သျှမ်းပြည် သိန္နီမြို့နယ်အတွင်း (၃) ည ဆက်တိုက် လျှပ်စစ်မီးပြတ်တောက်သည့်အတွက် ဒေသခံ ပြည်သူများ အခက်အခဲ ဖြစ်နေကြောင်း စုံစမ်းသိရှိရသည်။
သိန္နီမြို့နယ်အတွင်း ညီနောင်မဟာမိတ် (၃) ဖွဲ့ နှင့် စစ်ကောင်စီ တို့ ပြီးခဲ့သည့် အောက်တိုဘာ (၂၇) ရက် မှ စတင်ပြီး တိုက်ပွဲပြင်းထန်စွာ ဖြစ်ပွားသည့်အတွက် ယနေ့ (အောက်တိုဘာ ၂၉) ရက် လက်ရှိ သတင်းရေးသားနေသည့်အချိန်ထိ လက်ခတ်မှု ဖြစ်ပွားနေကြောင်း စုံစမ်းသိရှိရသည်။
အောက်တိုဘာ (၂၇) ရက် ညမှ ယနေ့ (အောက်တိုဘာ ၂၉) ရက်ထိ လျှပ်စစ်မီး မရရှိသည့်အပြင် ဖုန်းလိုင်းများလည်း Mytel မှ လွှဲပြီး အခြားလိုင်းများ လိုင်းဖြတ်ထားကြောင်း သိရှိရသည်။
“မီးက (၃) ရက် ဆက်တိုက်ပြတ်နေပြီ။ ခု စစ်ရှောင်စခန်းမှာ ဆိုလာမီးတွေ နဲ့ အသုံးပြုနေရတယ်။ ကျမတို့ ဖုန်းအားကိုလည်း ချွေတာသုံးနေရတယ်။ Mytel လည်း ဖုန်းလိုင်းမကောင်းဘူး။ အချင်းချင်း ဆက်သွယ်ဖို့ ခက်နေတယ်။ ခု ကျမတို့ စစ်ရှောင်အခြေအနေက တိုက်ပွဲ ဒီထက်ကြာသွားရင် အစားအသောက် ခက်ခဲသွားနိုင်တယ်။ ခုချိန်ထိ ကိုယ့်စားနပ်ရိက္ခာနဲ့ ကိုယ် တောင့်ခံနိုင်ကြသေးတယ်။” ဟု ကျောင်းခမ်း စစ်ရှောင်စခန်းမှာ စစ်ရှောင်နေသူ တစ်ဦး က သျှမ်းသံတော်ဆင့် ကိုပြောသည်။
အလားတူ စစ်ရှောင်စခန်းတွင် သောက်သုံးရေ အသုံးပြုရန်အတွက် ကျောင်းတွင်း မီးစက်ကို အသုံးပြုနေသော်လည်း ဒီဇယ် ဝယ်ရန် အခက်အခဲဖြစ်နေကြောင်း သိရှိရသည်။
“ဒီဇယ်က ပြတ်တော့မယ်။ ထွက်ဖို့ဝယ်ကလဲ အခက်အခဲဖြစ်နေတယ်။ ခုချိန်ထိ လက်နက်ကြီးတွေ ဆက်တိုက်ပစ်နေတုန်းပဲ။ စက်သေနတ်သံတွေလည်း ကြားနေရတယ်။ ကောလဟာလ သတင်းတွေမတင်ကြပါနဲ့လို့ တောင်းဆိုချင်တယ်။ ခုချိန်ထိ သိန္နီ တစ်မြို့လုံးကို ဘယ်အဖွဲ့ကမှ အကုန်မသိမ်းနိုင်သေးပါဘူး” ဟု သိန္နီဒေသခံ တစ်ဦးက သျှမ်းသံတော်ဆင့် ကို အတည်ပြု ပြောသည်။
လက်ရှိ သိန္နီမြို့နယ်အတွင်း (၃) ရက်အတွင်း တိုက်ပွဲပြင်းထန်သည့်အတွက် စစ်ရှောင်စခန်း လက်ရှိ (၆) ခု ဖွင့်လှစ်ထားသော်လည်း စစ်ရှောင်စာရင်း အတိအကျ မရရှိသေးကြောင်း၊ လက်နက်ကြီး ထိမှန်ပြီး ဒဏ်ရာ ရပြည်သူများ စာရင်းအတိအကျ မသိရှိရသေးကြောင်း သိန္နီဒေသခံ သတင်းရင်းမြစ်တစ်ဦး ကသျှမ်းသံတော်ဆင့်ကို ပြောသည်။
လက်ရှိအချိန် သျှမ်းမြောက် တကြော ညီနောင်မဟာမိတ် (၃) ဖွဲ့ နှင့် စစ်ကောင်စီတို့ တိုက်ပွဲပြင်းထန်မှု ဖြစ်ပွားနေသဖြင့် ပြည်သူများ စိုးရိမ်ထိတ်လန့်နေပြီး တိုက်ပွဲအတွင်း ပိတ်မိနေသည့် ပြည်သူများလည်း ရှိနေကြောင်း သိရသည်။
