မြန်မာ-တရုတ်နယ်စပ်ဒေသ မူဆယ်မြို့နယ် စယ်လန့်ရွာတွင် စစ်ကောင်စီသည် ဆုတောင်းပြည့်တောင်ပေါ် စခန်းချမှနေပြီး လွိုင်တေးမိန်းတောင်ပေါ် ဘုရားသို့ လက်နက်ကြီးဖြင့် ၁၀ လုံးထက်မနည်း ပစ်ခတ်နေကြောင်း ဒေသခံတစ်ဦးက ပြောသည်။
ယနေ့ (အောက်တိုဘာလ ၁၉) ရက် နံနက်ပိုင်းအချိန်မှစပြီး ဆုတောင်းပြည့်တောင်ပေါ် ဘုရားနေမှနေ၍ စစ်ကောင်စီသည် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) ရှိရာ ယူဆသည့် လွိုင်တေးမိန်း တောင်ပေါ်ဘုရားသို့ လက်နက်ကြီးဖြင့် ၂ လုံးဖြင့် စတင်ပစ်ခတ်ခဲ့ကြောင်း စယ်လန့်ဒေသခံ တစ်ဦးက ပြောသည်။
“ ဆုတောင်းတောင်ပေါ်ကနေ လက်နက်ကြီး ၂ လုံးနဲ့ လွိုင်တေးမိန်းတောင်ပေါ်ကို စပစ်တယ်။ အဲ့အနီး တောင်ကုန်းကိုလည်း ပစ်တယ်။ လူထိခိုက်ဒဏ်ရာရတာတော့ မသိရသေးဘူး။ တစ်နေ့ကုန် နီးပါးလောက် ပစ်နေတာ အလုံး ၁၀ လုံးလောက် ရှိနေပြီ “ ဟု ၎င်း ဒေသခံတစ်ဦးက ပြောသည်။
စစ်ကောင်စီဘက်မှ ပစ်ခတ်သော လက်နက်ကြီးအသံသည် တစ်ဖက်သက်သာ ကြားနေရပြီး နှစ်ဖက်တပ်ဖွဲ့အကြား အပြန်အလှန် ပစ်ခတ်တာမျိုး မကြားရသေးကြောင်း ၎င်းက ဆက်ပြောသည်။
အဆိုပါ လက်နက်ကြီး ပစ်ခတ်သံများ ဆက်တိုက်ကြားနေရသောကြောင့် ယမန်နေ့ (အောက်တိုဘာ ၁၉)ရက်မှ ပြန်လည်ဖွင့်လှစ်သော စယ်လန့်ကျေးရွာ (အ.ထ.က) ကျောင်းမှ ကျောင်းသား/ကျောင်းသူများ ထိတ်လန့်မှုဖြစ်ပြီး ချက်ချင်း ကျောင်းပြန်ပိတ်ပြီး အိမ်သို့ ပြန်ရသည်။
“ လက်နက်ကြီးပစ်ခတ်သံ စကြားပြီဆိုတာနဲ့ မိဘတွေကလည်း ကျောင်းက ကလေးတွေ ပြေးကြိုလာရတယ်။ ကလေးတွေလည်း လန့်နေကြတာ။ စယ်လန့်ကကျောင်းနဲ့ အနီးနားက အပြင်ကျောင်းတွေလည်း ချက်ချင်း ပိတ်လိုက်ရတယ်။ တိုက်ပွဲပြန်ဖြစ်မှာကို စိုးရိမ်နေရတယ် “ ဟု စယ်လန့်ကျေးရွာနေ ဒေသခံအမျိုးသားတစ်ဦးက ပြောသည်။
တိုက်ပွဲကြောင့် ပိတ်ထားသည့် စယ်လန့်ကျေးရွာမှ စာသင်ကျောင်းကို ယမန့် (အောက်တိုဘာ ၁၉)ရက်မှစ၍ ပြန်လည်ဖွင့်လှစ်နိုင်သော်လည်း စစ်ကောင်စီဘက်မှ ပစ်ခတ်လိုက်သော လက်နက်ကြီးများကြောင့် ထိတ်လန်မှုဖြစ်ပြီး ပြန်လည်ပိတ်လိုက် ရသဖြင့် တိုက်ပွဲပြန်လည်ဖြစ်ပွားလာမည်ကို ဒေသခံများက စိုးရိမ်နေသည်။
ထို့အပြင် စယ်လန့်ကျေးရွာအတွင်း စစ်ကောင်စီနှင့် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တို့အကြား တိုက်ပွဲသည် (စက်တင်ဘာလ နောက်ဆုံးပတ်) ၌ နောက်ဆုံးဖြစ်ပွားခဲ့ပြီး ယနေ့မှာ စစ်ကောင်စီဘက်မှ လက်နက်ကြီးဖြင့် စတင်ပစ်ခတ်ခြင်း ပြုလုပ်လာလျက်ရှိသည်။
Leave a Comments