တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးခြင်း (၈) နှစ် တိုင် ကြာမြင့်ခဲ့သော်လည်း အကောင်အထည်မဖော်နိုင်ခဲ့ကြောင်း သျှမ်းပြည် ပြန်လည် ထူထောင်ရေး ကောင်စီ (RCSS/SSA) ခေါင်းဆောင် ဗိုလ်ချုပ်ကြီး ယွက်စစ်က ပြောကြားခဲ့သည်။

အောက်တိုဘာလ (၁၅) ရက်နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်း ဗဟိုဌာန (MICC II) ခန်းမ၌ ကျင်းပခဲ့သည့် NCA (၈) နှစ်ပြည့် အခမ်းအနားတွင် ပြောကြာခဲ့ပြီး ယင်းကဲ့သို့ မလုပ်ဆောင် နိုင်မှုကြောင့် ပြည်ထောင်စုကြီးအတွက် များစွာနှမျောမိကြောင်း ဗိုလ်ချုပ်ကြီး ယွက်စစ် က ဆက်ပြောသည်။

“တွေ့ဆုံဆွေးနွေးလမ်းကြောင်းမှ တစ်ဆင့် တိုင်းပြည်ရဲ့ အုပ်ချုပ်ရေးစနစ် ပြုပြင်ပြောင်းလဲရန် ကြိုးပမ်းခဲ့သော်လည်း အလျှော့အတင်း မလုပ်နိုင်ခဲ့သဖြင့် NCA အကောင်အထည် ဖော်ဆောင်ခြင်း လုပ်ငန်း ရှေ့မတိုးနိုင် ဖြစ်ခဲ့ရပါတယ်။ (၈) နှစ် တာကာလကြာမြင့်သည့်တိုင် NCA ကို အကောင်အထည် မဖော်နိုင်ခဲ့လို့ ပြည်ထောင်စုကြီးအတွက် များစွာနှမျောမိပါတယ်” ဟု ဗိုလ်ချုပ်ကြီးယွက်စစ်က ပြောခဲ့သည်။

ထို့အပြင် ၂၀၂၀ ပြည့်နှစ် ရွေးကောက်ပွဲဆိုင်ရာ နိုင်ငံရေးအကျပ်အတည်းများ ဖြစ်ပေါ် လာခဲ့ရာ ငြိမ်းချမ်းရေး အတွက် အချိန်များ အလဟဿ ဖြစ်ခဲ့ရကြောင်းလည်း ယခုလို ဆက်လက်ပြောဆို ထားသည်။

“၂၀၂၀ ပြည့်နှစ် ရွေးကောက်ပွဲဆိုင်ရာ နိုင်ငံရေးအကျပ်အတည်းများ ဖြစ်ပေါ်လာခဲ့ရာ နိုင်ငံရေး ပြဿနာကို နိုင်ငံရေးနည်းလမ်းဖြင့် မဖြေရှင်းနိုင်ခဲ့ကြတဲ့အတွက် NCA အကောင်အထည် ဖော်မှုသည် လည်း ရပ်တန့်သွားခဲ့ရပါတယ်။ နိုင်ငံ့အရေး၊ ငြိမ်းချမ်းရေးအတွက်အချိန်တွေ အလဟဿ ဖြစ်ခဲ့ရပါ တယ်။” ဟု ဗိုလ်ချုပ်ကြီး ယွက်စစ်က ဆက်လက်ပြောဆိုခဲ့သည်။

လက်ရှိကာလသည် နိုင်ငံရေးအကျပ်အတည်း ရင်ဆိုင်နေရသည့်အပြင် စီးပွားရေးနှင့် လူမှုရေး ကဏ္ဍများမှာလည်း ဘက်ပေါင်းစုံအခက်အခဲများကို ပြည်သူလူထုတစ်ရပ်လုံး ဒုက္ခများစွာ ရင်ဆိုင်နေရသည့် အတွက် ဝိုင်းဝန်းပြီး အဖြေရှာရမည့်အချိန်ရောက်ပြီလို့ တိုက်တွန်းနှိုးဆော်လို သည့် အကြောင်းလည်း ပြောဆိုထားသည်။

