သျှမ်းပြည် နောင်ချိုမြို့အနီး ကျောက်ကြမ်းကျေးရွာတွင် စစ်ကောင်စီတပ်နှင့် TNLA တပ်ဖွဲ့၊ မန္တလေး-PDF ပူးပေါင်းတပ်ဖွဲ့တို့ တိုက်ပွဲပြင်းထန်နေကြောင်း စုံစမ်းသိရသည်။

ယနေ့ (အောက်တိုဘာ ၂၉ ရက်) နံနက် ၄ အချိန်ခန့်မှ စတင်ပြီး နောင်ချိုမြို့အနီး ကျောက်ကြမ်းကျေးရွာရှိ စစ်ကောင်စီတပ်ကို TNLA တပ်ဖွဲ့နှင့် မန္တလေး-PDF တပ်ဖွဲ့တို့က ပူးပေါင်းတိုက်ခိုက်နေကြောင်း နောင်ချိုဒေသခံများက ပြောသည်။

“မနက်အစောကြီး ၄ နာရီလောက်ကတည်းက စပစ်နေတာ။ စစ်ကောင်စီတပ်ထဲက အထိနာမယ်ထင်တယ်။ ၇ နာရီလောက်ကျတော့ ဂျက်လေယာဉ်နဲ့ပါ လာဝဲပြီး ပစ်တာ။ တပ်နဲ့နီးတဲ့ ရွာတွေတော့ မြို့ထဲရှောင်ကုန်ကြပြီ”ဟု နောင်ချိုမြို့နေ ဒေသခံတစ်ဦးက သျှမ်းသံတော်ဆင့်ကို ပြောသည်။

ယနေ့နံနက်တွင် ထပ်မံဖြစ်ပွားသည့် တိုက်ပွဲကြောင့် နောင်ချိုအခြေစိုက် စစ်ကောင်စီတပ် ခမရ-၁၁၄ မှ ဒုတပ်ရင်းမှူး အပါအဝင် စစ်သားအများအပြား သေဆုံးသည်ဟု ကနဦး စုံစမ်းသိရသည်။

လက်ရှိအချိန်ထိလည်း နောင်ချိုမြို့ အနီးတစ်ဝိုက်ကို စစ်ကောင်စီတပ်က လေကြောင်းဖြင့် ဆက်လက် ပစ်ခတ်တိုက်ခိုက်နေကြောင်း နောင်ချိုဒေသခံများက ပြောသည်။

တိုက်ပွဲအတွင်း စစ်ကောင်စီအလောင်း ၆ လောင်း၊ လက်နက် ၇ လက်၊ ၆၀ မမ (60 mm) မော်တာ ၁ လုံး၊ လက်နက်ခဲယမ်းနှင့် စစ်အသုံးအဆောင်ပစ္စည်းများ သိမ်းဆည်းရမိခဲ့သည်ဟု TNLA တပ်ဖွဲ့၏ သတင်းနှင့် ပြန်ကြားရေးဌာနက သတင်းထုတ်ပြန်လာသည်။

နောင်ချိုမြို့နယ်တွင် ယမန်နေ့ (အောက်တိုဘာ ၂၆ ရက်)မှ စတင်ပြီး စစ်ကောင်စီတပ်စခန်းများကို TNLA တပ်ဖွဲ့နှင့် မန္တလေး-PDF တပ်ဖွဲ့တို့က ပူးပေါင်းတိုက်ခိုက်နေရာ သံဘိုရွာရှိ စစ်ကောင်စီ၏ နတ်စင်ကုန်း တပ်စခန်းကို သိမ်းပိုက်ရရှိခဲ့သည်ဟု ထုတ်ပြန်ထားသည်။