သျှမ်းပြည် လားရှိုးမြို့နယ်၊ သိန္နီမြို့နယ်အတွင်း၌ အာဏာသိမ်း စစ်ကောင်စီ တပ် နှင့် ရှမ်းပြည်တိုးတက်ရေး ပါတီ၊ ရှမ်းပြည် တပ်မတော် (SSPP/SSA) တို့သည် ယနေ့ (အောက်တိုဘာ ၅)ရက် နေ့လည်ပိုင်း ၁နာရီဝန်းကျင်တွင် ထိတွေ့ တိုက်ပွဲ ဖြစ်ပွားခဲ့ကြောင်း စုံစမ်းသိရသည်။
ယနေ့ (အောက်တိုဘာ ၅)ရက် နေ့လည် ၁နာရီဝန်းကျင်တွင် သီန္နီမြို့နယ် ကွန်ကောက်ကျေးရွာအုပ်စုအနီး SSPP/SSA တပ် နယ်မြေကို စစ်ကောင်စီဘက်မှ နယ်ကျော်ရောက်ရှိလာသဖြင့် ထိတွေ့တိုက်ပွဲဖြစ်ပွားခဲ့ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
“စစ်ကောင်စီက နယ်ကျော်ပြီး SSPP ရှိနေတဲ့ နမ့်တူချောင်းရဲ့ ဟိုဘက်ကို ရောက်သွားတာ၊ ပစ်ခတ်မှု မဖြစ်ခင်မှာ SSPP ရှေ့ပြေးက လှမ်းပြီးသတိပေးလိုက်သေးတယ်၊ ဒီဘက်မှာ ငါတို့ ရှိတယ် မင်းတို့ ရှေ့ဆက်မတိုးနဲ့ဆိုလည်း သူတို့က တိုးသွားလို့ ပစ်ခတ်မှုဖြစ်တာ၊ နောက်ဆုံးတော့ စစ်ကောင်စီပြန်ဆုတ်လာပြီး ပစ်ခတ် သံတွေလည်း ငြိမ် သွားတယ်” ဟု ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ပစ်ခတ်မှုသည် ၁၀ မိနစ်ကျော်ကြာမြင့်ပြီး ပစ်ခတ်ချိန်၌ လက်နက်ကြီး / လက်နက်ငယ် ပစ်ခတ်သံများ လည်း ကြားရကြောင်း ဒေသခံများက ဆက်လက်ပြောပြသည်။
တိုက်ပွဲအသေးစိတ်နှင့်ပတ်သက်ပြီး SSPP ကို ဆက်သွယ်သော်လည်း ပြန်လည်ဖြေကြားခြင်းမရှိသေးပေ။
ထိုပစ်ခတ်မှု မဖြစ်ခင်တွင် စစ်ကောင်စီ စစ်ကြောင်းသည် ကွန်ကောက်ကျေးရွာအုပ်စုအတွင်း အခွန် ဆက်ကြေး ကောက်နေသည့် KIA စစ်ကြောင်းကို လာရောက်တားမြစ်ရန် ဖြစ်ကြောင်းလည်း သတင်းများ က ထွက်ပေါ်နေသည်။
“ KIA စစ်ကြောင်းတစ်ခုက ကွန်ကောက်ရွာ ဘုန်းကြီးကျောင်းနားမှာ လာနေပြီး ကွန်လုံဘက် တက်တဲ့ ကားကြီး၊ ကုန်တင်ကားတွေကို ဆက်ကြေးကောက်တာ၊ ကားကြီး ၆ ဘီး၊ ၁၀ ဘီး၊ ၁၂ ဘီး အကုန်ကောက်နေတာ။ကုန်တင် ကားတစ်စီး ဘီးလိမ့်ခွန်ကို ၁ နှစ်စာ ကျပ် ၁၀ သိန်း တောင်းတယ်၊ တင်လာတဲ့ ကုန်အမျိုးအစား ပေါ်မူတည်ပြီး ကုန်အတွက် ဆက်ကြေးကတော့အခေါက်တိုင်း ပေးရတယ်” ဟု KIA တပ်ဖွဲ့မှ ကွန်ကောက်ကျေးရွာအတွင်း အခွန်ကောက်နေသည့်အကြောင်းကို အသက် (၃၀) ဝန်းကျင် အမျိုးသား တစ်ဦးက ပြောသည်။
လက်ရှိတွင် သန္နီမြို့နယ်အတွင်းမှ စစ်ကောင်စီ တပ်ဖွဲ့သည် ရှမ်းပြည် တိုးတက်ရေးပါတီ၊ ရှမ်းပြည်တပ်မတော် (SSPP/SSA) နှင့် ကချင်လွတ်လပ်ရေး တပ်မတော် (KIA) တို့နှင့် စစ်ရေးတင်းမာမှု ရှိနေကြောင်းလည်း ဒေသခံများ က ပြောသည်။
ပြီးခဲ့သည့် စက်တင်ဘာလ ၁၆ ရက်နေ့မှာလည်း သိန္နီမြို့နယ် ၊ ကွန်ကောက်ကျေးရွာ အတွင်း၌ အာဏာသိမ်း စစ်ကောင်စီ နှင့် KIA တပ်ဖွဲ့တို့ ထိတွေ့တိုက်ပွဲဖြစ်ပွားခဲ့ပြီး ဒေသခံ ၆၀ ကျော်က စစ်ရှောင်ထွက်ပြေးခဲ့ရသည်။
