တရုတ်နိုင်ငံအနေဖြင့် မြန်မာနိုင်ငံရှိ BRI-ပိုးလမ်းမ စီမံကိန်းတိုးမြှင့်လုပ်ဆောင်မည့် အစီအစဉ်များကို ရပ်တန့်ရန် ကချင်အမျိုးသမီးများအစည်းအရုံး-ထိုင်းနိုင်ငံ (KWAT) က တောင်းဆိုလိုက်သည်။

စစ်ကောင်စီသည် BRI -ပိုးလမ်းမစီမံကိန်းတိုးချဲ့ပြုလုပ်နေသည့်အပေါ်ရပ်တန့်ပေးရန် နှင့် ကချင်ပြည် နှင့် သျှမ်းပြည် မြောက်ပိုင်း အတွင်း စစ်ကောင်စီမှ လူ့အခွင့်အရေး ချိုးဖောက်မှု ပိုပြင်းထန်လာပြီး KWAT က အောက်တိုဘာ ၉ရက် တွင် ကြေညာထုတ်ပြန်သော “သွေးစွန်းနေသော တံခါးပေါက်များ” အစီရင်ခံစာ တွင်ရေးသားထားသည်။

“တရုတ်နိုင်ငံဟာ စစ်တပ်နဲ့ ပူးပေါင်းပြီး BRI-ပိုးလမ်းမ စီမံကိန်းတွေကို ရှေ့တိုးလုပ်ဆောင်ခြင်းအားဖြင့် ကြီးမားတဲ့ အန္တရာယ်တွေကို ယူနေတယ်”ဟု KWAT၏ ပြောရေးဆိုခွင့်ရှိသူ ဂျာအိန် က ပြောဆိုလိုက်သည်။

ဆက်လက်ပြီး “စီမံကိန်းတွေအတွက် ဘာလုံခြုံရေးအာ မခံချက်မှလည်း မရှိဘူး။ ပြီးတော့ စီစဉ်ထားတဲ့ စီမံကိန်းတွေနဲ့ ဆက်နွယ်နေတဲ့ တိုးမြင့်လာတဲ့ ရက်စက်ကြမ်းကြုတ်မှုတွေထဲမှာပဲ တရုတ်နိုင်ငံကပါ ကြံရာပါ ဖြစ်လာလိမ့်မည်။”ဟု ဂျာအိန်က ဆိုပြန်သည်။

လွန်ခဲ့သည့် ၁၅ လနှင့် နှိုင်းယှဉ်လျှင် ၂၀၂၂ ခုနှစ် နှစ်လည်ပိုင်းမှစ၍ လေကြောင်းတိုက်ခိုက်မှုကြောင့် ထိခိုက်သူ ၂၀၀ နီးပါးနှင့် လူသားဒိုင်းအဖြစ် အတင်းအဓမ္မ ခိုင်းစေခံရသူ ရွာသူရွာသားဦးရေမှာ ၂၂၁ ဦးထိ သိသိသာသာ တိုးမြင့်လာကြောင်းကို အစီရင်ခံစာ တွင် ဖော်ပြထားသည်။

KWAT မှ မှတ်တမ်းတင်ထားသော စစ်ကောင်စီမှ ကျယ်ကျယ်ပြန့်ပြန့် ကျူးလွန်နေသော အခြားချိုးဖောက်မှုများ ထဲတွင် အရပ်သား ၆၁ ကို ထိခိုက်သေဆုံးစေခဲ့သော လူနေထူထပ်သော ဒေသများသို့ လက်နက်ကြီးပစ်ခတ်မှု အကြိမ် ၃၀ နှင့် ကချင်ဘာသာရေးအကြီးအကဲ ဒေါက်တာ ခလမ်ဆမ်ဆွန် အပါအဝင် လူပေါင်း ၄၄၁ ဦးအား မတရားဖမ်းဆီးခြင်း ပြုလုပ်ခဲ့သည်။

ထို့အပြင် ဖမ်းဆီးခံရသူများထဲမှာ ဒါဇင်ပေါင်းများစွာသည် ယနေ့ချိန်ထိ ပျောက်ဆုံးနေဆဲဟုလည်း အစီရင်ခံစာတွင် ရေးသားထားသည်။

စစ်ကောင်စီကျူးလွန်သော ချိုးဖောက်မှု အများစုသည် BRI-ပိုးလမ်းမ စီမံကိန်းအောက်ရှိ အခြေခံအဆောက်အအုံများ၏ အရေးကြီးသော တံခါးပေါက်များဖြစ်သော မြန်မာနိုင်ငံမြောက်ပိုင်းရှိ အဓိက သယ်ယူပို့ဆောင်ရေး လမ်းကြောင်းများ တစ်လျှောက်တွင် ဖြစ်ပွားသည်ကို ပြသနေသည်။

၎င်းအခြေအနေသည် အဓိက သယ်ယူပို့ဆောင်ရေးသွေးကြောများထိန်းချုပ်မှုကို ကာကွယ်ရန် စုပေါင်းပြစ်ဒဏ်ပေးခြင်းကို ဗျူဟာတစ်ခုအနေဖြင့် စစ်ကောင်စီမှ ရည်ရွယ်ချက်ရှိရှိ လုပ်ဆောင်နေခြင်းဖြစ်သည်ဟု KWATက သုံးသပ်ပြောဆိုထားသည်။

စစ်ကောင်စီ၏ မြန်မာနိုင်ငံတဝှမ်းရှိ အရပ်သားများအပေါ် ပစ်မှတ်ထားသော ပြင်းထန်သည့် တိုက်ခိုက်မှုများကို ရပ်တန့်ရန် ၎င်းတို့အပေါ် သံတမန်ရေးနှင့် စီးပွားရေးဆိုင်ရာ ဖိအားများ တိုးမြှင့်ပေးရန်နှင့် အလှူရှင်နိုင်ငံအနေများဖြင့် နယ်စပ်ဖြတ်ကျော် လမ်းကြောင်းများကို ဦးစားပေးကာ ရှိရင်းစွဲနှင့် နောက်ထပ် တိုးပွားလာသော IDP များအတွက် အကူအညီများ တိုးမြှင့်ပေးရန် KWAT က အရေးပေါ် တောင်းဆိုလိုက်သည်။