Thursday, June 20, 2024

NDAA မိုင်းလားတပ်ဖွဲ့ဝင် ကေဒါ အရာရှိငယ် ၁၀၀ ကျော် သင်တန်းဆင်းပွဲ ပြုလုပ်

Must read

သျှမ်းပြည်အရှေ့ပိုင်း အထူးဒေသ (၄) မိုင်းလားမြို့ အခြေစိုက် အမျိုးသား ဒီမိုကရက်တစ် မဟာမိတ်တပ်မတော် (NDAA) မိုင်းလား တပ်ဖွဲ့ဝင် ၁၀၀ ကျော်အတွက် စတုတ္ထအကြိမ်မြောက် ကေဒါအရာရှိငယ် သင်တန်းဆင်းပွဲ ပြုလုပ်ကျင်းပခဲ့ကြောင်း စုံစမ်းသိရသည်။

အောက်တိုဘာလ ၁ ရက်တွင် NDAA တပ်ဖွဲ့ အခြေစိုက် လှုပ်ရှားရာ အထူးဒေသ (၄) မှ မိုင်းလား တပ်ဖွဲ့ဝင် ၁၀၀ ကျော်ပါဝင်သည့် ကေဒါအရာရှိငယ် သင်တန်းဆင်းပွဲ အခမ်းအနားကို စစ်သင်တန်းကျောင်းခန်းမ၌ ကျင်းပပြုလုပ်ခဲ့ကြောင်း NDAA အတွင်းရေးမှူး ဦးကြည်မြင့်က သျှမ်းသံတော်ဆင့်ကို ပြောသည်။

Photo – Credit ( မိုင်းလားတပ်ဖွဲ့ဝင် ကေဒါ အရာရှိငယ် ၁၀၀ ကျော် သင်တန်းဆင်းပွဲပြုလုပ်)

“ဒါက စတုတ္ထအကြိမ်မြောက် ဖြစ်သွားပြီ၊ သူတို့ဟာ တပ်ထဲမှာ ၊ ဒေသထဲမှာ လုပ်ငန်းတွေ ထူးချွန်တဲ့ သူတွေဖြစ်တယ်၊ အလားအလာကောင်းတယ်ဆိုပြီးတော့ ဒီသင်တန်းကို တက်ရတယ်၊ သူတို့ သင်တန်းတက်ပြီး အရည်အချင်း မြင့်တင်ပြီးတဲ့အခါ သူတို့ကို တခြားပိုပြီး အရေးကြီးတာဝန်တွေ ပေးအပ်တဲ့ အခါ သူတို့လုပ်နိုင်အောင် သင်တန်းပေးတဲ့ သဘောပေါ့” ဟု NDAA အတွင်းရေးမှူး ဦးကြည်မြင့်က သျှမ်းသံတော်ဆင့်ကို ပြောသည်။

NDAA ၏ ကေဒါ အရာရှိငယ် သင်တန်းသည် ၂၁ လကြာမြင့်ပြီး တပ်ဖွဲ့မှ တာဝန်ရှိ ပုဂ္ဂိုလ်များမှ အလှည့်ကျဖြင့် စာတွေ့၊ လက်တွေ့ သင်ကြားပေးသည့် သင်တန်းဖြစ်ကြောင်းလည်း ဦးကြည်မြင့်က သျှမ်းသံတော်ဆင့်ကို ဆက်ပြောသည်။

Photo – Credit ( မိုင်းလားတပ်ဖွဲ့ဝင် ကေဒါ အရာရှိငယ် ၁၀၀ ကျော် သင်တန်းဆင်းပွဲပြုလုပ်)

အဆိုပါ NDAA မိုင်းလားတပ်ဖွဲ့ဝင် ကေဒါအရာရှိငယ် သင်တန်းဆင်းပွဲကို ဒုတိယ ဥက္ကဌ Wu SnagBai ၊ လက်ထောက်တပ်မှူး Li ZhengLong၊ အထူးဒေသ အုပ်ချုပ်ရေး အစိုးရ Yan Xiang La နှင့် အထွေထွေ အတွင်းရေးမှူး Ah Liu နှင့် တခြားတာဝန်ရှိ ပုဂ္ဂိုလ်များစွာလည်း တက်ရောက်ခဲ့ကြောင်း သိရသည်။

ယင်း ကေဒါ အရာရှိငယ် သင်တန်းဆင်းပွဲတွင် ဒုတိယ ဥက္ကဌ Wu SangBai မှ အရေးကြီး လမ်းညွှန်စကား ပြောကြားပြီး၊ သင်တန်းသားများမှ ကိုယ်စားလှယ်တစ်ဦး ကျေးဇူးတင်စကား ပြောဆိုခဲ့ကြောင်း မိုင်းလား Wechat Channel လူမှုကွန်ယက်စာမျက်နှာကလည်း ထုတ်ပြန်ထားသည်။

“သင်တန်းသား ၁၄၁ ဦး အားလုံး သင်တန်းကို အောင်မြင်စွာ ပြီးဆုံးခဲ့ပါတယ်၊ အဲ့ထဲက သင်တန်းသား ၂ ဦးက စံပြ ထူးချွန်ဆု ချီးမြှင့်ခံရပြီး၊ နောက်ထပ် သင်တန်းသား ၁၆ ဦးက ထူးချွန်ဆု ချီးမြှင့်ခံရတယ်။ ကျန်တဲ့ သင်တန်းသားတွေ အားလုံးကလည်း သင်တန်းပြီးမြှောက်ကြောင်း ဘွဲ့လက်မှတ်တွေ ရရှိတယ်” ဟု မိုင်းလား Wechat Channel က ထုတ်ပြန်ပြောဆိုထားသည်။

သင်တန်း အောင်မြင်ပြီးဆုံးသွားသည့် NDAA ကေဒါ အရာရှိငယ်များသည် မိမိတို့ သင်ယူခဲ့သော အရည်အချင်းများကို သတ္တိရှိရှိ အသုံးချတတ်ရန် လိုအပ်ပြီး၊ ကျိုးနွံသော၊ မောက်မာမှုမရှိသော အလုပ်ပုံစံကို ထိန်းသိမ်းထားရန်၊ အရည်အချင်း ပြည့်မှီသော စစ်သူကြီးဖြစ်လာရန် ကြိုးပမ်းရန် လိုအပ်ကြောင်းလည်း Wechat Channel က ထုတ်ပြန်ချက်အရ သိရသည်။

Leave a Comments

- Advertisement -spot_img

Latest article