သျှမ်းပြည် သိန္နီမြို့နယ်ရှိ ကျေးရွာများကို ဗုံးခိုကျင်းတူးထားရန် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) တပ်ဖွဲ့က သတိပေးလာသည်ဟု သျှမ်းသံတော်ဆင့်မှ စုံစမ်းသိရသည်။
စစ်ကောင်စီတပ်မှ ကချင်လွတ်လပ်ရေးတပ်မတော် KIA ၊ တအာင်းအမျိုးသားလွတ်မြောက်ရေးတပ်ဦးTNLA နှင့် ကိုးကန့် MNDAAတပ်တို့ကို ရုတ်တရက် စစ်ဆင်ရေးပြုလုပ်လာလျှင် ပြည်သူတွေ ထိခိုက်မှာစိုးရိမ်တာကြောင့် မိမိနေအိမ်ခြံဝင်းအတွင်း ဗုံးခိုကျင်းတူးထားရန် သတိလာပေးကြောင်း ဒေသခံအမျိုးသားတစ်ဦးက ပြောသည်။
“စစ်တပ်က ရုတ်တရက် စစ်ဆင်ရေးလုပ်လာခဲ့ရင် ရှောင်ဖို့ တူးထားခိုင်းတယ်လို့ ပြောတယ်။ နားပိန်းကျေးရွာကနေ စပြီးတော့ သိန္နီမြို့ အရှေ့ဘက်က ပန်လော့ကျေးရွာတွေအထိ တူးခိုင်းထားတယ်လို့တော့ ကြားတယ်။ စစ်တပ်က လက်နက်ကြီးနဲ့ လျှောက်ပစ်ရင် ပြည်သူတွေကို ထိမှာ။ ရုတ်တရက် စစ်ဖြစ်လာရင် ပြေးစရာမရှိမှာ စိုးရိမ်တယ်။ သေနတ်သံ ဗုံးသံတွေကြားရင် ဗုံးခိုကျင်းထဲမှာ ဝင်ပုန်းလို့ရအောင် တူးခိုင်းတာ”ဟု သိန္နီမြို့နယ် ကွန်ကောက်ကျေးရွာမှ ဒေသခံတစ်ဦးက သျှမ်းသံတော်ဆင့်သို့ ပြောသည်။
ရွာသားများ မိမိအိမ်ခြံဝင်းအတွင်း ဗုံးခိုကျင်းတူးရန်ကို SSPP တပ်ဖွဲ့၏ မြို့နယ်အဆင့် အုပ်ချုပ်ရေးတာဝန်ရှိသူ အရာရှိတစ်ဦးကိုယ်တိုင် လာရောက်ပြောဆိုသည်ဟုလည်း ၎င်းဒေသခံက ဆက်ပြောသည်။
သိန္နီမြို့နယ် မန္တလေး-မူဆယ်ကားလမ်းမကြီးပေါ်တွင် နေရာယူထားသော ကချင်လွတ်လပ်ရေးတပ်မတော် KIO/KIA အဖွဲ့မှ ကုန်တင်ကားကြီးများထံ အခွန်(ဆက်ကြေး) ဆက်တိုက်ကောက်ခံနေသည်ဟုလည်း သိရသည်။
ယခုလဆန်းပိုင်းတွင် ကွန်ကောက်ကျေးရွာအတွင်း စစ်ကောင်စီနှင့် ကချင်လွတ်လပ်ရေးတပ်ဖွဲ့တို့၏ တိုက်ပွဲကြောင့် ဒေသခံ (၅၀၀) နီးပါးက ဘုန်းကြီးကျောင်းနှင့် အနီးအနား ကျေးရွာရှိ ဆွေမျိုးများထံ ထွက်ပြေးခဲ့ရပြီး အောက်တိုဘာလ ၁၂ရက်တွင် စိုးရိမ်စိတ်ဖြင့် နေရပ်ပြန်သွားကြရသော်လည်း မြေမြှုပ်မိုင်အန္တရာယ်ကို စိုးရိမ်နေကြရသည်။
အောက်တိုဘာ ၉ ရက်တွင် စစ်ကောင်စီမှ ပစ်ခတ်လိုက်သည့် လက်နက်ကြီးကြောင့် ကောင်းချိုကျေးရွာအတွင်း ကျရောက်ပေါက်ကွဲရာ နေအိမ်အဆောက်အဦးနှင့် ဘုန်းကြီးကျောင်းဆောင်များလည်း ပျက်စီးခဲ့ရသည်။
လက်ရှိ သိန္နီမြို့နယ်အတွင်း စစ်ကောင်စီနှင့် ကချင်လွတ်လပ်ရေးတပ်မတော် (KIO/KIA) တို့ စစ်ရေးတင်းမာမှု ရှိနေသေးသဖြင့် အချိန်မရွေး တိုက်ပွဲဖြစ်ပွားလာမည်ကို ဒေသခံများက စိုးရိမ်နေကြောင်း ဒေသခံများထံမှ သိရသည်။
