သျှမ်းပြည် သိန္နီမြို့ပေါ်ရှိ ပြည်သူနေထိုင်ရာ ရပ်ကွက်များတွင် ညီနောင်မဟာမိတ် ၃ ဖွဲ့နှင့် စစ်ကောင်စီတပ်တို့ အပြန်အလှန် တိုက်ပွဲပြင်းထန်နေပြီး ပြည်သူထိခိုက်သေဆုံးမှုရှိကြောင်း စုံစမ်းသိရသည်။
သိန္နီမြို့နယ်အတွင်း ယမန်နေ့ (အောက်တိုဘာ ၂၈ ရက်) ညပိုင်းမှ စ၍ ယနေ့ (အောက်တိုဘာ ၂၉ ရက်) နံနက်ပိုင်းအထိ မြောက်ပိုင်းမဟာမိတ် ၃ ဖွဲ့နှင့် စစ်ကောင်စီတပ်တို့သည် နှစ်ဘက်အပြန်အလှန် ထိတွေ့တိုက်ပွဲပြင်းထန်နေပြီး စစ်ကောင်စီတပ်မှ ဂျက်လေယာဉ်ဖြင့် ပစ်ခတ်တိုက်ခိုက်နေသည်ဟု တိုက်ပွဲအတွင်း ပိတ်မိနေသည့် သိန္နီမြို့ခံများက ပြောသည်။
ထို့အပြင် သိန္နီမြို့ပေါ် လူနေရပ်ကွက်များအတွင်း စစ်ကောင်စီတပ်မှ ပစ်ခတ်သည့် လက်နက်ကြီး ကျရောက်ပေါက်ကွဲခြင်းကြောင့် ပြည်သူထိခိုက်သေဆုံးပြီး ဒဏ်ရာရရှိကြောင်း သိန္နီမြို့ ဒေသခံများထံမှ သိရသည်။
“စစ်ကောင်စီဘက်က လက်နက်ကြီးတွေပေါ့၊ မြို့ဘက်ကို လှမ်းပစ်တာ။ သိန္နီမြို့ပေါ် ရပ်ကွက် ၁ ဘက်မှာ လက်နက်ကြီးကျပြီး အသက် ၆၀ အရွယ် အမျိုးသားတစ်ဦးကို မှန်တာ။ သူ့လက်ကို ထိပြီး အိမ်လဲ ပျက်စီးသွားတယ်။ နောက်ပြီး ကလေးငယ်တစ်ဦး နောက်စေ့ထိမှန် ဒဏ်ရာရတာ၊ ထိခိုက်ဒဏ်ရာရတဲ့လူတွေလဲ ဘယ်သူမှ ဆေးရုံမသွားရဲကြဘူး။ အခုရွာထဲက ကျန်းမာရေးဆရာမတွေကပဲ ပြန်ကုပေးနေတယ်”ဟု သိန္နီမြို့ခံတစ်ဦးက သျှမ်းသံတော်ဆင့်ကို ပြောသည်။
လက်ရှိ သိန္နီမြို့ပေါ်တွင် တိုက်ပွဲပြင်းထန်နေပြီး လုံခြုံရေးအခြေအနေကြောင့် မည်သူမှ အိမ်အပြင်သို့ မထွက်ရဲကြဘဲ ထိခိုက်ဒဏ်ရာရသူများမှာ ဆေးဝါးကုသခွင့် ဆုံးရှုံးနေသည်။
“အခုတော့ တိတ်လိုက် ချလိုက် လုပ်နေကြတာ၊ ရဲစခန်းတော့ မီးလောင်သွားတယ်။ နောင့်တို့ရွာက အိမ်ထဲ မိုင်းကျလို့ ကလေး ၁ ယောက်၊ လူကြီး ၁ ယောက်ဒဏ်ရာရတယ်။ တခြားထိခိုက်တာ အတည်မပြည်နိုင်ဘူး။ အိမ်ထဲကနေ အိမ်ပြင်မထွက်ရဲလို့ တခြားနေရာတွေ တိတိကျကျ မသိရသေးဘူး”ဟု သိန္နီမြို့နယ် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (အောက်တိုဘာ ၂၈ ရက်)ကလည်း သိန္နီမြို့နယ် ကျောင်းခမ်းဘုန်းကြီးကျောင်းတွင် စစ်ဘေးရှောင်နေသည့် အမျိုးသားတစ်ဦးကို လက်နက်ကြီးထိမှန်ရာ ဆေးကုသမှု မခံယူနိုင်ဘဲ သွေးထွက်လွန်ပြီး သေဆုံးသွားသည်ဟု သိန္နီမြို့ခံများထံမှ သိရသည်။
” ကျနော် သိရသလောက်တော့ တိုက်ပွဲအတွင်း သေဆုံးသူ ၄ယောက်ရှိတယ်။ အတည်ပြုလို့ရဘူး။ ကျည်ထိတဲ့သူလည်း ဆေးရုံသွားလို့မရဘူး။ ဆေးကုလို့မရဘူး” သိန္နီမြို့ လူငယ်အမျိုးသားတစ်ဦးက သျှမ်းသံတော်ဆင့်ကိုပြောသည်။
ယခုဖြစ်ပွားနေသည့် တိုက်ပွဲများကြောင့် သိန္နီမြို့ပေါ်နှင့် ကျေးရွာများရှိ ကျောင်းဆိုင်ဘုန်းကြီးကျောင်း၊ ကျောင်းခမ်းဘုန်းကြီးကျောင်း နှင့် ဓာတ်တော်စေတီတို့တွင် စစ်ဘေးရှောင်ဦးရေ ၂၀၀၀ ကျော် ရောက်ရှိခိုလှုံနေကြရသည်ဟု သိရပြီး အတည်ပြုနိုင်ရန် ဆက်လက်စုံစမ်းနေသည်။
သိန္နီမြို့နယ်အတွင်း အောက်တိုဘာ ၂၆ ရက်မှစ၍ လက်ရှိအချိန်အထိ အင်တာနက်နှင့်ဖုန်းလိုင်းများ ဖြတ်တောက်ခံထားရပြီး စစ်ကောင်စီလက်အောက်ခံ မိုင်တဲလ် ကွန်ယက်မှာလည်း မကြာခဏ ပျက်တောက်နေသည်ဟု သိရသည်။
