သျှမ်းပြည် လားရှိုးမြို့အတွင်း (၂) ည ဆက်တိုက် လက်နက်ကြီး ပစ်ခတ်မှုကြောင့် ပြည်သူများ စိုးရိမ်ထိတ်လန့်နေကြကြောင်း စုံစမ်းသိရှိရသည်။
ညီနောင်မဟာမိတ် (၃) ဖွဲ့ နှင့် စစ်ကောင်စီတို့ အောက်တိုဘာ (၂၇) ရက် နံနက် (၄) နာရီကစပြီး သျှမ်းပြည်မြောက်ပိုင်း တကြော လက်နက်ကြီး လက်နက်ငယ်ဖြင့် ပစ်ခတ်မှုဖြစ်ပွားခဲ့ပြီး လက်ရှိ အောက်တိုဘာ (၂၈) ရက် ည အထိ (၂) ရက် ဆက်တိုက် ပစ်ခတ်မှုဖြစ်ပွားခဲ့သည်။
“လားရှိုးမှာက ၂ ည ဆက်တိုက် လက်နက်ကြီး လက်နက်ငယ်တွေ နဲ့ ပစ်ခတ်ကြတာ။ သူတို့ တစ်ခါတစ်ခါ ပစ်ရင် အိမ်တောင် တုန်သွားတယ်။ သူတို့ လက်နက်ကြီးတွေ နေအိမ်ခြံဝန်းထဲ မကျဖို့ပဲ ဆုတောင်းနေတာ။” ဟု လားရှိုးမြို့ခံ တစ်ဦး က သျှမ်းသံတော်ဆင့် ကိုပြောသည်။
၂ ရက်ဆက်တိုက် တိုက်ပွဲ အပြင်းအထန် ဖြစ်ပွားမှုကြောင့် လားရှိုးမြို့နယ်အနီးရှိ ကျေးရွာအုပ်စုမှ ဒေသခံများ လားရှိုးမြို့ပေါ်ရှိ ဘုန်းကြီးကျောင်းမှာ စစ်ရှောင်ထွက်ပြေးလာသူ ၃ထောင်ကျော် ရှိပြီးဖြစ်ကြောင်း စုံစမ်းသိရှိရသည်။
လက်ရှိ သျှမ်းသံတော်ဆင့် ကောက်ယူထားသည့် စာရင်းအရ လားရှိုး စစ်ရှောင် (၃၀၀၀) ကျော်ရှိသည်။
အလားတူ ညီနောင်မဟာမိတ် (၃) ဖွဲ့ စစ်ဆင်ရေးကြောင့် သျှမ်းပြည်မြောက်ပိုင်း တကြော (၂) ရက် ဆက်တိုက် တိုက်ပွဲပြင်းထန်ပြီး မူဆယ်မြို့နယ်၊ နမ့်ခမ်းမြို့နယ်၊ ချင်းရွှေဟော်၊ သိန္နီမြို့နယ် ၊ ကွတ်ခိုင်မြို့နယ် စသည့် မြို့နယ်များရှိ စစ်ကောင်စီ တပ်စခန်းတစ်ချို့ကို ညီနောင်မဟာမိတ် (၃) ဖွဲ့မှ သိမ်းပိုက်နိုင်ခဲ့သည်။
စစ်ကောင်စီဘက်မှ အကျအဆုံးများနေသဖြင့် တိုက်လေယာဥ်ဖြင့်လည်း ဗုံးကြဲတိုက်ခိုက်နေကြောင်းလည်း မြေပြင် သတင်းရင်းမြစ်ထံမှ သိရှိရသည်။
တိုက်ပွဲပြင်းထန်စွာ ဖြစ်ပွားသည့်အတွက်ကြောင့် မြို့နယ်အချို့ ဖုန်းလိုင်း ပြတ်တောက်နေပြီး စစ်ကောင်စီလက်အောက်ခံ ဆက်သွယ်ရေးလိုင်းဖြစ်သည့် Mytel မှလွှဲပြီး အခြား ဆက်သွယ်ရေးလိုင်းများ မရရှိပေ။
“ဖုန်းလိုင်း အင်တာနက်လိုင်းမရတဲ့အတွက် ကျမတို့ အိမ်က မိသားစုကို စိတ်ပူနေတယ်။ ခုက တိုက်ပွဲအတွင်းဖြစ်နေတယ်ဆိုတော့ ဘာမှမဖြစ်ဖို့ အဝေးကနေ ဆုတောင်းပေးရုံမှ လွှဲပြီး ဘာမှ လုပ်လို့မရဘူး။ ကျမတို့ အွန်လိုင်းကနေ ဗီဒီယိုတွေ တွေ့လိုက်ရင် အရမ်းစိုးရိမ် ထိတ်လန့်နေရတယ်။ အိမ်ကိုလည်း အရမ်းစိတ်ပူနေတယ်။ အွန်လိုင်းပေါ်မှာက တခုပြီး တစ်ခုပြောနေကြတော့ ဘယ်တစ်ခု က အတည်ယူရမှန်း မသိဘူးဖြစ်နေတယ်။” တခြားမြို့နယ်မှ နေပြီး သိန္နီမြို့နယ်ရှိ မိသားစုဝင်အတွက် စိုးရိမ်နေသူ တစ်ဦး ကပြောသည်။
တိုက်ပွဲအတွင်း ကောလဟာလ သတင်းများ လျင်မြန်စွာ ပြန့်နှံ့မှုဖြစ်ပြီး ယုံကြည်စိတ်ချရသည့် သတင်းမီဒီယာမှ လွှဲပြီး ကျန်သည့် ဆိုရှယ်မီဒီယာပေါ်မှ သတင်းများကို အယုံမလွယ်ကြရန်နှင့် သတိဝီရိယ ရှိကြရန် အဆိုပါသူက ပြောဆိုထားသည်။
သျှမ်းမြောက်တကြော ညီနောင်မဟာမိတ် (၃) ဖွဲ့ နှင့် စစ်ကောင်စီ တို့ဖြစ်ပွားသည့် တိုက်ပွဲသည် ဆက်လက်ပြီး မပြင်းထန်ရန်အတွက်လည်း ပြည်သူများက ဆုတောင်းနေလျက်ရှိသည်။
သျှမ်းမြောက် တကြော လက်ရှိဖြစ်ပွားနေသည့် တိုက်ပွဲသည် မြန်မာ – တရုတ် နယ်စပ် ကုန်သွယ်ရေးလမ်းကြောင်း စီးပွားရေးအချက်အချာ ဖြစ်သည့် မြို့နယ်များလည်း ဖြစ်ကြသည်။
Leave a Comments