သျှမ်းပြည် မူဆယ်ခရိုင်၊ ကွတ်ခိုင်မြို့နယ်အတွင်း နှစ်ဖက်တပ်ဖွဲ့ ထိတွေ့တိုက်ပွဲ ဖြစ်ပွားခဲ့ ပြီးနောက် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) နှင့် တအာင်း (ပလောင်)အမျိုးသား လွတ်မြောက်ရေး တပ်မတော် (TNLA) တို့ တွေ့ဆုံဆွေးနွေးခဲ့ကြောင်း သိရသည်။
တွေ့ဆုံဆွေးနွေးမှုကို အောက်တိုဘာလ (၆) နေ့ နှင့် (၇) နေ့ နှစ်ရက်သာ ကျင်းပခဲ့ပြီး အချင်းချင်း နားလည်မှု လွဲခြင်းကြောင့် မဟာမိတ်အကြား မိတ်ဖက် ပဋိပက္ခဖြစ်ပွားခဲ့သည်ကို အပြန်အလှန် သင်ပုန်းခြေပြီး နောက်နောင် မဖြစ်ပွားရန် အတွက် ဆွေးနွေးခဲ့ကြောင်း SSPP/SSA နှင့် TNLA တို့က ယနေ့ (အောက်တိုဘာလ ၈) ရက်တွင် ထုတ်ပြန်ထားသည်။
ထုတ်ပြန်ချက်တွင် မဟာမိတ် အဖွဲ့အစည်း နှစ်ဖွဲ့ကြား သဘောတူထားသည့် နိုင်ငံရေး၊ စစ်ရေး သဘာတူညီချက်များကို အပြန်အလှန်စောင့်ထိန်းကြပြီး အမျိုးသားလွတ်မြောက်ရေး တော်လှန်ရေးလုပ်ငန်းများ အမြန်အောင်မြင်နိုင်ရန် အတွက် နှစ်ဖက်အဖွဲ့အစည်းကြား အဆင့်ဆင့်သော လုပ်ငန်းများ ပူးပေါင်းဆောင်ရွက်နိုင်ရန် ရေးသားထားသည်။
ထို့အပြင် ပြဿနာပေါ်ပေါက်လာပါက မဟာမိတ် အဖွဲ့အစည်းအချင်းချင်း အကောင်းဆုံး ညှိနှိုင်းတွေ့ဆုံဖြေရှင်းပြီး ချစ်ကြည်ရင်းနှီးမှုများ တိုးမြှင့် ဖော်ဆောင်ရန်လည်း သဘောတူ ဆုံးဖြတ်ခဲ့ကြောင်း ထုတ်ပြန်ချက်တွင် ဖော်ပြထားသည်။
SSPP/SSA နှင့် TNLA တပ်တို့သည် ပြီးခဲ့သည့် စက်တင်ဘာလ (၂၃) ရက်တွင် ကွတ်ခိုင်မြို့နယ်၊ မိုင်းယု ကျေးရွာအုပ်စု၊ ဖာပျဥ်ကျေးရွာ (ဝၢၼ်ႈၽႃပႅၼ်ႈ) အနီးတွင် နှစ်ဖက်တပ်ဖွဲ့ ထိတွေ့ပစ်ခတ်မှု ရှိ ခဲ့သည်။
ထိုတွေ့ဆုံမှုသည် ပြီးဆုံးသွားသည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) နှင့် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တို့၏ တွေ့ဆုံဆွေးနွေးမှုသည် သျှမ်းပြည်၊ အထူးဒေသ (၂) ပန်ဆန်းမြို့၌ ပြုလုပ်ခဲ့ကြောင်းလည်း သတင်းရရှိသည်။
ထိုထိတွေ့တိုက်ပွဲ နှင့် ပတ်သက်ပြီး နှစ်ဖက်တပ်ဖွဲ့ နားလည်မှု လွဲမှားသည့်အတွက် ဖြစ်ရကြောင်း နှင့် နှစ်ဖက်တပ်ဖွဲ့ တွေ့ဆုံ ဆွေးနွေးရန် လုပ်ဆောင်နေကြောင်း TNLA ၏ ပြောရေးဆိုခွင့် ဒုတိယ ဗိုလ်မှူးကြီး တားအိုက်ကျော်က သျှမ်းသံတော်ဆင့်ကို စက်တင်ဘာလ ၂၅ ရက်နေ့ အင်တာဗျူး၌ ဖြေဆိုခဲ့သည်။
