သျှမ်းပြည် လားရှိုးခရိုင်၊ သိန္နီမြို့နယ်အတွင်း ကချင်လွတ်လပ်ရေး တပ်မတော် (KIA) မှ ဆက်ကြေးကောက်ယူမှုကို မပေးဆောင်နိုင်သည့် ကားများ သိမ်းဆည်းခံရကြောင်း စုံစမ်းသိရသည်။
ယမန်နေ့ (အောက်တိုဘာလ ၁၅) ရက် မွန်းလွဲပိုင်း ၂ နာရီကျော်တွင် သိန္နီမြို့နယ်၊ စယ်အူကျေးရွာ အုပ်စု ဟိုမိန်းကျေးရွာ (ဝၢၼ်ႈႁူဝ်မိူင်း) နှင့် နားခေးကျေးရွာ (ဝၢၼ်ႈၼႃးၶိူဝ်း)ရှိ လမ်းမကြီးဘေး၌ KIA တပ်ဖွဲ့မှ ကားသမားများထံမှ ဆက်ကြေး တောင်းယူကောက်ခံနေကြောင်း ဒေသခံ အမျိုးသား တစ်ဦး က သျှမ်းသံတော်ဆင့်ကို ပြောသည်။
“လမ်းဘေးမှာ လက်နက်အပြည့်အစုံနဲ့ လာရပ်ပြီး ဆက်ကြေးတောင်းကြတာ၊ မပေးနိုင်တဲ့ကားတွေကို သော့သိမ်းပြီး ကားကိုသိမ်းလိုက်တာပေါ့၊ မနေ့က သူတို့ ဆက်ကြေးမပေးနိုင်တဲ့ ကုန်တင်ကားကြီး (၃) စီး သော့သိမ်းခံလိုက်ရလို့ လမ်းဘေးမှာပဲ ဒီအတိုင်းရပ်နားထားရတယ်၊ ဒီနေ့မနက်အထိ အဲ့ကားတွေက မရွှေ့ရသေးဘူး” ဟု လုံခြုံရေး အရအမည်ဖော်လိုသည့် အမျိုးသား တစ်ဦးက ပြောသည်။
KIA တပ်မှ ဆက်ကြေးကောက်ယူသည့် ပမာဏသည် ကုန်တင်ကားကြီး တစ်စီးလျှင် ဘီးလိမ့်ခွန် တစ်နှစ်စာ မြန်မာငွေကျပ် (၁၀) သိန်း နှင့် ၊ တင်လာသည့် ကုန်အမျိုးအစားပေါ်မူတည်ကာ နောက်ထပ် ကုန်တင်ခ ဆက်ကြေးအဖြစ် တစ်ခေါက်စာကို မြန်မာငွေကျပ် သိန်း (၂၀) မှ (၈၀) အထိ တောင်းယူကြောင်း ဒေသခံ ကားသများထံမှ သိရသည်။
လက်ရှိ သော့သိမ်းခံရသည့် ကုန်တင်ကား (၃) စီးသည့် (၁၂) ဘီး အမျိုးအစား ကုန်တင်ကား ဖြစ်ပြီး ဒေသအတွင်း၌ လက်နက်ကိုင်တပ်ဖွဲ့များလည်း စုံသည့်အတွက် ထိတွေ့ပစ်ခတ်မှုဖြစ်ပွားမှာကို စိုးရိမ်ရကြောင်းလည်း အထက်ပါ အမျိုးသားကဆက်ပြောသည်။
“ပိုက်ဆံမပေးမချင်း ဒီကနေကားတွေလည်း မရွှေ့ရဘူးဆိုပြီး သော့ပိတ်သိမ်းသွားတော့ ကားကလည်း မရွှေ့ရသေးဘူး၊ နောက်တခု စိုးရိမ်ရတာက ဒီဒေသမှာ လက်နက်ကိုင် အဖွဲ့အစည်းတွေလည်း စုံတော့ ထိတွေ့ပစ်ခတ်မှုဖြစ်ရင်လည်း ဒေသခံတွေပဲ ဒုက္ခရောက်မှာ၊ ဒါကြောင့် သူတို့အခုလို ရပ်ရွာထဲ လာနေပြီး ဆက်ကြေးကတောက်နေတာကို သက်ဆိုင်ရာ ဒေသအတွင်းအာဏာပိုင်တွေက ထိန်းသိမ်း ပြောဆိုနိုင်ရင် ကောင်းတာပေါ့” ဟု အထက်ပါ အမျိုးသားက ဆက်ပြောသည်။
ယင်းကဲ့သို့ သိန္နီမြို့နယ်အတွင်း ဆက်ကြေးကောက်ခြင်း ကိစ္စနှင့် ပတ်သက်ပြီး ကချင်လွတ်လပ်ရေး တပ်မတော် (KIA) ထံသို့ ဆက်သွယ်မေးမြန်းခဲ့ရာ ဖြစ်စဥ် အသေးစိတ်ကို မသိရကြောင်း သျှမ်းသံတော်ဆင့် ကို ဖြေကြားခဲ့ဖူးသည်။
“ဖြစ်စဥ် အသေးစိတ်ကို ကျနော်မသိရဘူး။ အခွန်ကောက်တာက ကျနော်တို့ လှုပ်ရှားတဲ့ နေရာအတွင်း ကျနော်တို့ မြေပြင် အရာရှိတွေ လုပ်ဆောင်နေတာတော့ ရှိပါတယ်။ အသေးစိတ်ကတော့ ကျနော်တို့ ဆီမရောက်လာသေးဘူး” ဟု ဗိုလ်မှူးကြီး နော်ဘူက သျှမ်းသံဝောာ်ဆင့်ကို ဖြေကြားခဲ့သည်။
ပြီးခဲ့သည့် အောက်တိုဘာလ ၆ ရက်နေ့တွင်လည်း သိန္နီမြို့နယ်၊ ကွန်ကောက်ကျေးရွာအုပ်စုရှိ ကွန်ကောက်ကျေးရွာ ဘုန်းကြီးကျောင်းရှေ့တွင် စခန်းချပြီး ကုန်တင်ကားများထံမှ ဆက်ကြေး ကောက်ယူမှုလည်း ရှိခဲ့သည်။
အဆိုပါ KIA ဆက်ကြေးကောက်ယူနေသည့် လမ်းပိုင်းသည် သိန္နီ- ကွန်လုံ- ချင်းရွှေဟော် ဆက်သွယ် ထားသည့် လမ်းဖြစ်ပြီး၊ ချင်းရွှေဟော်သည် တရုတ်နယ်စပ်မြို့ဖြစ်ပြီး နယ်စပ်ကုန်သွယ်ရေးဇုံ ရှိသည့်မြို့ဖြစ်ကာ ကုန်တင်ကားများ သွားလာဖြတ်သန်းသည့် လမ်းပိုင်းလည်းဖြစ်သည်။
ပြီးခဲသည့် အောက်တိုဘာလ ပထမပတ် အတွင်း၌ သိန္နီမြို့နယ်အတွင်း စစ်ကောင်စီ နှင့် KIA တပ်တို့ လက်နက်ကြီးဖြင့် အချင်းချင်း ပစ်ခတ်တိုက်ခိုက်မှု ရှိခဲ့ရာ ကွန်ကောက်ဘုန်းကြီးကျောင်း အပါအဝင်၊ လူနေအိမ်များ၊ အရပ်သားများက လက်နက်ကြီးထိမှန်ခဲ့သည်။
Leave a Comments