား တိုက်ပွဲပြင်းထန်နေလျက် ရှိသည်။