သျှမ်းပြည် သိန္နီမြို့နယ်တွင် စစ်ကောင်စီမှ ရမ်းသမ်းပစ်ခတ်သည့် လက်နက်ကြီး ကျေးရွာအတွင်း ကျရောက်ပေါက်ကွဲသဖြင့် ပြည်သူနေအိမ် ၂၀ ကျော် ထိခိုက်ပျက်စီးကြောင်း စုံစမ်းသိရသည်။
ယမန်နေ့ (အောက်တိုဘာ ၂၉ ရက်) ညသန်းခေါင်အချိန်တွင် စစ်ကောင်စီတပ်မှ ပစ်ခတ်လာသည့် လက်နက်ကြီးသည် သိန္နီမြို့အနီးရှိ ခူးဝိန်းနှင့်တိုက်ယက်ကျေးရွာတို့တွင် ကျရောက်ပေါက်ကွဲခြင်းကြောင့် ပြည်သူနေအိမ် ၂၀ ကျော် ထိခိုက်ပျက်စီးသွားသည်ဟု သိန္နီဒေသခံများက ပြောသည်။
“မနေ့ည ၁၂ နာရီ ညသန်းခေါင်ကြီး ရွာထဲကို လက်နက်ကြီးကျကွဲတာ။ အိမ်ခြေ ၅၀ ကျော်ပဲ ရှိတဲ့ ရွာလေးက လက်နက်ကြီးကြောင့် နေအိမ် ၂၀ ကျော် ပျက်စီးသွားတယ်။ ညတုန်းက ပေါက်ကွဲတာ လူ ၁ ယောက် ထိမှန်တယ်ပြောတယ်။ အခုသူ့ကို ဆေးရုံခေါ်သွားဖို့ လုပ်နေကြတယ်”ဟု သိန္နီမြို့ တိုင်ယက်ကျေးရွာ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
သိန္နီမြို့နယ် ခူးဝိန်းနှင့် တိုင်ယက်ကျေးရွာတို့မှ ပြည်သူများသည် တိုင်ယက် ဘုန်းကြီးကျောင်းတွင် တိမ်းရှောင်ခိုလှုံနေရပြီး စစ်ဘေးရှောင်ဦးရေ ၃၀၀ ကျော် ရှိနေသည်ဟု ဒေသခံများက ပြောသည်။
လက်ရှိအချိန်အထိ သိန္နီမြို့ရှိ စစ်ကောင်စီတပ်စခန်းများမှ လက်နက်ကြီးများဖြင့် ရမ်းသမ်းပစ်ခတ်နေပြီး ဂျက်လေယာဉ်များလဲ မြို့ပေါ်တွင် ပျံဝဲနေသည်ဟု သိရသည်။
သိန္နီမြို့နယ်ရှိ ဘုန်းကြီးကျောင်းများတွင် စစ်ဘေးရှောင်ဦးရေ ၃၀၀၀ ကျော် တိမ်းရှောင်ခိုလှုံနေရပြီး လမ်းပန်းဆက်သွယ်ရေး ပြတ်တောက်နေခြင်းကြောင့် စားနပ်ရိက္ခာနှင့် သောက်ရေသန့်များ အရေးပေါ်လိုအပ်နေကြောင်း သိရသည်။
