သျှမ်းပြည် လားရှိုးမြို့နယ် မိုင်းယော်တိုက်နယ်၊ မိုင်းကျက်အုပ်စုရှိ စစ်ကောင်စီတပ်စခန်းကို ညီနောင်မဟာမိတ် ၃ ဖွဲ့က ထိုးစစ်ဆင် တိုက်ခိုက်ခဲ့ကြောင်း စုံစမ်းသိရသည်။

ယမန်နေ့ (အောက်တိုဘာ ၂၇ ရက်နေ့)က လားရှိုးမြို့ နှင့် မိုင် ၆၀ အကွာရှိ မိုင်းယော်တိုက်နယ်၊ မိုင်းကျက်အုပ်စုတွင် အခြေစိုက်သော စစ်ကောင်စီတပ်ကို ညီနောင်မဟာမိတ် ၃ ဖွဲ့က ထိုးစစ်ဆင် တိုက်ခိုက်ခဲ့ပြီး ယနေ့ (အောက်တိုဘာ ၂၈ ရက်)တွင်လည်း အပြန်အလှန် တိုက်ပွဲဖြစ်ပွားကြောင်း လားရှိုးမြို့နယ် မိုင်းကျက်ဒေသခံတစ်ဦးက ပြောသည်။

ယနေ့ (အောက်တိုဘာ ၂၈ ရက်) နံနက်ပိုင်းတွင် မိုင်းကျက်ရှိစစ်ကောင်စီတပ်စခန်းကို ညီနောင်မဟာမိတ် ၃ ဖွဲ့က သိမ်းပိုက်ရရှိထားပြီး စစ်ကောင်စီဘက်မှ လေကြောင်းပစ်ကူဖြင့် ပြန်လည်တိုက်ခိုက်နေသည်ဟု တိုက်ပွဲအတွင်း ပိတ်မိနေသည့် မိုင်းကျက်ရွာမှ ဒေသခံများက ပြောသည်။

“ညီနောင်မဟာမိတ်တပ်နဲ့ စစ်ကောင်စီတပ်တွေ မနေ့ညက တစ်ညလုံး ပစ်နေကြတာ၊ စစ်ကောင်စီ တပ်စခန်းတစ်ခုကို သိမ်းနိုင်တယ်ပြောတယ်။ ဒီမနက်ရောက်တော့ စစ်ကောင်စီတပ်ဘက်က လေကြောင်းနဲ့ ထပ်လာပစ်တော့ TNLA တပ်သားတွေ အများကြီး ကျတယ်။ စာသင်ကျောင်းမှာ ထိခိုက်ဒဏ်ရာရတဲ့ TNLA တပ်သားတွေကို ရွှေ့နေကြတယ်။ စစ်ကောင်စီတပ်ဘက်ကလဲ ၁၄ ယောက်၊ ၁၅ ယောက်မက သေတယ်။ ဝမ်ကတ်နဲ့ ဝမ်လုံရွာသားတွေတော့ ဝမ်ကောင်ဘုန်းကြီးကျောင်းမှာ စစ်ရှောင်နေကြတယ်။ စစ်ဘေးရှောင် စုစုပေါင်း ၃၀၀ နီးပါးရှိတယ်”ဟု မိုင်းကျက်‌ဒေသခံတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီမှ လေကြောင်းပစ်ကူဖြင့် လာရောက်ပစ်ခတ်မှုကြောင့် မိုင်းကျက်ဒေသခံများမှာ လုံခြုံရေးစိုးရိမ်ကာ ဝမ်ကောင်ဘုန်းကြီးကျောင်းတွင် စစ်ဘေးရှောင်ဦးရေ ၃၀၀ ခန့် လာရောက်တိမ်းရှောင်နေကြသည်ဟု သိရသည်။

ထို့အပြင် လက်ရှိသတင်းရေးသားနေသည့် ညနေ ၅ နာရီအချိန်အထိ ဝမ်ကတ်၊ ဝမ်လုံကျေးရွာအတွင်း TNLA တပ်သား ၃၀၀ ကျော်က ဝင်ရောက်နေရာယူထားသည်ဟုလည်း စုံစမ်းသိရသည်။

“မနက်တုန်းက ရွာသားတွေကို လိုအပ်တဲ့ပစ္စည်း ယူဖို့ဆိုပြီး ရွာထဲကို ပြန်ခိုင်းတယ်။ ယူပြီးရင် ဘုန်းကြီးကျောင်းကို ပြန်သွားပေါ့။ နေ့လယ်ပိုင်းရောက်တော့ ရွာသားတွေအကုန်လုံးကို ရွာထဲကထွက်ခိုင်းပြီး လုံခြုံတဲ့နေရာ သွားနေကြဖို့ TNLA တပ်ဖွဲ့က လာပြောတယ်။ တိုက်ပွဲက ဆက်ဖြစ်နေမယ့် သဘောရှိတယ်။ စစ်ကောင်စီတပ်ကတော့ သူတို့တပ်ထဲကနေ အပြင်ကို ထွက်လို့မရတော့ဘူ။ မနက်ခင်း တချိန်လုံး လေကြောင်းပစ်ကူနဲ့ပဲ လာတိုက်နေတာ။ ဒီနေ့ခင်း ၂-၃ နာရီကမှ အသံနဲနဲ ငြိမ်သွားတယ်”ဟု တိုက်ပွဲအတွင်း ပိတ်မိနေသည့် မိုင်းကျက်ရွာမှ ဒေသခံတစ်ဦးက သျှမ်းသံတော်ဆင့်ကို ပြောသည်။

ညီနောင်မဟာမိတ် ၃ ဖွဲ့၏ ယခု စခန်းသိမ်းတိုက်ပွဲကြောင့် ပြည်သူများ ထိခိုက်သေဆုံးမှု မရှိသော်လည်း ဒေသခံများက တိုက်ပွဲထပ်မံဖြစ်ပွားမည်ကို စိုးရိမ်ထိတ်လန့်နေကြသည်။

မိုင်းယော်တိုက်နယ်အတွင်းရှိ မိုင်းကျက်အုပ်စုသည် လားရှိုးမြို့အရှေ့ဘက် မိုင် ၆၀ ခန့် ကွာဝေးပြီး စစ်ကောင်စီတပ်နှင့် ပြည်သူ့စစ်များ၊ KIA၊ TNLA နှင့် MNDAA တပ်ဖွဲ့များ လှုပ်ရှားသွားလာနေသည်။

ညီနောင်မဟာမိတ် ၃ ဖွဲ့နှင့် ပြည်သူ့ကာကွယ်ရေးတပ်ဖွဲ့ PDF တို့၏ “စစ်ဆင်ရေး-၁၀၂၇”ကြောင့် လားရှိုးမြို့နယ်အတွင်း ကျေးရွာပေါင်း ၃၀ ခန့်မှ စစ်ဘေးရှောင်ဦးရေ ၃၀၀၀ ကျော်အထိ တိုးလာကြောင်း သိရသည်။