သျှမ်းပြည် ကျိုင်းတုံမြို့နယ် မိုင်းခွန်အုပ်စု ဝမ်လင်ကျေးရွာရှိ လယ်စောင့်တဲတွင် သွားအိပ်စောင့်သည့် အမျိုးသားတစ်ဦး ဓားခုတ်ခံရပြီး သေဆုံးသွားကြောင်း စုံစမ်းသိရသည်။

ယနေ့ (အောက်တိုဘာလ ၂၄ ရက်) နံနက်(၁၀)နာရီ အချိန်ခန့်တွင် ကျိုင်းတုံမြို့နယ် မိုင်းခွန်အုပ်စု ဝမ်လင်ရွာနေ အမျိုးသားတစ်ဦး လယ်စောင့်တဲသို့ သွားအိပ်စောင့်ရင်း ဓားခုတ်ခံရပြီး သေဆုံးနေသည်ကို ဒေသခံများက တွေ့ရှိခဲ့သည်။

ဒေသခံများ၏ ဖုန်းဆက်အကူအညီ တောင်းခံမှုအရ ထိုအလောင်းကို တိုင်းနေ နာရေးကူညီမှုအသင်းက ကျိုင်းတုံဆေးရုံ ရင်ခွဲရုံသို့ ကူညီပို့ဆောင်ခဲ့ကြောင်း သိရသည်။

“အဲ့အလောင်းနဲ့ ပတ်သက်ပြီးတော့ ဘာကြောင့် သေလဲ ဆိုတာ ကျနော်တို့လည်း မသိရဘူး၊ မနက် ၁၀ နာရီလောက်က ဒေသခံတွေ ဖုန်းဆက်ပြီး အကူအညီ တောင်းလာလို့ သွားကူညီပေးတာခဲ့တာ”ဟု ကျိုင်းတုံမြို့ တိုင်းနေနာရေးကူညီမှုအသင်းမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

သေဆုံးသူအမျိုးသားသည် အသက် ၄၀ အရွယ်ရှိ ဦးမော့ရှယ် ဆိုသူဖြစ်ပြီး ကျိုင်းတုံမြို့နယ် မိုင်းခွန်အုပ်စု ဝမ်လင်ရွာတွင် နေထိုင်သူဖြစ်သည်ဟု သိရကာ မည်သို့ ဓားခုတ်ခံရပြီး သေဆုံးသည်ကို မသိရသေးပေ။

ပြီးခဲ့သည့် အောက်တိုဘာလ ၂၁ ရက််တွင် မူဆယ်မြို့နယ် ကျင်းစန်းကျော့သို့ သွားသည့်လမ်းရှိ ဟိုနောင်ရွာအနီး အမှိုက်ပုံတစ်ခုတွင် ဆာလာအိတ်ဖြင့် ထုပ်ပိုးထားသော လူသေအလောင်း ၃ လောင်းကို တွေ့ရှိခဲ့ကြောင်း ဒေသခံများထံမှ သိရသည်။