သျှမ်းပြည် ညောင်ရွှေမြို့နယ် အင်းလေးဒေသအတွင်း နေထိုင်သည့် လင်မယား ၂ ဦးသည် ၁ လကျော်ကြာသည်အထိ ဖမ်းဆီးချုပ်နှောင်ထားခြင်း ခံရပြီး ၎င်းတို့၏ နေအိမ်ကိုပါ စစ်ကောင်စီက လာရောက် ချိတ်ပိတ်သွားခဲ့ကြောင်း စုံစမ်းသိရသည်။

ထိုဖမ်းဆီးခံရသည့် လင်မယား (၂) ဦးကို ပြည်သူ့ကာကွယ်ရေးတပ်ဖွဲ့ PDF နှင့် ပတ်သက်သည်ဟု စွပ်စွဲကာ ပြီးခဲ့သည့် သြဂုတ် ၂၈ ရက်၌ စစ်ကောင်စီက အိမ်တွင်းဝင်ရောက် ဖမ်းဆီးသွားခဲ့ပြီး ၎င်းတို့ နေအိမ်ကို စက်တင်ဘာ (၂၇) ရက်တွင် စစ်ကောင်စီက နေအိမ်ချိတ်ပိတ်သွားခဲ့ကြောင်း အင်းလေးဒေသခံ တစ်ဦး က သျှမ်းသံတော်ဆင့် ကိုပြောသည်။

“အိမ်ကို ချိတ်မပိတ်ခင် ၃ ရက်လောက်က ပစ္စည်းသိမ်းဖို့လာပြောသွားတယ်။ ပစ္စည်းသိမ်းပြီး နောက်ရက်တော့ သူတို့လာပြီး နေအိမ်ကို ချိတ်ပိတ်လိုက်တာပဲ။ အဲ့အိမ်က ကလေး ၂ ယောက်တော့ သူတို့အဖိုးဆီမှာ သွားနေရတယ် “ ဟု ၎င်းဒေသခံက ပြောသည်။

လက်ရှိ ဖမ်းဆီးချုပ်နှောင်ထားသည့် လင်မယား ၂ ဦးကို ပြီးခဲ့သည့် စက်တင်ဘာ ၂၁ ရက်တွင် တစ်ကြိမ်ရုံးထုတ်ခဲ့ပြီး လာမည့် အောက်တိုဘာလ ၅ ရက်၌ နောက်တစ်ကြိမ် ရုံးချိန်း စီစဉ်ထားကြောင်း ၎င်းနှင့် နီးစပ်သူတစ်ဦးထံမှ သိရသည်။

ဖမ်းဆီးခံထားရသည့် လင်မယား ၂ ဦးကို မည့်သည့် ပုဒ်မဖြင့် တရားစွဲဆိုထားသည်ကို မသိရှိရသေးပေ။

စစ်ကောင်စီသည် ၎င်းတို့ထင်မြင်သလို ခိုင်မာသည့် သက်သေအထောက်အထားမရှိဘဲ ပြည်သူများကို အကြောင်းပြချက် အမျိုးမျိုးဖြင့် စွပ်စွဲပြီး လိုက်လံဖမ်းဆီးဆောင်ရွက်နေခြင်းသည် ကြီးမားသော လူ့အခွင့်အရေး ချိုးဖောက်နေသည်ဟု အင်းလေးဒေသ အဖွဲ့အစည်းဖြစ်သည့် JMC – Innlay မှ ဒါရိုက်တာ မယုလှိုင်သင်းက ပြောသည်။

“စစ်ကောင်စီတွေဘက်က သူတို့မှာ သက်သေ အထောက်အထား၊ အခိုင်အမာ မရှိဘဲနဲ့ လူတွေကို နိုင်ထက်စီးနင်း အရင်ဖမ်းတယ်။ ဖမ်းပြီးရင်သူတို့မိသားစုတွေ နဲ့ လုံးဝ အဆက်သွယ်ပေးမလုပ်ဘူး။ ပြီးရင်သူတို့ ညှင်းပန်းနှိပ်စက်မှု အမျိုးမျိုးလုပ်တယ်။ သူတို့ လိုချင်တဲ့ အဖြေကို ဝန်ခံခိုင်းတယ်။ ဒါက လူ့အခွင့်အရေးကို ကြီးကြီးမားမား ချိုးဖောက်နေတယ် “ ဟု ၎င်းက ပြောသည်။

စစ်တပ်အာဏာသိမ်းပြီး ၂ နှစ်ကျော် ကာလအတွင်း မြန်မာနိုင်ငံတွင် ဖမ်းဆီးခံရသူ ၂၄,၈၅၆ ဦးရှိပြီး သတ်ဖြတ်ခံရသူ ၄,၁၂၆ ဦးရှိကာ ထိန်းသိမ်းခံထားရသူ စုစုပေါင်း ၁၉,၂၈၄ ရှိပြီ ဖြစ်ကြောင်း နိုင်ငံရေးအကျဉ်း သားများ ကူညီစောင့်ရှောင်ရေးအသင်းမှ ယမန်နေ့ စက်တင်ဘာလ ၂၈ ရက်တွင် ထုတ်ပြန်ထားသည်။