မြန်မာ-တရုတ်နယ်စပ်ဒေသ မူဆယ်မြို့အတွင်း ဗမာပြည်သူ့လွတ်မြောက်ရေးတပ်တော် (BPLA) နာမည် အသုံးပြုပြီး ဒေသအတွင်း ငွေလိမ်လည်မှု ပြုလုပ်နေကြောင်း စုံစမ်းသိရသည်။
ယခုရက်ပိုင်း လူမှုကွန်ရက်စာမျက်နှာပေါ်မှ ပြန့်နှံ့လာနေသည့် BPLA အဖွဲ့အစည်း နာမည်နှင့်အတူ မူဆယ်မြို့ရှိ စီးပွားလုပ်ငန်းလုပ်ရှင်များအနေထံ BPLA တပ်မဟာ (၂) အား အခွန်ငွေပေးဆောင်ခြင်းမရှိဘဲ လုပ်ငန်းဆက်လက် လုပ်ကိုင်မည်ဆိုပါက အရေးယူမည်ဟု ရေးသားဖြန့်ချိနေသည်။
အဆိုပါ အခွန်ဆောင်ခိုင်းခြင်း စာစောင်နှင့်ပတ်သက်ပြီး မဟုတ်မှန်ကြောင်း ဗမာပြည်သူ့လွတ်မြောက်ရေး တပ်တော် (BPLA) မှ တာဝန်ခံ လင်းလင်းက သျှမ်းသံတော်ဆင့်ကို ယခုလို ပြောဆိုထားသည်။
“ လက်ရှိ အခွန်ကောက်ခံနေတဲ့စာဆိုပြီးပျံ့နှံ့နေတဲ့ လူမှုကွန်ရက်ပေါ်ကပုံမှာဆိုတပ်မတော်လို့သုံးထားပါတယ်။ ကျနော်တို့BPLAရဲ့ထုတ်ပြန်ကြေညာချက်တွေကိုပြန်လေ့လာကြည့်ပါ။ ကျနော်တို့က တပ်ရဲ့နာမည်ကိုသုံးတဲ့အခါ ဗမာပြည်သူ့လွတ်မြောက်ရေးတပ်တော် (BPLA)လို့ပဲသုံးပါတယ်။ ဒါတွေကြည့်ခြင်းအားဖြင့်လည်း တပ်ကိုနာမည်ဖျက်ဖို့ အလွဲသုံးစားလုပ်နေတယ်လို့ပဲပြောချင်ပါတယ် “ ဟု တာဝန်ခံလင်းလင်းက ပြောသည်။
BPLA အနေဖြင့် မူဆယ်မြို့တွင် အခြေချထားခြင်း မရှိသလို လှုပ်ရှားမှုဝာာဝန်မပေးထားကြောင်း၊ MNDAA (၆၁၁) တပ်မဟာ၏ အမိန့်ပေးကွပ်ကဲမှု အောက်မှတဆင့် စစ်ရေးလှုပ်ရှားနေသဖြင့် ပြည်သူလူထုထံ အခွန်ကောက်ခံနေခြင်း မရှိကြောင်း ၎င်းကဆက်ပြောသည်။
ထို့အပြင် ပြည်သူများအနေဖြင့် BPLA နာမည်နှင့်တကွ အခွန်ဆောင်ခိုင်းခြင်း ငွေလိမ်လည်မှုကြုံတွေ့လာပါက BPLA အခွန်ကောက်မှု မရှိခြင်း ပြောဆိုဖို့လိုအပ်သလို၊ ငွေကြေးတောင်းခံလာပါက ပေးဆောင်ဖို့မလိုအပ်ကြောင်း ထပ်လောင်းပြောသည်။
သျှမ်းပြည် မူဆယ်မြို့နယ်တွင် တိုင်းရင်းသားလက်နက်ကိုင်တပ်ဖွဲ့ဖြစ်ကြသည့် ရှမ်းပြည် တိုးတက်ရေးပါတီ၊ ရှမ်းပြည်တပ်မတော် (SSPP/SSA)၊ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA)၊ ကချင်လွတ်လပ်ရေးတပ်မတော် (KIA) တို့ နှစ်စဥ်နှစ်တိုင်း ဆက်ကြေး ကောက်ယူမှုရှိသည်။
စစ်အာဏာသိမ်းပြီးနောက်ပိုင်းမှာ ပြည်သူ့ကာကွယ်ရေးတပ် (PDF) များ၏ အမည်များကို အသုံးပြုကာ ဆက်ကြေး လိမ်ညာကောက်ယူမှုများလည်း တွေ့သဖြင့် ပြည်သူများက စိုးရိမ်ပူပန်မှုဖြင့် နေရကြောင်း မူဆယ်မြို့ ဒေသခံများက ပြောသည်။
“ အခုနောက်ပိုင်း ကားလမ်းမဘေးမှာ ဖွင့်ထားတဲ့ဆိုင်တွေ တော်တော်ခံရတယ်။ ဒီလိုလူကိုယ်တိုင်ရေးတဲ့ လက်ရေးတွေနဲ့ Viber တွေမှာ လိုက်လိုက်ပို့တာ ခံရတယ်။ ခေတ်အခြေအနေကလည်း မကောင်းဘူး။ ဝင်ငွေလည်း မရှိဘူး။ မပေးရင်လည်း ကြောက်ရ၊ ပေးရင်လည်း ကြောက်ရနဲ့ ဘယ်တပ်ဖွဲ့ဖြစ်မှန်းတောင် မသိတော့ဘူး “ မူဆယ်မြို့ဒေသခံ အသက် ၃၀ ကျော် အမျိုးသားတစ်ဦးက ပြောသည်
ထို့ကြောင့် အဖွဲ့အစည်းနာမည်အသုံးပြုကာ ငွေလိမ်လည်မှု ပြုလုပ်ပါက BPLA ၏ တရားဝင်လူမှုကွန်ယက် စာမျက်နှာ (Facebook Page) ထံ စုံစမ်းဆက်သွယ်မေးမြန်းနိုင်ကြောင်း သိရသည်။
