သျှမ်းမြောက် မူဆယ်မြို့နယ်အတွင်း စစ်ကောင်စီနှင့် ကချင်လွတ်လပ်ရေးတပ်မတော် (KIA) တပ်ဖွဲ့တို့အကြား တိုက်ပွဲဖြစ်ပွားပြီးနောက် နှစ်ဖက်တပ်ဖွဲ့ ထိခိုက်သေဆုံးမှုများရှိကြောင်း မြေပြင်စစ်ရေးသတင်းရင်းမြစ်ထံမှ သိရသည်။
ပြီးခဲ့သည့် (အောက်တိုဘာလ ၁၉)ရက်တွင် မုံးပေါ် နှင့် မိုးကုံးကြားရှိ ဝိန်းလတောင်စခန်း (စစ်ကောင်စီစခန်း) တစ်ခုကို ကချင်လွတ်လပ်ရေး တပ်မတော် KIA တပ်မဟာ ၆ အောက် တပ်ရင်း ၃၆ တပ်ဖွဲ့က ဝင်ရောက်တိုက်ခိုက် သိမ်းပိုက်ခဲ့သည်။
စခန်းသိမ်းတိုက်ပွဲအတွင်း စစ်ကောင်စီဘက်မှ ၂၀ ကျော် သေဆုံးခဲ့ပြီး လက်နက်ခဲယမ်းအများအပြား သိမ်းဆည်းရမိကြောင်း မြေပြင်စစ်ရေးသတင်းရင်းမြစ် တစ်ဦးက သျှမ်းသံတော်ဆင့်ကို ပြောဆိုထားသည်။
စစ်ကောင်စီခန်းကို တိုက်ခိုက်သိမ်းခဲ့ပြီးနောက် အောက်တိုဘာလ ၂၀ ရက်တွင် မူဆယ်မြို့နယ် နမ့်အွမ်ကျေးရွာအုပ်စု တီးမရွာအနီး တပ်စွဲထားသော KIA ရဲ့ တပ်မဟာ ၆ ကို စစ်ကောင်စီတပ်က ဂျက်တိုက်လေယာဉ် တစ်စီးဖြင့် ဗုံးကြဲတိုက်ခိုက်ခဲ့သည်။
“ တီးမရွာအနီးက KIA စခန်းကို စစ်ကောင်စီဗုံးလာကြဲတုန်းက ၄ လုံးထက်မနည်း ရှိတယ်။ ဒီနယ်မြေအတွင်းမှာ KIA တွေအပြင် TNLA၊ MNDAA တွေလည်း လှုပ်ရှားတယ် “ ဟု တီးမရွာဒေသခံတစ်ဦးက ပြောသည်။
လေကြောင်းတိုက်ခိုက်မှုအတွင်း KIA ဘက်မှ အကြီးဆုံး အရာရှိအပါအဝင် ၅ ဦးသေဆုံးပြီး ထိခိုက်ဒဏ်ရာရသူ များလည်း ရှိခဲ့ကြောင်း လူမှုကွန်ရက်မီဒီယာတွင် ရေးသားဖော်ပြထားသည်။
အဆိုပါ ထိခိုက်သေဆုံးမှုအပြင် စစ်ရေးအခြေအနေနှင့် ပတ်သက်ပြီး ကချင်လွတ်လပ်ရေး တပ်မတော် KIA ၏ ပြောရေးဆိုခွင့်ရှိသူ ဗိုလ်မှူးကြီး နော်ဘူထံ ဆက်သွယ်မေးမြန်းခဲ့ရာ ဖုန်းလက်ခံဖြေကြားခြင်း မရှိခဲ့ပေ။
စစ်ကောင်စီ၏ ဝါဒဖြန့်ချယ်နယ်များတွင် လေကြောင်းတိုက်ခိုက်ခံရသည့် နေရာအနီးတဝိုက်မှ တပ်စခန်း အဆောက်အဦးအပြား ထိခိုက်ပျက်စီးခဲ့သလို သေဆုံးနေသည့် လူအလောင်း များလည်း တွေ့ရသည်။
အလားတူ အောက်တိုဘာလ ၁၈ ရက်တွင် သိန္နီမြို့နယ် နမ့်ဆလပ်ကျေးရွာအနီးမှာ ဆိုင်ကယ် ၂ စီးဖြင့် မောင်းနှင်လာသည့် KIA တပ်ဖွဲ့မှ တပ်ဖွဲ့ဝင် ၃ ဦးကို စစ်ကောင်စီက ပစ်ခတ်တိုက်ခိုက်ခဲ့၍ သေဆုံးခဲ့ကြောင်း မြေပြင်စစ်ရေးသတင်းရင်းမြစ်တစ်ဦး၏ သတင်းပေးပို့ချက်အရ သိရသည်။
လက်ရှိ မူဆယ်မြို့နယ်အတွင်း စစ်ကောင်စီနှင့် ကချင်လွတ်လပ်ရေး တပ်မတော် KIA တို့စစ်ရေး တင်းမာနေလျက် ရှိပြီး အချိန်မရွေးတိုက်ပွဲလာနိုင်မည်ကို ဒေသခံများက စိုးရိမ်နေကြသည်။
Leave a Comments