သျှမ်း-ကရင်နီ (ကယား) ပြည်နယ်စပ်ဒေသ မိုးဗြဲမြို့တွင် သုံးရက်သာ ကာလအတွင်း မြေမြုပ်မိုင်း အလုံး ၃၀ ကို ရှင်းလင်းရမိကြောင်း မိုးဗြဲပြည်သူ့ကာကွယ်ရေးတပ် MPDF ထံမှ သိရသည်။

အောက်တိုဘာလ ၂၃ မှ ၂၅ ရက်အထိ သုံးရက်သာ ကာလအတွင်း မိုးဗြဲမြို့ပေါ် စစ်ကောင်စီတပ်စွဲထားသော နေရာအနီးတွင် မိုးဗြဲပြည်သူ့ကာကွယ်ရေး တပ်ရင်း ၁ နှင့် ပူးပေါင်းတပ်ဖွဲ့ KA၊ KNDF တို့ပူးပေါင်ပြီး မိုင်းရှင်းလင်းရေး ဆောင်ရွက်ခဲ့ရာ စုစုပေါင်း မိုင်းအလုံး ၃၀ ကို ရှင်းလင်းရမိခဲ့ကြောင်း MPDF မှ ယမန်နေ့ အောက်တိုဘာလ ၂၅ ရက်တွင် ထုတ်ပြန်ထားသည်။

“ မိုင်းရှင်းလေးရေးလုပ်ငန်းကို အောက်တိုဘာ ၂၄မှ ၂၅ အထိ ၃ရက်သာအတွင်း လုပ်ဆောင်ခဲ့တာ။ စစ်ကောင်စီတပ်က ထောင်းထားတဲ့ ၁၄/ ၁၆ နင်းမိုင်း စုစုပေါင်း အလုံး ၃၀ ရှင်းလင်းရရှိခဲ့ပါတယ်။ အဲ့ဒီ ရှင်းလင်းရရှိထားတဲ့ မိုင်းတွေကို ကျနော်တို့ မိုးဗြဲပြည်သူ့ကာကွယ်ရေး တပ်ရင်း ၁ ကနေ ထိန်းသိမ်းထားပြီး ပြည်သူလူထုလုံခြုံရေးအတွက် ကြိုးစားဆောင်ရွက်နေပါတယ် “ ဟု မိုးဗြဲ MPDF၏ သတင်းနှင့်ပြန်ကြားရေး လူမှုကွန်ရက်မှ ရေးသားဖော်ပြထားသည်။

အဆိုပါ စစ်ကောင်စီ ထောင်ထားသော မြေမြုပ်မိုင်းကြောင့် စစ်ရှောင်များနှင့် ဒေသခံများ နင်းမိပြီး ဒဏ်ရာရှိသူများလည်း ရှိကြောင်း ဆက်လက်ရေးသားဖော်ပြထားသည်။

စစ်တပ်အာဏာသိမ်းပြီးနောက်ပိုင်း သျှမ်းပြည်နယ်စပ်ဒေသနှင့် ကရင်နီ (ပြည်) တွင် စစ်ရေး၊ နိုင်ငံရေး၊ လူ့အခွင့်အရေး ဆက်တိုက်ချိုးဖောက်ခံရပြီး မြေမြုပ်မိုင်းအပါအဝင် စစ်ကောင်စီ လေကြောင်းတိုက်ခိုက်မှု၊ လက်နက်ကြီး ပစ်ခတ်မှုနှင့် သတ်ဖြတ်မှုကြောင့် စုစုပေါင်း ၃၈၂ ဦး သေဆုံးခဲ့ရပြီဖြစ်ကြောင်း တိုးတက်သော ကရင်နီပြည်သူ့အင်အားစု  PKPF အောက်တိုဘာလ ၁ ရက်၌ ထုတ်ပြန်ထားသည်။

ထို့အပြင် ပြည်သူများအနေဖြင့် သွားလာရန်တားမြစ်ထားသည့် နေရာများနှင့် စစ်ကောင်စီတပ်စွားထားသော နေရာများအနီး သွားလာဖြတ်သန်းခြင်း၊ နေထိုင်ခြင်း မပြုကြရန် မိုးဗြဲပြည်သူ့ကာကွယ်ရေးတပ် MDPF မှ သတိပေးထားသည်။