သျှမ်းပြည် သီပေါမြို့နယ် မိုင်းခေးကျေးရွာအုပ်စုအတွင်း အသက် ၁၁ နှစ်အရွယ်ရှိ အမျိုးသမီးငယ်တစ်ဦးကို အမျိုးသားတစ်ဦးက မုဒိမ်းကျင့်ပြုခဲ့ကြောင်း သတင်းသိရှိရသည်။
ဖြစ်စဉ်မှာ အောက်တိုဘာလ ၃ ရက် နေ့လည်ပိုင်းတွင် အသက် (၃၅) နှစ်ရှိ စိုင်းပီးဆိုသူသည် ဆိုင်ကယ် တစ်စီးရောင်းရန်အတွက် အသက် ၁၁ နှစ်အရွယ် နန်းအိန်း (အမည်လွှဲ) ၏ ဖခင်ဖြစ်သူဆီ အိမ်သို့ ရောက်ရှိခဲ့သည်။
ထိုအိမ်သို့ မရောက်ခင် လမ်းတစ်ဝက်မှာ စိုင်းပီးသည် အရက်သောက်ခဲ့ပြီး မူးနေရာမှ နန်းအိန်းတို့၏ နေအိမ်သို့ ရောက်ခဲ့သည်။
“ သူအရက်သောက်ပြီး အိမ်ကိုရောက်လာတော့ နန်းအိန်းရဲ့ အဖေကို လာရှာတယ်။ သူ့အဖေက ခြံထဲရောက်နေတော့ နန်းအိန်းကိုခေါ်ပြီး သူ့အဖေရှိရာ ခြံကိုလိုက်ပို့ခိုင်းတာ။ လိုက်ပို့ပြီး အပြန်လမ်းမှာ ဆိုင်ကယ်ရပ်ပြီးတော့ နန်းအိန်းကို ခြုံပုတ်ထဲ ခေါ်သွားတယ်။ ပြီးတော့ မဖွယ်ရာတွေ၊ မုဒိမ်းကျင့်ပြုခဲ့တယ် “ ဟု မှုခင်းကိုကိုင်တွယ်ဖြေရှင်းခဲ့ရသည့် ဒေသခံတစ်ဦးအမျိုးသားတစ်ဦးက ပြောသည်။
လက်ရှိမှာ အဓ္ဓမပြုကျင့်ခဲ့သူ စိုင်းပီးကို ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ဌာနထံသို့ အကြောင်းကြားခဲ့ပြီး ဖမ်းဆီးထားကြောင်းလည်း သိရသည်။
သို့သော်လည်း ပြစ်မှုကျူးလွန်သူ စိုင်းပီးကို မည်သည့် ပြစ်မှုဖြင့် အရေးယူ ဆောင်ရွက်နေကြောင်း အသေးစိတ်ကို မသိရှိရပေ။
စစ်တပ်က အာဏာသိမ်းပြီးနောက်ပိုင်း သျှမ်းပြည်တွင်း မေလမှ ဇွန်လအထိ သက်ငယ် မုဒိမ်းမှု၊ အသက်မပြည့်သေးသူနှင့် ကာမစပ်ယှက်မှု (၃) မှု၊ အိမ်တွင်းအကြမ်းဖက်မှု (၄) မှု၊ လိင်ပိုင်းဆိုင်ရာ အကြပ်ကိုင်ခံရမှု (၂) မှု၊ မုဒိမ်းကျင့်ရန် ကြိုးပမ်းမှု (၁) မှုနှင့် စိတ်ရောဂါရှင် အမျိုးသမီးကို မုဒိမ်းမှု (၁) စုစုပေါင်း (၁၁) မှုဖြစ်ပွားခဲ့ကြောင်း ရှမ်းအမျိုးသမီးရေးရာဆက်သွယ်လှုပ်ရှားဆောင်ရွက်ရေးအသင်း (SWAN) မှ သြဂုတ် ၁၈ ၌ ထုတ်ပြန်ထားသည်။
