သျှမ်းပြည် မူဆယ်ခရိုင် နမ့်ခမ်းမြို့နယ်နှင့် ပန်ဆိုင်း (ကြူကုတ်)မြို့အတွင်း စစ်ကောင်စီတပ်ဖွဲ့နှင့် ညီနောင်မဟာမိတ် တို့အကြား တိုက်ပွဲဆက်လက် ပြင်းထန်နေကြောင်း စုံစမ်းသိရှိရသည်။
ယနေ့ (အောက်တိုဘာလ ၃၀ ရက်) မွန်းလွဲ ၁ နာရီအချိန်မှစပြီး နမ့်ခမ်းမြို့နယ် မန်ခမ်းရွာနှင့် စယ်ဟိုင်းရွာ အကြားတွင် စစ်ကောင်စီတပ်ဖွဲ့နှင့် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) တို့ အကြားတိုက်ပွဲဆက်လက် ဖြစ်ပွားနေပြီး စစ်ကောင်စီ စခန်း ၁ ကုန်းဘက်မှ လက်နက်ကြီးဖြင့် ပစ်ကူနေကြောင်း ဒေသခံအမျိုးသားတစ်ဦးက ပြောသည်။
“ စယ်ဟိုင်းရွာမှာ ရှိတဲ့ TNLA နဲ့ မန်ခမ်းရွာမှာရှိတဲ့ စစ်ဆေးရေးဂိတ်က စစ်ကောင်စီနဲ့ တိုက်ပွဲဖြစ်နေကြတာ။ စစ်ကောင်စီဘက်က လက်နက်ကြီးတွေနဲ့ ပစ်နေတယ်။ နေအိမ်ပေါ် လက်နက်ကြီးကျလို့ ရေချိုးခန်းထဲ ဝင်ပုန်းတဲ့သူ ပုန်းနဲ့ တချို့လည်း နှစ်ထပ်တိုက်အိမ်မှာစုပြီး နေကြတယ် “ ဟု နမ့်ခမ်းဒေသခံ အမျိုးသားတစ်ဦးက ပြောသည်။
လက်ရှိသတင်းရေးသားနေချိန်အထိ တိုက်ပွဲဆက်လက်ဖြစ်ပွားနေသဖြင့် ဒေသခံများ ထွက်ပြေးနိုင်ခြင်းမရှိဘဲ တိုက်ပွဲကြား ပိတ်မိနေကြောင်း ၎င်းဆက်ပြောသည်။
အလားတူ ပန်ဆိုင်း (ကြူကုတ်) ရပ်ကွက် ၄ အနီးတွင် စစ်ကောင်စီတပ်ဖွဲ့နှင့် ညီနောင်မဟာမိတ် တို့အကြား တိုက်ပွဲဆက်လက် ပြင်းထန်နေလျက်ရှိပြီး မူဆယ် ၁၀၅ မိုင်မှ စစ်တပ်စခန်း ပစ်ခတ်လိုက်သော လက်နက်ကြီးတစ်လုံးသည် တရုတ်ပြည် ဝမ်တိန်မြို့အတွင်းသို့ ကျရောက်ပေါက်ကွဲခဲ့ကြောင်း ပန်ဆိုင်းမြို့ဒေသခံတစ်ဦးက ဆက်ပြောသည်။
“ အခု ရပ်ကွက် ၄ အနီးမှာ တိုက်ပွဲဖြစ်နေတယ်။ လက်နက်ကြီးနဲ့ ပစ်နေကြတာ၊ မြေတွေတောင်တုန်တယ်။ နေအိမ်ကိုလည်း လက်နက်ကြီးကျည်လာမှန်တယ်။ ၁၀၅ မိုင်ဘက်နေ ပစ်လာတဲ့ လက်နက်ကြီးတစ်လုံးလည်း ဝမ်တိန်မြို့ထဲကို ကျသွားပြီ “ ဟု ၎င်းဒေသခံက ပြောသည်။
ယင်းကဲ့သို့ တိုက်ပွဲဖြစ်ပွားမှုနှင့် ပတ်သက်ပြီး ထိခိုက်သေဆုံးမှု အသေးစိတ်ကို ဆက်လက်စုံစမ်း မေးမြန်းနေဆဲ။
