သျှမ်းပြည် မိုင်းရယ်မြို့နယ် ဟိုယကျေးရွာအုပ်စုအတွင်း ဈေးဆိုင်ဖွင့်လှစ်ထားသူများကို အမည်မသိ လူတစ်ခုမှ ခြိမ်းခြောက်ပြီး အခွန်ဆောင်းခိုင်းနေကြောင်း စုံစမ်းသိရသည်။
ပြီးခဲ့သည့် (အောက်တိုဘာလ ၁၇ ) ရက်မှစပြီး မိုင်းရယ်မြို့နယ် ဟိုယကျေးရွာအုပ်စုအတွင်း မျက်နှာဖုံးစွပ်နှင့် အရပ်ဝတ် (အမည်မသိ) လူတစ်စုမှ ဈေးဆိုင်ဖွင့်လှစ်ရောင်းချသူများကို တရုတ်စာဖြင့် ရေးသားထားသော စာအိတ်ပေး၍ တစ်ဆိုင်လျှင် ကျပ်သိန်း ၁၀၀ အခွန်ဆောင်ခိုင်းနေကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယနေ့ (အောက်တိုဘာလ ၁၉) ရက်ကို နောက်ဆုံးအနေဖြင့် Kpay မှတဆင့် လွှဲပေးရန် ပြောဆိုခဲ့ပြီး အဆိုပါ စာအိတ်ထဲ၌ ကျည်ဆံတစ်ထောင့်ထည့်၍ ခြိမ်းခြောက်ထားသည်။
“ စာအိတ်လာပေးတဲ့သူတွေက သျှမ်းစကားပဲ ပြောကြတယ်။ အရပ်ဝတ်နဲ့ မျက်နှာဖုံးလည်း စွပ်ထားတယ်။ ဘယ်နှစ်ယောက် တောင်မှ လာကြတာလဲတော့ မသိဘူး။ လူများတယ်။ ဈေးဆိုင်ဖွင့်လှစ်ထားတဲ့သူ၊ ကုန်စုံဆိုင်တွေဆီ ဝင်လာပြီး စာအိတ်လာပေးတယ်။ ပြီးတော့ တစ်ဆိုင်ကို အခွန်ခဆိုပြီး ကျပ်သိန်း ၁၀၀ လွှဲပေးဖို့ ပြောတယ်။ တချို့တွေလည်း လွှဲပေးနေတယ် “ ဟု ၎င်းဒေသခံ အမျိုးသားတစ်ဦးက ပြောသည်။
လက်ရှိအချိန်ထိ မည်သည့် အဖွဲ့အစည့် လက်ချက်ဖြစ်ကြောင်း၊ မည်သူဖြစ်ကြောင်းကို မသိရှိရဘဲ တချို့ဒေသခံများက ကြောက်ရွံ့၍ ပိုက်ဆံ လွှဲပေးနေရကြောင်း ၎င်းကဆိုသည်။
တစ်ဖက်တွင် လားရှိုးမြို့မှာ မကြာခဏ ဗုံးပေါက်မှု ဖြစ်ပွားနေသောကြောင့် ထိုဗုံးပေါက်ကွဲမှုကို အခွင့်အရေး ယူပြီး ပြည်သူများကို ခြိမ်းခြောက် ဓားပြတိုက်နေကြောင်းလည်း ဒေသခံတစ်ဦးက ထပ်လောင်းပြောသည်။
“ လားရှိုးမြို့မှာလည်း ခဏခဏ ဗုံးပေါက်ကွဲနေတာလေ။ အဲ့ဒါကို အခွင့်အရေး ယူပြီး ခြိမ်းခြောက် ဓားပြတိုက်နေတာ။ ပိုက်ဆံမလွှဲပေးရင် ဗုံးနဲ့လာပစ်မယ် ဘာညာခြိမ်းခြောက်ပြီး သူတို့ပိုက်ဆံ ရအောင် အမျိုးမျိုး လုပ်နေတာပဲ။ လက်နက်ကိုင်တပ်ဖွဲ့ ကနေ လာကောက်တာတော့ မဖြစ်နိုင်ဘူး “ ဟု ၎င်းက ယခုလို ပြောသည်။
ထို့အပြင် လားရှိုးမြို့နယ်အတွင်း စစ်ကောင်စီတပ်အပြင် ပြည်သူ့စစ်တပ်ဖွဲ့များ၊ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA)၊ တအာင်း (ပလောင်) အမျိုးသားလွတ်မြောက်ရေး တပ်မတော် (TNLA)နှင့် ကချင်လွတ်လပ်ရေးတပ်မတော် (KIA) တို့လှုပ်ရှားနေလျက်ရှိသည်။
လက်နက်ကိုင်တပ်ဖွဲ့များအနေဖြင့် ဒေသအတွင်း ဖြစ်ပျက်နေသည့် ပြသာနာများ၊ ငွေလိမ်လည်မှုများကို စိစစ်၍ အရေးယူဆောင်ပေးစေလိုကြောင်းလည်း ဒေသခံများက တောင်းဆိုထားသည်။
Leave a Comments