သျှမ်းပြည် လားရှိုးမြို့တွင် စက်တင်ဘာလ ဒုတိယပတ်မှ စတင်ဖမ်းဆီးလာသည့် လိုင်စင်မဲ့ ဆိုင်ကယ်များကို အရှေ့မြောက်ပိုင်း တိုင်းစစ်ဌာနချုပ်မှတဆင့် နေပြည်တော်သို့ ပို့ဆောင်နေကြောင်း စုံစမ်းသိရသည်။
“ ဆိုင်ကယ်လိုင်စင်ရှိရင်တော့ ဒဏ်ကြေး ၃ သောင်း တောင်းပြီး ပြန်ပေးတယ်။ လိုင်စင်မရှိရင်တော့ သိမ်းသွားတာ။ အဲ့ဆိုင်ကယ်တွေကို လားရှိုးမှာ စစ်တိုင်းရုံးထဲ ယူသွားတာ။ ၂ ရက် ၃ ရက်နေရင် ၆ ဘီးကားတင်ပြီး နေပြည်တော်ကို ပို့တာလို့ ပြောတယ်။ သူတို့တကယ်သိမ်းမယ်လို့ အုပ်ချုပ်ရေးမှူးတွေကိုယ်တိုင် ပြောတာ”ဟု အမည်မဖော်လိုသည့် လားရှိုးမြို့ခံတစ်ဦးက သျှမ်းသံတော်ဆင့်ကို ပြောသည်။
ဆိုင်ကယ်ဦးထုပ်မဆောင်းတာ၊ ဆိုင်ကယ်နံပါတ်ပြား ရှေ့နောက် ၂ နေရာ မတပ်ဆင်ခြင်း၊ ဆိုင်ကယ်ဘက်ကြည့်မှန် မတပ်ဆင်ခြင်းကို စစ်သား၊ ယာဉ်ထိန်းရဲ၊ ပြည်သူ့စစ်နှင့် ကညန တို့မှ ပူးပေါင်းဖမ်းဆီးနေသည်ဟု သိရသည်။
“သူတို့ဖမ်းချင်တဲ့လူကျတော့ ဖမ်းတာပဲ။ စစ်သားတွေကော၊ ယာဉ်ထိန်းရဲတွေကော၊ ကညနကလူတွေနဲ့ ပြည်သူ့စစ်တွေကော လုံခြုံရေးယူပေးနေတာ အဖွဲ့ပေါင်းစုံပဲ။ သူတို့အဖွဲ့မှာ လူ ၂၀ လောက်ပါတယ်။ အလစ်ဖမ်းတာများတယ်။ လမ်းဟိုဘက်ထိပ် ဒီဘက်ထိပ် ပုန်းပြီး စောင့်ဖမ်းတာ”ဟု ၎င်းဒေသခံက ဆက်ပြောသည်။
စစ်အာဏာသိမ်းပြီးနောက် လားရှိုးမြို့ ယာဉ်ထိန်းရဲတပ်ဖွဲ့သည် နည်းမျိုးစုံသုံးကာ ယာဉ်စည်းကမ်း လမ်းစည်းကမ်းကို ပိုမိုတင်းကျပ်လာပြီး စည်းကမ်းချိုးဖောက်သူများကို ဒဏ်ငွေအမြောက်အမြား ကောက်ယူကြောင်း သိရသည်။
“အများစုကလည်း ဝေဖန်ကြတာရှိတယ်။ လားရှိုးမှာ ဗုံးပေါက်တာကလဲ အများစုက ဆိုင်ကယ်တွေနဲ့ လာတာကြောင့်ပဲ ဗုံးပေါက်တာဖြစ်မှာ။ လားရှိုးမှာက မငြိမ်းချမ်းတာ
အဲ့ဒါကြောင့်လဲ ပါတယ်လို့ ပြောရမယ်။ အခုက ဗုံးပေါက်တော့ ဆိုင်ကယ်အစုတ် ဖမ်းသလိုလုပ်ပြီး လုပ်စားနေသလိုပဲ”ဟု လားရှိုးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
စစ်အာဏာသိမ်းပြီးနောက်ပိုင်း လားရှိုးမြို့ရှိ ဟိုတယ်၊ ဆိုင်ခန်းနှင့် ဓာတ်ဆီဆိုင်များတွင် ဗုံးပေါက်ကွဲမှုကြောင့် ၂၀၂၃ ခုနှစ်အတွင်း လူ ၈ ဦး သေဆုံးပြီး ၄၁ ဦးဝန်းကျင် ထိခိုက်ဒဏ်ရာ ရရှိခဲ့ကြောင်း သျှမ်းသံတော်ဆင့်မှ နေ့စဉ်ရေးသား တင်ဆက်ထားသည့် သတင်းမှတ်တမ်းများအရ သိရသည်။
