Friday, June 14, 2024

လားရှိုးမြို့တွင် ယာဥ်ထိန်းရဲများ ဆိုင်ကယ်သိမ်းသည်အထိ ဖမ်းဆီးမှု ကြမ်းနေ

Must read

သျှမ်းပြည် လားရှိုးမြို့တွင် ယာဉ်စည်းကမ်း လမ်းစည်းကမ်းများ ပိုမိုတင်းကျပ်လာပြီး ဆိုင်ကယ်များကို ဖမ်းဆီးစစ်ဆေးမှု ကြမ်းနေကြောင်း သတင်းရရှိသည်။

လားရှိုး ယာဥ်ထိန်းရဲ စစ်ဆေးမှု

အောက်တိုဘာလ ၁၃ ရက် နေ့လည်ပိုင်းတွင် ယာဉ်ထိန်းများမှ ယာဉ်စည်းကမ်း လမ်းစည်းကမ်းနှင့် ပတ်သက်ပြီး တင်းကျပ်စစ်ဆေးမည်ဆိုသည်ကို လားရှိုးမြို့ တက္ကသိုလ်ရှေ့တွင် ကြေညာခဲ့ပြီး ရပ်ကွက်များ၊ လမ်းကြားများထဲထိ ဝင်ရောက်ကြေညာမှုမျိုး မရှိကြောင်း ဒေသခံတစ်ဦး က သျှမ်းသံတော်ဆင့်ကို ပြောသည်။

ယခုကာလသည် အဝေးသင်တက္ကသိုလ် စာမေးပွဲဖြေဆိုသည့် အချိန်ဖြစ်ပြီး၊ လားရှိုးမြို့သို့ အခြားမြို့နယ်အသီးသီးမှ ကျောင်းသား/သူများ လာရောက်ကျောင်းတက်နေသော အချိန်ဖြစ်သည်။

ထိုကျောင်းလာတက်သည့်သူများသည် ယာဥ်မောင်းလိုင်စင်မရှိသည့်အပြင် ဆိုင်ကယ်လိုင်စင်လည်း မရှိကြကြောင်း၊ ဆိုင်ကယ်မောင်းနှင်သည့်အခါတွင် ဆိုင်ကယ်ဦးထုပ်ဆောင်းခြင်း မပြုလုပ်ပါက ဒဏ်ကြေးငွေ ကောက်ယူခဲ့ပြီး ဆိုင်ကယ် နံပါတ်ပြားမပါလျှင် ဆိုင်ကယ် သိမ်းဆည်းသည်အထိ ပြုလုပ်ကြောင်း လားရှိုးမြို့တွင် အဝေးသင်တက္ကသိုလ်တက်နေသည့် ကျောင်းသူတစ်ဦးက သျှမ်းသံတော်ဆင့်ကိုပြောသည်။

လားရှိုး ယာဥ်ထိန်းရဲ စစ်ဆေးမှု တင်းကြပ်

“ဖမ်းတာက နံပါတ်ပြားမပါတဲ့ဆိုင်ကယ်တွေဆိုရင် အပိုင်သိမ်းခံရတာတွေ ရှိတယ်။ ဒဏ်‌ငွေတွေကိုတော့ ၃သောင်းက စတာပေါ့နော်၊ အကြောင်းအရာ ဘယ်နှမျိုးဆိုပြီး အဲ့လိုမျိုး ဒဏ်ငွေရိုက်တာရှိတယ်၊ ဒါတွေက ဒဏ်ငွေရိုက်ပြီးရင်တော့ ပြန်လွှတ်တယ်” ဟု ၎င်းက ဆိုသည်။

အဝေးသင်တက္ကသိုလ် တက်ရောက်နေသည့် ကျောင်းသားကျောင်းသူ အများစုသည် နယ်မှ လာရောက် ကျောင်းတက်သူများဖြစ်ကြပြီး ကျောင်းနှင့်ဝေးသော အဆောင်များတွင် ငှားရမ်းနေသူအတွက် အစားအသောက်နှင့် သွားလာရေးအတွက် အခက်အခဲများရှိကြောင်း အဝေးသင်တက္ကသိုလ် ကျောင်းသူတစ်ဦးက ပြောသည်။

“ကျမတို့လို နယ်ကလာပြီး ကျောင်းလာတက်တာတို့ဖြစ်ဖြစ်၊ သင်တန်းလာတက်တာတို့ဖြစ်ဖြစ် ဆိုရင် အရမ်းအခက်အခဲ ဖြစ်တယ်ပေါ့နော်။ ဆိုင်ကယ်မောင်းဖို့ ယာဉ်မောင်းလိုင်စင် တကူးတက သွားလုပ်တာတို့ဆို အခက်အခဲတွေဖြစ်တယ်၊ အဲ့ဒီယာဉ်မောင်းလိုင်စင်နဲ့ ဆိုင်ကယ်လိုင်စင်ကျတော့ အခက်အခဲဖြစ်တယ်”ဟု သူက ဆက်ပြောသည်။

ယာဉ်စည်းကမ်း လမ်းစည်းကမ်းကို အောက်တိုဘာ ၁၄ ရက်မှ စတင်စစ်ဆေးပြီး ဆိုင်ကယ်မောင်းလျှင် မောင်းသူ၏ ယာဉ်မောင်းလိုင်စင်၊ ဆိုင်ကယ်လိုင်စင်၊ ဆိုင်ကယ်ဦးထုပ်၊ ယာဉ်နံပါတ်ပြား စသည့်အကြောင်းအရာတွေ ယခင်ကထက် ပိုများပြီး ဖမ်းတာကြောင့် အဖမ်းခံရသူ၊ ဒဏ်ငွေပေးဆောင်ရသူ များနေကြောင်း လားရှိုးမြို့ခံ အမျိုးသမီးတစ်ဦးက ပြောသည်။

စစ်အာဏာသိမ်းပြီးနောက် လားရှိုးမြို့ ယာဥ်ထိန်းရဲတပ်ဖွဲ့သည် နည်းမျိုးစုံသုံးကာ ယာဥ်စည်းကမ်း၊ လမ်းစည်းကမ်းကို ပိုမိုတင်းကျပ်လာပြီး စည်းကမ်းချိုးဖောက်သူများကို ဒဏ်ငွေအမြောက်အမြား ကောက်ယူကြောင်း သိရသည်။

လားရှိုးမြို့တွင် နေ့စဥ်နီးပါး ယာဥ်တိုက်မှု ဖြစ်ပွားပြီး အသက်သေဆုံးသည်အထိ ဖြစ်ပွားကြောင်း သိရသည်။

Leave a Comments

- Advertisement -spot_img

Latest article