ထိုင်းနိုင်ငံ ချင်းမိုင်မြို့နယ် ဆာရဖီးမြို့တွင် ယနေ့ (အောက်တိုဘာ ၂၀)ရက် နံနက် ၉ နာရီအချိန်တွင် မြန်မာရွှေ့ပြောင်း အမျိုးသမီးတစ်ဦး မီးရထားတိုက်ပြီး သေဆုံးသွားကြောင်း သတင်းရရှိသည်။

ယနေ့ (အောက်တိုဘာ ၂၀)ရက် နံနက် ၉နာရီတွင် ချင်းမိုင်မြို့ နယ် ဆာရဖီးမြို့သို့ ရထားလာနေစဥ် ရွှေ့ပြောင်းအမျိုးသမီးသည် ခြုံပုတ်ထဲမှ ရုတ်တရက်ထွက်လာပြီး ရထားဖြတ်ကူးခဲ့သည်။

ထိုဖြတ်ကူးမှုကြောင့် ရထားတိုက်ခံရပြီး ခန္ဓာကိုယ် တစ်ခုလုံး ရစရာမရှိအောင်ပြားချပ်သွားပြီး ပွဲချင်းပြီး သေဆုံးသွားကြောင်း ထိုင်းသတင်းမီဒီယာများ ဖော်ပြချက် အရသိရသည်။

သေဆုံးသွားသူသည် အသက် ၂၇ နှစ်အရွယ် နန်းအေး ဆိုသူဖြစ်ပြီး၊ ၎င်း၏ ဆွေမျိုးများပြောပြချက်အရ သူမ၏ မိသားစုအတွင်းရေး ပြဿနာမရှိကြောင်း၊ အကြွေးကြောင့် ယခုလို ပြုလုပ်ခြင်း ဖြစ်နိုင်ကြောင်းလည်း ချင်းမိုင်ရဲတပ်ဖွဲ့ကို ပြောဆိုခဲ့သည်။

အလားတူ ပြီးခဲ့သည့် ၂၀၁၅ ခုနှစ်တွင်လည်း ချင်းမိုင်မြို့ ရှိ မြန်မာရွှေ့ပြောင်းအလုပ်သမားများကို တင်ဆောင်လာသည့် ကားတစ်စီး ရထားသံလမ်း ကူးဖြတ်ရာမှ တိုက်ခံရပြီး လူအများအပြားသေဆုံးရသည့် ဖြစ်စဉ်တခုလည်း ဖြစ်ပွားခဲ့သည်။