မြန်မာ-တရုတ်နယ်စပ်ဒေသ နမ့်ခမ်းမြို့နယ် စယ်ဟိုင်းရွာအတွင်း တအာင်း (ပလောင်) အမျိုးသား လွတ်မြောက်ရေး တပ်မတော် (TNLA )တပ်သားများသည် အရပ်သားနေအိမ်အတွင်းသို့ ဝင်ရောက်နေထိုင်ပြီး ဆက်ကြေး (အခွန်ကောက်)ခံပြုလုပ်နေကြောင်း ဒေသခံ၏ သတင်းပေးပို့ချက်အရ သိရသည်။

ပြီးခဲ့သည့် အောက်တိုဘာလဆန်းပိုင်းမှပြီး စယ်ဟိုင်းရွာအတွင်းသို့ ဝင်ရောက်လာသည့် TNLA တပ်သား အင်အား ၂၀ ခန့်သည် လက်ရှိအချိန်ထိ အရပ်သားနေအိမ်၊ တောင်ယာစိုက်ခင်းနှင့် မူလကြိုကျောင်းဝိုင်းအတွင်း တပ်စွဲနေထိုင်လျက်ရှိပြီး ဒေသခံများထံ အခွန်ကောက်ခံနေကြောင်း တိကျသည့်ဒေသခံ အမျိုးသားတစ်ဦးက ပြောသည်။

“ ရွာထဲမှာလာနေတာ ၁ လနီးပါးလောက်ရှိပြီ။ ကျနော်တို့ရွာသားတွေတော့ လာမနေဖို့ပြောတယ်၊ ဒါပေမယ့် မရဘူး။ မူကြိုကျောင်းတွေမှာ နေတယ်။ လူမရှိတဲ့အိမ်မှာနေတယ်။ လမ်းဘေးမှာတွေလည်း သဲအိတ်တွေချပြီး နေတယ်။ ပြီးတော့ အရက်ရောင်းဆိုင်၊ ကုန်စုံဆိုင်တွေ ဘယ်မှာရှိလဲ လမ်းသွားလမ်းလာ ဒေသခံတွေမေးတယ်။ နေရာတွေ့ပြီဆိုတာနဲ့ နောက်ရက်အခွန်ဆောင်ဖို့ စာသွားပေးတယ်။ တစ်ဆိုင်ကို ကျပ် ၂ သိန်းလောက် ဆောင်ရတယ် “ ဟု ၎င်းအမျိုးသားတစ်ဦးက ပြောသည်။

TNLA တပ်သားများသည် ကုန်စုံဆိုင်ဖွင့်လှစ်သူများထံ ကျပ် ၂ သိန်းမှ ၅ သိန်းအထိ အခွန်ကောက်ခံယူ နေကြောင်း ၎င်းကဆက်ပြောသည်။

ထို့အပြင် ကျေးရွာအတွင်း လက်နက်ကိုင်တပ်ဖွဲ့များ ဝင်ရောက်နေထိုင်သောကြောင့် ပစ်ခတ် တိုက်ခိုက်မှုများ ဖြစ်ပွားလာမည်ကို ဒေသခံများက လုံခြုံရေးအရ စိုးရိမ်နေကြသည်။

“ မန်ခမ်းရွာမှာလည်း စစ်ကောင်စီဂိတ်တွေ ရှိတယ်။ ကုန်းဆာရွာ ဘက်မှာလည်း SSPP တွေ လှုပ်ရှားနေတယ်။ သူတို့က တိုက်ပွဲဖြစ်မလာနိုင်ဘူးလို့ ပြောမရဘူး။ အချိန်မရွှေး တိုက်ပွဲဖြစ်ပွားလာနိုင်တယ်။ ကျနော်တို့လည်း တိုက်ပွဲဖြစ်မှာကို စိုးရိမ်တယ် “ ဟု ဒေသခံတစ်ဦးက ထပ်လောင်းပြောသည်။

မူဆယ်-နမ့်ခမ်းကြားရှိ နမ်ခမ်းမြို့နယ်၊ စယ်ဟိုင်းရွာ နှင့် ကုန်းဆာရွာတို့သည် ရွာချင်းကပ်လျက်ရှိပြီး တစ်ရွာမှ တစ်ရွာသို့ ဆိုင်ကယ်ဖြင့်သွားပါက ၅ မိနစ်ကြာ အကွားအဝေးရှိသည်။

အလားတူ ကျေးရွာအတွင်းသို့ ဝင်ရောက်နေထိုင်သည့် TNLA တပ်သားများ အနေဖြင့် ကျေးရွာနှင့်ဝေးရာဒေသ၌ ပြောင်းရွှေ့ပေးစေလိုကြောင်း၊ အခြားလက်နက်ကိုင်တပ်ဖွဲ့များကလည်း ဒေသအတွင်းသို့ ဝင်ရောက်နေထိုင်ခြင်း မပြုကြရန် ဒေသခံများက တောင်းဆိုထားသည်။

ယင်းကဲ့သို့ လက်နက်ကိုင်တပ်ဖွဲ့များ၊ စစ်သားများ သာသနာ့နယ်မြေ အနီးပတ်ဝန်းကျင်တွင် တိုက်ပွဲပစ်ခတ်မှု ဖြစ်ပွားခြင်း ၊ ကျေးရွာအတွင်း လူထု နှင့် အတူ ရောနှော နေထိုင်ခြင်း တို့သည် ဂျီနီဗာ ကွန်ဗင်းရှင်း (Geneva Convention) ဥပဒေ နှင့် ဆန့်ကျင်သည့်အပြင် စစ်ရာဇဝတ်မှု မြောက်ကြောင်းလည်း သိရသည်။