သျှမ်းပြည် လားရှိုးမြို့နယ် ဟိုနမ့်ကျေးရွာတွင် စစ်ကောင်စီမှ ပစ်ခတ်လိုက်သည့် လက်နက်ကြီးကြောင့် အမျိုးသမီး တစ်ဦး ထိမှန်သေဆုံးပြီး အမျိုးသမီးတစ်ဦး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။

ယမန်နေ့ (အောက်တိုဘာ ၂၅ ရက်) ညအချိန် ၁၁ နာရီခွဲခန့်က ဟိုနမ့်ရွာတွင် ကိုးကန့်တပ်ဖွဲ့ MNDAA စခန်းချသည်ဆိုကာ ကျေးရွာဘက်သို့ စစ်ကောင်စီတပ်မှ လက်နက်ကြီးဖြင့် ၃ ကြိမ် ပစ်ခတ်ခဲ့ခြင်းကြောင့် အသက် ၅၀ ကျော်အရွယ်ရှိ ပါ့စံ သည် ပွဲချင်းပြီးသေဆုံးသွားကြောင်း လားရှိုးဒေသခံ အမျိုးသားတစ်ဦးက ပြောသည်။

“ဟုတ်တယ်။ ညသန်းခေါင်ကို လက်နက်ကြီးနဲ့ ပစ်လာတာ။ လက်နက်ကြီး ပေါက်ကွဲလို့ လူတစ်ယောက်သေပြီး အိမ်တွေလဲ ထိတယ်။ စစ်တပ်ကနေ လက်နက်ကြီးနဲ့ ၃ ခါ ပစ်တာ။ ရွာထဲမှာ ကိုးကန့်တပ်တွေ ရှိတယ်ဆိုပြီး ပစ်တာ၊ ကိုးကန့်တပ်ဖွဲ့တွေက နေ့လယ်ခင်း ရွာထဲခဏလေး ဝင်လာပြီး ပြန်ထွက်သွားပြီ”ဟု လားရှိုးမြို့နယ် ဟိုနမ့်ဒေသခံတစ်ဦးက သျှမ်းသံတော်ဆင့်ကို ပြောသည်။

ဟိုနမ့်ကျေးရွာအတွင်း စစ်ကောင်စီတပ်မှ ပစ်ခတ်သည့် လက်နက်ကြီး ကျရောက် ပေါက်ကွဲမှုကြောင့် အသက် ၅၀ ကျော်အရွယ်ရှိ ဒေါ်စံ ဆိုသူ အမျိုးသမီးသည် ပွဲချင်းပြီး သေဆုံးခဲ့ပြီး၊ အခြားအမျိုးသမီးတစ်ဦးလည်း ထိခိုက်ဒဏ်ရာရခဲ့သည်။

ထို့ပြင် လက်နက်ကြီးကြောင့် ပြည်သူနေအိမ် ၃ လုံး ထိခိုက်ပျက်စီးခဲ့သည်ဟု ‌‌ဒေသခံများထံမှ သိရသည်။

လားရှိုးမြို့ မြောက်ဘက်ရှိ ကျေးရွာများတွင် ကိုးကန့် MNDAA တပ်ဖွဲ့ အပါအဝင် မြောက်ပိုင်းမဟာမိတ် အင်အားအများအပြား ‌ရောက်ရှိနေပြီး ‌ဒေသခံများမှာ တိုက်ပွဲထပ်မံဖြစ်ပွားကာ စားဝတ်နေရေး အခက်အခဲဖြစ်မည်ကို စိုးရိမ်နေကြသည်။

ယမန်နေ့ (အောက်တိုဘာ ၂၅ ရက်) နေ့လည်ပိုင်းကလည်း လားရှိုးမြို့အနီး ကုန်းသာ၊ ပန်စုံကျေးရွာရှိ ကိုးကန့်တပ်ဖွဲ့ MNDAA စခန်းချနေရာကို စစ်ကောင်စီဘက်မှ လေကြောင်းဖြင့် ၂ ကြိမ်လာ‌ရောက် ဗုံးကြဲတိုက်ခိုက်ပြီး လက်နက်ကြီးဖြင့် ၃ ကြိမ် ပစ်ခတ်ခဲ့သည်။

စစ်ကောင်စီက လားရှိုးမြို့နယ်တွင် (အောက်တိုဘာလ ၂၅ ရက်) တစ်ရက်ထဲအတွင်း အများပြည်သူ နေထိုင်ရာ ကျေးရွာဆီသို့ လက်နက်ကြီးများဖြင့် ၂ ကြိမ်တိုင်တိုင် ပစ်ခတ်တိုက်ခိုက်ခဲ့ခြင်း ဖြစ်သည်။