သျှမ်းပြည် မူဆယ်ခရိုင်၊ မူဆယ်မြို့နယ်သို့ ရောက်ရှိနေသည့် တရုတ်ပြည်အတွင်း ဝင်ရောက်အလုပ်လုပ်ကိုင်ရန်အတွက် တိုကင်နံပါတ် စောင့်ဆိုင်းနေသူများ အချို့သည် တစ်လနီးပါး ကြာသည်အထိ နံပါတ်မရသဖြင့် နေရပ်သို့ ပြန်သွားရသူလည်း ရှိနေကြောင်း စုံစမ်းသိရသည်။
မြန်မာ – တရုတ်နယ်စပ် မူဆယ်ခရိုင်၊ ဆင်ဖြူဂိတ် နှင့် ငွေဆင်ဝန်ထမ်းအိမ်အနီး တရုတ်ပြည် ဝင်ရန်အတွက် နှစ်နိုင်ငံ ဝင်ထွက်ခွင့် တစ်ခါသုံးကတ် (TBP) ရရှိရန် စောင့်နေသူများအနက် အချို့သည် အညာဒေသမှ ရောက်လာသူများဖြစ်ကြပြီး တစ်လနီးပါးကြာစောင့်ဆိုင်းသော်လည်း မရသည့် အတွက် နေရပ်သို့ ပြန်သွားကြောင်း အနီးပတ်ဝန်းကျင် နေထိုင်သည့် အမျိုးသား တစ်ဉီးက သျှမ်းသံတော်ဆင့်ကို ပြောသည်။
“အညာဘက်ကလာတဲ့သူတွေဆိုရင် တချို့က လမ်းစားရိတ်အတွက် သူများဆီက ချေးငှား လာတာ၊ တချို့လည်း အိမ်တွေ ၊ ခြံတွေရောင်းပြီး လာကြတာ၊ တရုတ်ပြည်ဘက်ကို အလုပ် သွားလုပ်မယ် ဆိုတဲ့ မျှော်လင့်ချက်နဲ့ပေါ့၊ ဒါပေမဲ့ ဒီမှာ တစ်လနီးနီးစောင့်နေလည်း တိုကင် နံပါတ် မရတော့ တည်းခိုခ၊ စားဖို့သောက်ဖို့ ခ စတာနဲ့ပဲ ပါလာတဲ့ ပိုက်ဆံတွေကုန်လို့ နေရပ် ပြန်သွားကြတာလည်း ရှိတယ်” ဟု အနီးပတ်ဝန်းကျင်တွင် နေထိုင်သည့် အမျိုးသား တစ်ဉီးက ပြောသည်။
ကိုဗစ် – ၁၉ ရောဂါဖြစ်ပွားမှုကြောင့် ပိတ်ထားသည့် တရုတ်နယ်စပ်ဂိတ်များကို ပြီးခဲ့သည့် စက်တင်ဘာလ ၄ ရက်တွင် တစ်ခါသုံးကတ် TBP ကို စတင် လုပ်ဆောင်ပေးရာ ယနေ့ အချိန်အထိ သွားရောက်လုပ်ကိုင်သူများ နေ့စဉ်နီးပါး စည်ကားနေလျက်ရှိသည်။
အဆိုပါ တိုကင်နံပါတ် ရရှိရန်အတွက် တာဝန်ရှိသူများမှ တောင်းခံသည့် ငွေကြေး ပမာဏသည် တိုးမြှင့်ကောက်ခံလာကြောင်း တိုကင်နံပါတ်စောင့်ယူနေသူ နှင့် အမျိုးတော်စပ်သည့် အမျိုးသား တစ်ဉီးက သျှမ်းသံတော်ဆင့်ကို ပြောသည်။
“စစ လုပ်ပေးတုန်းကတော့ တစ်ယောက်ကို ကျပ်ငွေ တစ်သောင်းကျော်လောက်ပဲ ယူတာ၊ အဲ့နောက်ပိုင်း တစ်ပတ်အကြာမှာတော့ တစ်ယောက်ကို ကျပ်ငွေ တစ်သိန်း တောင်းတယ်၊ အခုဆိုရင် တစ်ယောက်ကို တရုတ်ယွမ်ငွေ ၅၀၀ ယွမ် (ကျပ်ငွေ ၂ သိန်းကျော်) တောင်းယူ နေတယ်” ဟု တိုကင်နံပါတ် စောင့်ယူနေသူ နှင့် အမျိုးတော်စပ်သည့် အမျိုးသားတစ်ဉီးက သျှမ်းသံတော်ဆင့်ကို ပြောသည်။
လက်ရှိ မြန်မာ – တရုတ်နယ်စပ် ဆင်ဖြူဂိတ်မှာ တရုတ်ပြည်ဝင်ခွင့် တစ်ခါသုံးကတ် တိုကင်နံပါတ်အမြန်ဆုံးရရန်အတွက် တရုတ်ယွမ်ငွေ (၅၀၀) ပေးပြီး လုပ်ယူနေကြောင်း သတင်းထွက်ပေါ်ပေမယ့် သျှမ်းသံတော်ဆင့်မှ အတည်ပြုမရသေးပေ။
စစ်တပ်မှ နိုင်ငံတော် အာဏာသိမ်းယူပြီး နောက်ပိုင်း ပြည်တွင်း စီးပွားရေး ကျပ်တည်းလာမှု နှင့် အလုပ်အကိုင် ရှားပါးလာမှုတို့ကြောင့် လူငယ် နှင့် ဒေသခံ အများစုတို့သည် နေရပ်စွန့်ခွာပြီး တရုတ် နှင့် ထိုင်းနိုင်ငံ ကဲ့သို့ ပြည်ပထွက် အလုပ်လုပ်ကိုင်သူ များပြားလျက်ရှိကြောင်းလည်း သိရသည်။
