သျှမ်းပြည် ညောင်ရွှေမြို့နယ် အင်းလေးဒေသ လင်းကင်းကျေးရွာအုပ်စု ကံရွာကျေးရွာမှ လောင်းကစားဝိုင်းအနီး ဗုံးကွဲမှုကြောင့် ဖမ်းဆီးခံရသည့် ဒေသခံ ၆ ဦးထဲမှ ၄ ဦးပြန်လည်လွှတ်မြောက်လာပြီး၊ ၂ ဦးမှာ အဆက်အသွယ်ပြတ်နေကြောင်း စုံစမ်းသိရသည်။
ပြီးခဲ့သည့် အောက်တိုဘာ ၁၂ ရက် အင်းလေးဒေသ ကံရွာရှိ လောင်းကစားဝိုင်းအနီးတွင် ဗုံးပေါက်ကွဲမှုဟုဆိုပြီး အမျိုးသား ၆ဦးကို စွပ်စွဲကာ စစ်ကောင်စီ က ဖမ်းဆီးသွားခဲ့သည်။
ထိုထဲတွင် အင်းလေးဒေသအရှေ့ဘက်ရှိ ပေါနော်ရွာမှ ဒေသခံ ၂ ဦးနှင့် သပြေပင်ရွာမှ လူငယ် ၄ ဦးတို့ကို စွပ်စွဲပြီး စစ်ကောင်စီက ဖမ်းဆီးသွားခဲ့ကြောင်း ဒေသခံအမျိုးသမီးတစ်ဦးက ပြောသည်။
အဆိုပါ ဖမ်းဆီးသွားခဲ့ပြီးနောက် သပြေပင်ရွာမှ လူငယ် ၄ ဦးကို အောက်တိုဘာလ ၁၃ ရက်တွင် ပြန်လွှတ်လာပြီး ကျန်သည့် ဒေသခံ ၂ ဦးသည် ယနေ့ အချိန်ထိ သတင်းအချက်အလက်မရဘဲ ပျောက်ဆုံးနေကြောင်း ၎င်းကဆက်ပြောသည်။
“ ဖမ်းသွားတဲ့ လူငယ်တော့ ပြန်လွတ်လာပြီ။ ဖမ်းသွားပြီး နောက်နေ့မှာပဲ ပြန်လွတ်လာတယ်။ ပိုက်ဆံ တော့မပေးရဘူး။ ကျန်တဲ့ ၂ ယောက်ကတော့ မသိရသေးဘူး “ ဟု ၎င်းဒေသခံ အမျိုးသမီးတစ်ဦးက ပြောသည်။
အလားတူ အင်းလေးဒေသတွင် ဖောင်တော်ဦးဘုရား ဒေသစာရီကြွချီပူဇော်ပွဲ ပြုလုပ်နေရာ စစ်ကောင်စီဘက်မှ လုံခြုံရေးယူပြီး စစ်ဆေးမှု တင်းကြပ်နေသည်။
“ ဘုရားပွဲကို ၁၈ ရက် လုပ်မယ်လို့တော့ ကြားတယ်။ ညောင်ရွှေမှာလည်း သူတို့အကပွဲတွေရှိတယ်။ ဆိုတော့ လောင်းကစားဝိုင်းလည်း ထဲမှာပေါ့။ အခုပွဲက လောင်းကစားတွေပါတယ်။ စစ်ကောင်စီ လက်အောက်က ပြည်သူ့စစ်နဲ့ ဗျုစောထီးတွေက လုံခြုံရေး လုပ်ပေးနေတယ် “ ဟု အင်းလေးဒေသမှ အမျိုးသမီးတစ်ဦးက ထပ်လောင်းပြောသည်။
ကိုဗစ်-၁၉ ရောဂါဖြစ်ပွားမှုကြောင့် ၃ နှစ်ကြာ ရပ်ဆိုင်းထားသည့် အင်းလေးဖောင်တော်ဦး ဒေသစာရီကြွချီပူ ဇော်ပွဲကို ယခုနှစ်တွင် ပြန်လည်ကျင်းပခဲ့ရာ လူအများလာရောက်ပြီး ဘုရားဖူးပူဇော်နေကြောင်း ဒေသခံတစ်ဦးက ပြောသည်။
Leave a Comments