သျှမ်းပြည် မြောက်ပိုင်းဒေသတွင် စစ်ကောင်စီတပ်ဖွဲ့နှင့် မဟာမိတ်တပ်ဖွဲ့တို့အကြား တိုက်ပွဲဖြစ်ပွားခဲ့ရာ စစ်ကောင်စီဘက်မှ ၄၀ ကျော်သေဆုံးပြီး ဗိုလ်ကြီးအပါအဝင် စစ်သုံ့ပန်းနှင့်အတူလက်နက်ခဲယမ်း အများအပြား ဖမ်းဆီးသိမ်းဆည်းရမိကြောင်း BPLA မှထုတ်ပြန်ထားသည်။

ယမန်နေ့ (အောက်တိုဘာလ ၂၈ ရက်) နံနက်ပိုင်းအချိန်မှစပြီး သျှမ်းမြောက်ဒေသရှိ မဟာမိတ်တပ်ဖွဲ့များ လှုပ်ရှားရာနေရာတစ်ခုသို့ တပ်မ (၃၃) လက်အောက်ခံတပ်ရင်း ဖြစ်သည့် စစ်ကိုင်းတိုင်းအခြေစိုက် ခမရ (၁၃)မှ အင်းအား (၇၀) ခန့်ဖြင့် ချဉ်းကပ်လာသဖြင့် တိုက်ပွဲဖြစ်ပွားခဲ့ကြောင်း ထုတ်ပြန်ချက်တွင် ရေးသားဖော်ပြထားသည်။

တစ်ရက်သာ တိုက်ပွဲအတွင်း စစ်ကောင်စီဘက်မှ ၄၀ ကျော်သေဆုံးပြီး ဗိုလ်ကြီးနေလင်းအောင် အပါအဝင် စစ်သုံ့ပန်း (၃) ဦးနှင့်အတူ လက်နက်ခဲယမ်းအများအပြား ဖမ်းဆီးသိမ်းဆည်းရမိကြောင်း ဆိုသည်။

ထို့ပြင် ဗမာပြည်သူ့လွတ်မြောက်ရေးတပ်တော် (BPLA) မှ ရဲဘော် (၄) ဦးကျဆုံးပြီး (၆) ဦးထိခိုက် ဒဏ်ရာရရှိသည်။

တိုက်ပွဲဖြစ်ပွားချိန်တွင် စစ်ကောင်စီဘက်မှ တပ်ဖွဲ့ဝင်များသည် တိုက်ပွဲနှင့်နီးစပ်ရာ ကျေးရွာများအတွင်းသို့ ထွက်ပြေးသွားပြီး ပြည်သူများကို ဓားစာခံလုပ်ကာ နေအိမ်အတွင်း ပုန်းအောင်းနေသည့် စစ်ကောင်စီ တပ်ဖွဲ့ဝင် များကိုလည်း ရှင်းလင်းခဲ့ရကြောင်း ရေးသားဖော်ပြထားသည်။

ယနေ့ (အောက်တိုဘာလ ၂၉) ရက် တိုက်ပွဲအခြေအနေနှင့် ပတ်သက်ပြီး လားရှိုးမြို့ဒေသခံ အမျိုးသမီးတစ်ဦးက ယခုလို ပြောသည်။

“ အခုထိတော့ အသံကြားနေတုန်းပဲ။ သူတို့ပစ်နေကြတာ အိမ်ပြင်ကိုမထွက်ရဲဘူး “ ဟု ၎င်း အမျိုးသမီးတစ်ဦးက ပြောသည်။

အလားတူ ပြီးခဲ့သည့် (အောက်တိုဘာလ ၂၇ ရက်) တွင် ကနဦး တိုက်ခိုက်မှုတစ်ခုတွင်လည်း စစ်ကောင်စီဘက်မှ ၄ ဦးသေဆုံးကာ ရိုင်ဖယ်သေနတ် (၇)လက်နှင့် အခြားပစ္စည်းများကို BPLA မှ သိမ်းဆည်းရထားကြောင်း ဆိုသည်။

လက်ရှိ ၁၀၂၇ စစ်ဆင်ရေးတွင် ညီနောင်မဟာမိတ် သုံးဖွဲ့သည့် မြန်မာအမျိုးသား ဒီမိုကရက်တစ်မဟာမိတ် တပ်မတော် (MNDAA)၊ တအာင်း (ပလောင်) အမျိုးသားလွတ်မြောက်ရေး တပ်မတော် (TNLA)၊ ရက္ခိုင့်တပ်တော် (AA) ဦးဆောင်၍ ဗမာပြည်သူ့လွတ်မြောက်ရေး တပ်တော် (BPLA )နှင့် ပူးပေါင်းတော်လှန်ရေး PDF တပ်ရင်းအချို့ ပူးပေါင်းပါဝင် တိုက်ခိုက်ပေးလျက်ရှိသည်။