သျှမ်းပြည် ကျောက်မဲခရိုင် နောင်ချိုမြို့နယ် ဟိုခိုကျေးရွာအနီး စစ်ကောင်စီနှင့် တအာင်း (ပလောင်) အမျိုးသားလွတ်မြောက်ရေး တပ်မတော် TNLA၊ တော်လှန်ရေး ပူးပေါင်း PDF တို့အကြား တိုက်ပွဲဖြစ်ပွားနေသဖြင့် ပြည်သူများဖြတ်သန်းသွားလာ၍ မရသေးကြောင်း သတင်းသိရှိရသည်။

ယနေ့ (အောက်တိုဘာလ ၂၆) ရက် နံနက်အစောပိုင်းအချိန်တွင် နောင်ချိုမြို့နယ် ဟိုခိုကျေးရွာအနီး စစ်ကောင်စီတပ်ဖွဲ့နှင့် တအာင်း (TNLA)တပ်ဖွဲ့၊ တော်လှန်ရေး ပူပေါင်း PDF တပ်ဖွဲ့တို့အကြား တိုက်ပွဲဆက်လက် ဖြစ်ပွားနေကြောင်း မူဆယ်ကုန်တင်ကားသမား တစ်ဦးက ပြောသည်။

ယင်းကဲ့သို့ တိုက်ပွဲဖြစ်ပွားနေသောကြောင့် တော်လှန်ရေးပူးပေါင်း တပ်ဖွဲ့ PDF တို့က ကုန်တင်ကားတစ်စီးဖြင့် ကျောက်ကြမ်းရွာရှိ အဝေးပြေးလမ်းမကို ပိတ်ဆို့ထားကာ ဖြတ်သန်းသွားလာခွင့် တားမြစ်ထားကြောင်း ၎င်းကဆက်ပြောသည်။

“ ဒီနေ့မနက်အစောပိုင်းကတည်းက တိုက်ပွဲဖြစ်နေတာ။ လမ်းမပေါ်မှာတော့ PDF တွေ ကုန်တင်ကားတစ်စီးနဲ့ ပိတ်ထားတယ်။ အခုထိ ဖြတ်သန်းသွားလာလို့ မရသေးဘူး “ မူဆယ်ကုန်တင်ကားသမား တစ်ဦးက သျှမ်းသံတော်ဆင့်ကို ပြောသည်။

လက်ရှိအချိန်ထိ တိုက်ပွဲဆက်လက်ဖြစ်ပွားသဖြင့် ကျော်ကြမ်းရွာအနီးတွင် ကုန်တင်ကား၊ ခရီးသည်တင်ကား အများအပြား စောင့်ဆိုင်းနေရကြောင်း သိရသည်။

ပြီးခဲ့သည့် စက်တင်ဘာလမှစ၍ TNLA နှင့် PDF တို့ သိမ်းထားသော မိုးကုတ်မြို့နယ်အတွင်း ညောင်ကုန်းရွာနှင့် ကုန်းစံကျေးရွာ အနီးစစ်တပ် စခန်းကုန်း ၂ ခုကို ပြန်ရနိုင်ရေးအတွက် စစ်ကောင်စီဘက်က နေ့စဉ်ထိုးစစ်ဆင်နေရာ လက်ရှိအချိန်ထိ တိုက်ပွဲဆက်လက်ဖြစ်ပွားနေခြင်း ဖြစ်သည်။