မြန်မာ-ထိုင်းနယ်စပ်ဒေသ တာချီလိတ်မြို့နယ် ဖန်မင်ကျေးရွာအုပ်စုရှိ ရာဘာခြံတစ်ခုထဲတွင် လင်မယား ၂ ဦး စကားများရန်ဖြစ်ရာမှ ဇနီးဖြစ်သူက ၎င်း၏ခင်ပွန်းကို ဓားဖြင့်ထိုးသတ်ခဲ့ကြောင်း စုံစမ်းသိရသည်။
ဖြစ်စဉ်မှာ ပြီးခဲ့သည့် အောက်တိုဘာဘ ၁၅ ရက် ည ၈ ဝန်းကျင်တွင် ဖန်မင်ကျေးရွာအုပ်စုရှိ ရာဘာခြံတစ်ခုထဲ၌ လင်မယား ၂ ဦးသည် စကားများပြီး ရန်ဖြစ်နေစဉ် ခင်ပွန်းဖြစ်သူမှ လက်သီးဖြင့် ၎င်းဇနီးအား စတင် ထိုးနှိက်ခဲ့သည်။
ထို့နောက် အမျိုးသမီးသည် ပြန်လည်ခုခံသည့် အနေဖြင့် အနီးရှိ ဓားဖြင့်ပြန်လည်ထိုးခဲ့သဖြင့် ၎င်း သေဆုံးသွားခဲ့ကြောင်း ၎င်းကိုသွားရောက်ကူညီခဲ့သည့် လူမှုကူညီရေးအသင်းမှ တာဝန်ခံတစ်ဦးက သျှမ်းသံတော်ဆင့်ကို ပြောသည်။
“ လင်မယားစကားများကြတာ ယောက်ျားဖြစ်သူက သူ့မိန်းမကို လိုက်ထိုးတာ။ အဲ့မှာ ထိုးဖို့ပြေးလာတာ သူ့ယောင်္ကျားကို ဓားနဲ့လှမ်းထောက် လိုက်တာ။ တစ်ချက်ထဲနဲ့ လှဲကျသွားတယ် “ ၎င်း တာဝန်ခံတစ်ဦးက ပြောသည်။
အဆိုပါ သေဆုံးသွားခဲ့ရသူ အမျိုးသားအား တာချီလိတ်ရင်ခွဲရုံသို့ ပို့ဆောင်ပေးခဲ့ပြီး လူသတ်မှု ကျူးလွန်မိသူ အမျိုးသမီးဖြစ်သူကိုလည်း သက်ဆိုင်ရာ ရဲတပ်ဖွဲ့မှ ဖမ်းဆီးသွားခဲ့ကြောင်း သိရသည်။
သေသုံးသွားသည့် အမျိုးသားတစ်ဦးသည် ၎င်းဇနီးဖြစ်သူနှင့် စကားများရန်မဖြစ်ပွားခင်၌ အရက်သောက်ကာ မူးနေကြောင်း သိရသည်။
စစ်တပ်ကအာဏာသိမ်းပြီးနောက်ပိုင်း ပြည်သူများသည် စီးပွားရေးလုပ်ကိုင်စားသောက်မှု ခက်ခဲလာပြီး၊ မိသားစုဝင်ငွေလည်း ယခင်ကထက် လျော့နည်းကာ တဘက်မှာလည်းကုန်စျေးနှုန်း က အဆမတန်မြင့်တက်နေသဖြင့် လူမှုရေးပြဿနာများ မကြာခဏ ဖြစ်ပွားလာကြသည်။
ထို အိမ်တွင်းရေး၊ လူမှုရေးပြဿနာကြောင့် အိမ်တွင်ရေး ရန်ဖြစ်ကာ သေဆုံးသည့်အထိ ဖြစ်ပွားလာကြောင်း တာချီလိတ်ပြည်သူများကပြောသည်။
အလားတူ အောက်တိုဘာလ ၁၁ ရက်တွင်လည်း မိုင်းဆတ်မြို့ ဟိုနားကျေးရွာအတွင်း နေထိုင်ကြသည့် လင်မယားနှစ်ဦးသည် ရန်ဖြစ်စကားများရာမှ ခင်ပွန်းဖြစ်သူ ၎င်း၏ဇနီးအား သတ်ဖြင့် ခုတ်သတ်ပြီး အလောင်းကို ရေချောင်းထဲ ပစ်ချခဲ့သည့်ဖြစ်စဉ်တစ်ခုလည်း ဖြစ်ပွားခဲ့သေးသည်။
