စစ်ကောင်စီဦးစီးပြီး ပြုလုပ်ကျင်းပသော တန်ဆောင်တိုင်မီးပုံးပျံပွဲတော်ကို အချို့သော မီးပုံးပျံပြိုင်ပွဲ ဝင်များက ဝင်ရောက်ယှဉ်ပြိုင်မည်မဟုတ်ကြောင်း စုံစမ်းသိရသည်။
သျှမ်းပြည် တောင်ကြီးမြို့တွင် တန်ဆောင်တိုင်ပွဲတော်ကို နိုဝင်ဘာလ ၂၁ ရက် မှ နိုဝင်ဘာ ၂၇ရက်ထိ ၇ ရက်ဆက်တိုက် ပြုလုပ်သွားမည် ဖြစ်ကြောင်း သျှမ်းပြည် တောင်ပိုင်း ရိုးရာမီးပုံးပျံအဖွဲ့မှ ထုတ်ပြန်ထားသည်။
၂၀၁၉ခုနစ် Cov-19 ကြောင့် တန်ဆောင်တိုင်ပွဲတော်ကိုရပ်နားခဲ့ရပြီး၊ ၂၀၂၂ နိုဝင်ဘာလတွင် စစ်ကောင်စီဦးစီးကာ ပြန်လည် ပြုလုပ်ကျင်းပခဲ့ပြီး ယခုအခါ ဒုတိယ အကြိမ်မြောက် ပြန်လည်ကျင်းပ ခြင်းဖြစ်သည်။
“ကျနော်တို့က ပြိုင်ချင်တဲ့ အသင်းရှိမယ်။ မပြိုင်ချင်တဲ့အသင်းရှိမယ်။ ကျနော်တို့က ဘယ်သူ့ကိုမှ လည်းပြိုင်ပါလို့လည်း မပြောဘူး ၊ မပြိုင်နဲ့လို့လည်း မပြောဘူး။ စိတ်ဆန္ဒ ရှိတဲ့ အသင်းဖွဲ့တွေကို ဖိတ်ခေါ်ပြီးတော့မှ ပြိုင်ဖို့ပြောထားတာပါ” ဟု သျှမ်းပြည် တောင်ပိုင်း ရိုးရာမီးပုံးပျံအဖွဲ့ ပြောရေးဆိုခွင့် ရှိသူတစ်ဦးက သျှမ်းသံတော်ဆင့်ကိုပြောသည်။
ယခုချိန်သည် စစ်ရေး၊နိုင်ငံရေး နှင့် အခြားသော အကြောင်းအရာများကြောင့် အချို့သော မီးပုံးပျံပြိုင်ပွဲ ဝင်များက နာမည်ပျက်ခံ၍ ဝင်ရောက်ယှဉ်ပြိုင်နိုင်မည် မဟုတ်ကြောင်း မီးပုံးပျံလုပ်သူတစ်ဦးက သျှမ်းသံတော်ဆင့်ကို ပြောသည်။
“သူများမြို့ကတော့ တောင်ကြီးကို မကောင်းဘူးလို့ ပြောခံရမာစိုးရိမ်တာပါ၊ ကိုယ်တိုင် ဝင်မပြိုင်ရဲ တာကလည်း တကယ်ပါ အဓိက အဲ့ဒါကြောင့်ပါပဲ “ ဟု ၎င်းက ပြောသည်။
နိုင်ငံရေးအခြေနေကြောင့် တန်ဆောင်တိုင်ပွဲတော်က ယခင်ထက် ပျော်စရာကောင်းမည်မဟုတ်ကြောင်း၊ မီးပုံးပျံ လုပ်သည့် သူများလည်း ရှားပါပြီး၊ ထိုမီးပုံးပျံလုပ်သူများသည် လုပ်သည် တစ်ယောက် တစ်နေရာ ရောက်ကုန် ပြီဖြစ်ကြောင်း မီးပုံးပျံလုပ် သူတစ်ဦးက သျှမ်းသံတော်ဆင့်ကို ပြောသည်။
ယခုနှစ် တန်ဆောင်တိုင်ပွဲတော်တွင် နေ့တိုင်း အရုပ်ခြေ ( ၂ )ချောင်း ( ၄ )ချောင်း ၊ညမီးကြီးမီးပုံးပျံ၊ စိန်နားပန်မီးပုံးပျံ များကို လွှတ်သွားမည် ဖြစ်ကြောင်း သျှမ်းပြည် တောင်ပိုင်း ရိုးရာမီးပုံးပျံ ပညာရှင်အသင်း မှသိရသည်။
