သျှမ်းပြည် လားရှိုးခရိုင်၊ သိန္နီမြို့နယ်၊ ကွန်ကောက်ကျေးရွာအုပ်စုအတွင်း အာဏာသိမ်း စစ်ကောင်စီ တပ်ဖွဲ့ နှင့် ကချင်လွတ်လပ်ရေး တပ်ဖွဲ့ (KIA) တို့ တိုက်ပွဲဖြစ်ပွားပြီး ဘုန်းကြီး ကျောင်းဝင်းအတွင်း လက်နက်ကြီး ကျရောက်ပေါက်ကွဲခဲ့ကြောင်း စုံစမ်းသိရသည်။

ယနေ့ (အောက်တိုဘာလ ၇) ရက် နံနက်ပိုင်း ၁၁ နာရီဝန်းကျင် သိန္နီမြို့နယ်၊ ကွန်ကောက်ရွာ ဘုန်းကြီးကျောင်းဝင်း အတွင်းသို့ လက်နက်ကြီးကျကွဲပြီး ကျောင်းနံရံ၊ သွပ်မိုးများက ထိခိုက်ပျက်စီး ရကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“လက်နက်ကြီးက ကိုရင်လေးတွေ အိပ်တဲ့ အဆောင်နဲ့ ဆွမ်းစားဆောင်ကို ထိမှန်တာ၊ ကိုရင်တွေကို မထိလို့ တော်သေးတယ်။ သွပ်မိုးတွေ၊ အုတ်နံရံတွေကတော့ ပျက်စီးကုန်တာ။ အခုဆိုရင် ကိုရင်နဲ့ ဦးဇင်းတွေကို ဟိုမိန်း ဘုန်းကြီးကျောင်းမှာ ခေတ္တပြောင်းရွှေ့ထားရတယ်” ဟု လုံခြုံရေး အရ အမည်ဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

ထို့အပြင် စစ်ကောင်စီလက်နက်ကြီးသည် ကွန်ကောက်ကျေးရွာအုပ်စုရှိ၊ နားကုန်းကျေးရွာ (ဝၢၼ်ႈႁူဝ် တၢင်းသိုဝ်ႈ) ဒေသခံ၏ ခြံဝင်းထဲ့သို့ နောက်ထပ် ၃ လုံးကျရောက်ပေါက်ကွဲခဲ့ပြီး ထိခိုက်ကျ ဆုံးမှုများကို မသိရသေးကြောင်းလည်း အထက်ပါ အမျိုးသားက သျှမ်းသံတော်ဆင့်ကို ဆက်ဆိုသည်။

ယနေ့ ဖြစ်ပွားသည့် စစ်ကောင်စီနှင့် KIA တပ်တို့၏ တိုက်ပွဲတွင် ကွန်ကောက်ကျေးရွာ အတွင်း တပ်စွဲ နေရာယူ ထားသည့် KIA တပ်မှ ပစ်လိုက်သည့် လက်နက်ကြီးကြောင့် ပန်နားကျေးရွာ (ဝၢၼ်ႈပၢင်ၼႃး) စာသင်ကျောင်းအနီး ရှိနေသည့် စစ်ကောင်စီ တပ်သား ၃ ဦးဒဏ်ရာရကာ တစ်ဦးသေဆုံးကြောင်းလည်း သိန္နီမြို့နယ်အတွင်း စစ်ရေး လှုပ်ရှားသူ တစ်ဦးကလည်း သျှမ်းသံတော်ဆင့်ကို ပြောသည်။

“ဒီနေ့ပစ်ခတ်မှုမှာ လက်နက်ကြီးနဲ့ ပစ်ကြတာ ပိုများတယ်။ KIA လက်နက်ကြီးကြောင့် စစ်ကောင်တပ်သား ၃ ဦး ထိပြီး ဒဏ်ရာတော်တော်ပြင်းတယ်လို့ သိရတယ်၊ သူတို့ စစ်ကားနဲ့ ဆေးရုံပို့ဖို့ သယ်သွားတဲ့အချိန် တစ်ဦးက ပန်လော့တိုးဂိတ်အရောက်မှာ သေသွားတယ်” ဟု သိန္နီမြို့နယ်အတွင်း စစ်ရေး လှုပ်ရှားသူ တစ်ဦးက သျှမ်းသံတော်ဆင့် ကို ပြောသည်။

ယင်းကဲ့သို့ စစ်ရေး တင်းမာမှုကြောင့် ကွန်ကောက်ကျေးရွာမှ ဒေသခံ ၁၀၀ ကျော်သည် ဟိုမိန်းကျေးရွာရှိ ဘုန်းကြီးကျောင်းတွင် စစ်ရှောင်ရောက်ရှိရာ ကလေးငယ် ၃၀ ကျော် ရှိပြီး၊ ဖိုင်ခမ်းဘုန်းကြီးကျောင်းတွင်လည်း စစ်ရှောင် ၃၀၀ ကျော် ရောက်နေကြောင်း သိရသည်။

ပြီးခဲ့သည့် အောက်တိုဘာလ ၅ ရက် နံနက်ပိုင်း ၁၀ နာရီဝန်းကျင်မှ ၁၂ နာရီခွဲ အထိ တင်းလုံးကျေးရွာ (ဝၢၼ်ႈတိုင်းလုမ်း) ၌ နေရာယူထားသည့် စစ်ကောင်စီတပ်က လက်နက်ကြီး ၆ လုံးပစ်ခတ်ရာ တစ်လုံးက ကွန်ကောက်ကျေးရွာရှိ နေအိမ်ဝန်းထဲ ကျကွဲပြီး မီးဖိုဆောင် နှင့် ဘုရားစင်များပျက်စီးရကြောင်း သိရသည်။

ပြီးခဲ့သည့် စက်တင်ဘာလမှ စတင်ကာ KIA တပ်ဖွဲ့သည် ကွန်ကောက်ကျေးရွာ ဘုန်းကြီးကျောင်း အနီး စခန်းချ နေရာယူပြီး ကွန်လုံဘက်သွားသည့် ကုန်တင်ကားများထံမှ ဘီးလိမ့်ခွန် တစ်နှစ်စာကို ၁၀ သိန်းထက်မနည်း ဆက်ကြေးကောက်နေသည့် အတွက် ဒေသခံများ၊ လမ်းသွားလမ်းလာများအတွက် အခက်အခဲ ရှိနေရကြောင်းလည်း သိရသည်။

အောက်တိုဘာလ ၅ ရက် မွန်းလွဲပိုင်း ၁ နာရီ ဝန်းကျင်တွင်လည်း သိန္နီမြို့နယ် ကွန်ကောက်ကျေးရွာအုပ်စုရှိ နမ့်တူချောင်းဘေး နယ်ကျွံရောက်လာသည့် စစ်ကောင်စီ စစ်ကြောင်း နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့ တိုက်ပွဲဖြစ်ရာ စစ်ကောင်စီက ဆုတ်ခွာခဲ့ရသည်။