NCA (၈) နှစ်ပြည့် အခမ်းအနားကို NCA လက်မှတ်ရေးထိုးထားသည့် ကရင်ငြိမ်းချမ်းရေးကောင်စီ (KNU/ KNLA-PC)၊ ဒီမိုကရေစီအကျိုးပြု ကရင်တပ်မတော် (DKBA)၊ သျှမ်းပြည်ပြန်လည် ထူထောင်ရေး ကောင်စီ (RCSS)၊ ပအိုဝ်း အမျိုးသား လွတ်မြောက်ရေး အဖွဲ့ချုပ် (PNLO)၊ ရခိုင်ပြည်လွတ်မြောက်ရေး ပါတီ (ALP) နှင့် လားဟူဒီမိုကရက်တစ်အစည်းအရုံး (LDU) တို့က တက်ရောက်ခဲ့သည်။

NCA လက်မှတ်ရေးထိုးထားသည့်ကရင်အမျိုးသားအစည်းအရုံး (KNU)၊ ချင်းအမျိုးသားတပ်ဦး(CNF) နှင့် မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) တို့က တက်ရောက်မည် မဟုတ်ကြောင်း ထုတ်ပြန်ခဲ့သော်လည်း KNU ဥက္ကဋ္ဌဟောင်း ဗိုလ်ချုပ်ကြီး မူတူးစေးဖိုး ၊ ABSDF ဒုဥက္ကဋ္ဌ ဦးမျိုးဝင်းတို့သည် အခမ်းအနားကို တက်ရောက်ခဲ့ကြောင်း သိရသည်။

NCA (၈)နှစ်မြောက် မကျင်းပမည် ရက်အနည်းငယ် အောက်တိုဘာ ၉ရက်တွင် ဗုံးကြဲတိုက်ခိုက်ခံရမှု ကြောင့် လိုင်ဇာမြို့အနီးရှိ မုန် လိုင်ခက် (Munglai Hkyet) စစ်ရှောင်စခန်းမှ အရွယ်မရောက်သေးသည့် ကလေးငယ် (၁၁) ဦး၊ အမျိုးသမီး (၁၅) ဦးနှင့် အမျိုးသား (၃) ဦး စုစုပေါင်း အရပ်သားပြည်သူ (၂၉) ဦး သေဆုံးခဲ့ရပြီး ပြင်းထန် ထိခိုက်ဒဏ်ရာရရှိခဲ့သူ (၅၇) ဦးအထိ ရှိခဲ့ပြီး လိုင်ဇာပြည်သူ့ဆေးရုံသို့ ပို့ဆောင်ကုသမှုခံယူခဲ့ရသည်။

လက်ရှိအချိန်ထိ NCA စာချုပ်တွင် လက်မှတ်ရေးထိုးထားသည့် လက်နက်ကိုင် အဖွဲ့အစည်း (၁၀) ဖွဲ့ ရှိနေပြီး၊ လက်မှတ်မရေးထိုးရသေးသည့် တိုင်းရင်းသားအဖွဲ့အစည်းများ NCA တွင် ပါဝင်လက်မှတ် ရေးထိုးရန် ဖိတ်ခေါ်ကြောင်း အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က NCA (၈) နှစ်ပြည့် အခမ်းအနား၌ ပြောကြားခဲ့သည်။

(၈) နှစ်မြောက် NCA အခမ်းအနားကို ကျင်းပပြုလုပ်နေသည့် ကာလအတွင်း စစ်ကောင်စီတပ်ဖွဲ့သည် သျှမ်းပြည် အခြေစိုက် တိုင်းရင်းသား လက်နက်ကိုင်တပ်ဖွဲ့များ ဖြစ်ကြသည့် ကိုးကန့်တပ်ဖွဲ့ (MNDAA) နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ နှင့်ထိတွေ့တိုက်ပွဲ ဖြစ်ပွား နေကြောင်း မြေပြင် သတင်းပေးပို့ချက်အရ သိရသည်။