မြန်မာပြည်သူများကို စစ်ကောင်စီက လေကြောင်းမှ ဗုံးကြဲတိုက်ခိုက်နေသည်ကို နိုင်ငံတကာ သိအောင် ရည်ရွယ်ပြီး ထိုင်းနိုင်ငံ ချင်းမိုင်မြို့ တာ့ဖဲဂိတ်တွင် ယမန်နေ့ (အောက်တိုဘာ ၁၂)ရက်တွင် ပြုလုပ်ခဲ့ကြောင်း သတင်းရရှိသည်။
အဆိုပါ သရုပ်ပြမှုကို ချင်းမိုင်မြို့ရှိ လူ့အခွင့်အရေးတက်ကြွလှုပ်ရှားသည့် လူငယ်အနုပညာရှင် ၆ ဦး ပါဝင်သည့် အဖွဲ့မှ Deadly Strikes by Myanmar Junta ခေါင်းစဉ်နဲ့ သရုပ်ဖော်ပြခဲ့သည်။
စစ်ကောင်စီတပ် အောက်တိုဘာ ၉ရက် ည ၁၁နာရီခွဲ တွင် KIA ဌာနချုပ်အနီး ဗုံးကြဲတိုက်ခိုက်မှုကြောင့် မုန်လိုင်ခက်စစ်ရှောင်စခန်းမှကလေး သူငယ် ၁၀ဦးအပါအဝင် ပြည်သူ ၂၉ဦး သေဆုံးခဲ့သည်။
ထိုကိစ္စများကို နိုင်ငံတကာက သတိထားမိလာအောင် သရုပ်ဖော်ပြကွက်ကို လုပ်ဆောင်ရခြင်းဖြစ်သည်ဟု ပါဝင်သရုပ်ဆောင်သူ လူငယ်တစ်ဦးက ပြောသည်။
“မထင်မှတ်ဘဲ သေဘေးနဲ့ကြုံလာရတဲ့အခါ ကျနော်တို့ ဘယ်လောက်တောင် ကြောက်ရွံ့ရလဲ၊ ကိုယ့်ရဲ့ ဆုံးရှုံးသွားတဲ့ ခြေလက်အင်္ဂါတွေကို ကြည့်ပြီး ဘယ်လိုနာကျင်ခံစားရတယ်၊ ကိုယ့်ဘေးနားမှာ ကိုယ်ချစ်ရတဲ့လူတွေ သေသွားတာကို ကြည့်ပြီးတော့မှ ဘယ်လောက်ထိ ကြေကွဲရလဲ ဆိုတဲ့ဟာကို အဓိကဖော်ပြချင်တာပါ”ဟု လေကြောင်းတိုက်ခိုက်ခံရမှုကြောင့် မျှော်လင့်ချက်ဆုံးရှုံးရသည်ကို ၎င်းလူငယ်က ဆက်ပြောသည်။
နိုင်ငံတကာအသိုင်းအဝိုင်းအနေဖြင့် မြန်မာပြည်သူတွေကို ပိုမိုကူညီပေးရန်၊ စစ်ကောင်စီတပ်၏ လေယာဉ်ဆီ အရောင်းအဝယ်ကိစ္စနှင့် ပတ်သက်ပြီး ရန်တန့်သွားအောင် အစီအစဉ်ချမှတ်ပေးရန်လည်း တိုက်တွန်းတောင်းဆိုခဲ့သည်။
Leave a Comments