သျှမ်းပြည် မူဆယ်ခရိုင်၊ မူဆယ်မြို့နယ်အတွင်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ တိုက်ပွဲဖြစ်ပွားမှုကြောင့် စစ်ရှောင်လာရသည့် ဒေသခံများသည် အလုပ်အကိုင် ပျက်ကွက်မှုကြောင့် စိုးရိမ်စိတ်ဖြင့် နေရပ်ပြန်သွားရကြောင်း သိရသည်။

မြန်မာ – တရုတ်နယ်စပ် မူဆယ်မြို့နယ် စယ်လန့်ကျေးရွာအုပ်စု စယ်လန့်ရွာ၊ မန်ကန်ရွာ (မၢၼ်ႈၵၢင်) ၊ နမ့်ကတ်ရွာ (မၢၼ်ႈၼမ့်ၵတ်း)၊ ဂေါင်ရာရွာသစ်၊ မိုင်းဆတ်ရွာ (မၢၼ်ႈမႆ့သၵ်း)၊ ဒေသခံများသည် နမ့်ခမ်းမြို့၊ တုန်ခွမ် (မၢၼ်ႈတူင်ႈၶွၼ်) ဒေသခံများသည် နမ့်ခမ်းမြို့၊ တုန်ခွမ်ကျေးရွာသို့ စစ်ရှောင် ရောက်ရှိလာခြင်းဖြစ်ပြီး အောက်တိုဘာလ ၃ ရက်တွင် နေရပ်ပြန်သွားကြောင်း စစ်ရှောင်ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

“တုန်ခွမ်ရွာမှာ စစ်ရှောင် ၃၀၀ ကျော်ရှိတယ်၊ သူတို့က နှစ်လအတွင်းမှာ စစ်ရှောင်လိုက် ပြန်သွားလိုက် နဲ့ ၃ ကြိမ်မြောက် စစ်ရှောင်ရတာပေ့ါ၊ အဲ့ဒါကြောင့် လုပ်ငန်းတွေ ပျက်ကြရတာ၊ အခုလည်း တိုက်ပွဲ မရှိတော့ပေမဲ့ စစ်ရေးတင်းမာမှုတော့ ရှိတုန်းမို့၊ ကြောက်တော့ကြောက်တာပေါ့” ဟု နမ့်ခမ်းမြို့နယ်မှ စစ်ရှောင်ကူညီပေးသူ တစ်ဦးက သျှမ်းသံတော်ဆင့်ကို ပြောသည်။

ဩဂုတ်လ ၂၉ ရက် နံနက်ပိုင်းမှစပြီး သြဂုတ်လ ၃၀ ရက် မွန်းလွဲပိုင်း ၁ နာရီထိ စစ်ကောင်စီ နှင့် TNLA တပ်တို့သည် စယ်လန့်ကျေးရွာအနီး၌ တိုက်ပွဲဖြစ်ပွားခဲ့သည့် အတွက် စယ်လန့်ကျေးရွာ နှင့် အနီး ပတ်ဝန်းကျင်ရှိ ဒေသခံ ၆၀၀ နီးပါး စစ်ရှောင်ထွက်ပြေးခဲ့ရခြင်း ဖြစ်သည်။

အဆိုပါ စစ်ဘေးရှောင်များသည် မူဆယ်မြို့ပေါ် ဟိုနားရပ်ကွက်၊ စွမ်စော်ရပ်ကွက်၊ တိန်းလုံ ရပ်ကွက် ၊ ပန်ခမ်းရွာ နှင့် နမ့်ခမ်းမြို့နယ် တုန်ခွမ်ရွာတို့ရှိ အမျိုးအိမ်များသို့ စစ်ရှောင် ခိုလှုံနေကြကြောင်း သိရသည်။

လက်ရှိတွင် ဒေသအတွင်း အာဏာသိမ်း စစ်ကောင်စီ နှင့် TNLA တပ်တို့ ထိတွေ့တိုက်ပွဲ မရှိသော်လည်း ဒေသအတွင်း နှစ်ဖက်တပ်ဖွဲ့၏ စစ်ရေးတင်းမာမှုများရှိနေသေးသည့်အတွက် တချို့သော စစ်ဘေးရှောင်များလည်း နေရပ်မပြန်နိုင်ကြသေးကြောင်း စစ်ရှောင်ကူညီပေးသူက သျှမ်းသံတော်ဆင့်ကို ဆက်ပြော သည်။

“မန်နိမ့်ကျေးရွာဘက်က စစ်ရှောင် ၂၀၀ ဝန်းကျင်လောက်တော့ မပြန်သေးဘူးလို့ သိရတယ်၊ သူတို့ရွာ နားမှာ စစ်ကောင်စီ စစ်ကြောင်းရှိနေသေးလို့ ရွာထဲ ပေးမဝင်မှာကြောက်လို့ မပြန်သေးတာတဲ့၊ တိုက်ပွဲထပ်ဖြစ်မှာလည်း ကြောက်တာပေါ့” ဟု စစ်ရှောင်ကူညီသူက သျှမ်းသံတော်ဆင့်ကို ပြောသည်။

စစ်ရှောင်များ နေအိမ်စွန့်ခွာပြီး စစ်ရှောင်ထွက်ပြေးရသည့်အချိန်တွင် ကျေးရွာအတွင်း ဝင်လာသည့် လက်နက်ကိုင်တပ်ဖွဲ့ဝင်များသည် ဒေသခံများ၏ နေအိမ်ကို ဖောက်ထွင်းပြီး အတွင်းပစ္စည်းများကို ခိုးယူခြင်း၊ နေအိမ်အတွင်း ဝင်ရောက်နေရာယူခြင်းတို့ ရှိကြောင်းလည်း စုံစမ်းသိရသည်။

မူဆယ်မြို့နယ်အတွင်း အာဏာသိမ်း စစ်ကောင်စီ နှင့် TNLA တပ်တို့၏ တိုက်ပွဲကြောင့် အရပ်သား နေအိမ်များ လက်နက်ကြီးထိမှန် မီးလောင် ပျက်စီးရသည့်အပြင်၊ အရပ်သား ထိခိုက်သေဆုံးခြင်း၊ ဒဏ်ရာရခြင်း တို့လည်း ရှိခဲ့သည်။