သျှမ်းပြည် နောင်ချိုမြို့နယ်တွင် စစ်ကောင်စီတပ်မှ လေကြောင်းဗုံးကြဲ တိုက်ခိုက်မှုကြောင့် ပြည်သူ ၁ ဦးသေဆုံးပြီး ၂ ဦးဒဏ်ရာရရှိခဲ့ကြောင်း စုံစမ်းသိရသည်။
ယမန်နေ့ (အောက်တိုဘာ ၂၉ ရက်) နံနက် ၇ နာရီအချိန်ခန့်တွင် စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်မှုတွင် နောင်ချိုမြို့နယ် ကျောက်ကြမ်းကျေးရွာရှိ ဟိန္ဒူဘုရားကျောင်းကို ထိမှန်ခဲ့ပြီး ပြည်သူ ၁ ဦးသေဆုံးကာ ၂ ဦး ထိခိုက် ဒဏ်ရာရရှိခဲ့သည်ဟု နောင်ချိုဒေသခံများက ပြောသည်။
“မနေ့က ၇ နာရီ ၂၀ မိနစ် ဝန်းကျင်လောက်က လေယာဉ်နဲ့ လာပစ်တာလေ။ ဗုံးဆံက သွပ်ပေါ်ကနေ ဝင်ကျလာတာ။ စစ်တပ်တွေ ပစ်နေတဲ့အချိန် ကျတာ။ တစ်ယောက်ကတော့ ရင်ဘတ်၊ နောက်ကျော မှန်တယ်။ ခေါင်းနဲ့ ခြေထောက်မှန်တယ်။ နောက်တစ်ယောက်ကတော့ ခြေထောက်နဲ့ ခေါင်းကို မှန်တယ်။ နောက်တစ်ယောက်ကတော့ ဗိုက်ကိုထိပြီး ဆုံးသွားတယ်”ဟု အမည်မဖော်လိုသည့် နောင်ချိုမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။
သေဆုံးသူသည် အသက် ၅၀ အရွယ် အမျိုးသားဖြစ်ပြီး ထိုခိုက်ဒဏ်ရာရသူ ၂ ဦးကို ပြင်ဦးလွင်ရှိ ဆေးရုံသို့ ပို့ဆောင်ကုသနေကြောင်း နောင်ချိုဒေသခံများထံမှ သိရသည်။
ယမန်နေ့ (အောက်တိုဘာ ၂၉ ရက်) နံနက်ခင်းအချိန်တွင် နောင်ချိုမြို့အနီး ကျောက်ကြမ်းကျေးရွာရှိ စစ်ကောင်စီတပ်ကို TNLA တပ်ဖွဲ့နှင့် မန္တလေး-PDF တပ်ဖွဲ့တို့က ပူးပေါင်းတိုက်ခိုက်ခဲ့ရာ စစ်ကောင်စီတပ် အထိနာသဖြင့် လေကြောင်းပစ်ကူနှင့်အတူ လက်နက်ကြီးများဖြင့် ရမ်းသမ်းပစ်ခတ်ခဲ့ကြောင်း နောင်ချိုဒေသခံများက ပြောသည်။
“ခမရ ၁၁၄ နဲ့ ၁၁၅ ရှိတယ်ဗျ။ အဲ့ဘက်ကနေ ပစ်နေတာပဲ။ ဒီမနက် ၆ နာရီကျော်အထိ ကြားရတာ။ အခုက တချို့အိမ်တွေပဲ ရွာထဲမှာ နေကြတော့တာ။ တော်တော်များများက သွားကုန်ပြီ။ ရှောင်ကုန်ကြပြီ၊ မနေကြတော့ဘူး။ ကျောက်ကြမ်းနဲ့ နီးစပ်ရာရွာတွေ၊ ပြီးတော့ ဘုန်းကြီးကျောင်းတွေမှာ ရှောင်ကုန်ကြပြီ။ နောင်ချိုမြို့ပေါ်မှာ အမျိုးရှိတဲ့လူတွေလဲ မြို့ထဲရှောင်ကြပြီ”ဟု နောင်ချိုမြို့ဒေသခံတစ်ဦးက သျှမ်းသံတော်ဆင့်ကို ပြောသည်။
ညီနောင်မဟာမိတ် ၃ ဖွဲ့နှင့် စစ်ကောင်စီတို့၏ “စစ်ဆင်ရေး-၁၀၂၇”ကြောင့် နောင်ချိုမြို့နယ်အတွင်း စစ်ဘေးရှောင်ဦးရေ ၁၀၀၀ ကျော်အထိ ရှိလာပြီး သပြေတိုး၊ မြေစာကုန်းနှင့် သဖန်းကိုင်း ဘုန်းကြီးကျောင်းတို့တွင် တိမ်းရှောင်ခိုလှုံနေကြရသည်ဟု နောင်ချိုဒေသခံများထံမှ သိရသည်။
