သျှမ်းပြည် လားရှိုးခရိုင်၊ လားရှိုးမြို့ရှိ DENKO ပန့်ဆီဆိုင်တွင် ဗုံးပေါက်ကွဲမှု ဖြစ်ပွားခဲ့ပြီး ၂ ဦးထက် မနည်း သေဆုံးကာ ထိခိုက်ဒဏ်ရာရသူများပြားနေကြောင်း သိရသည်။
ယနေ့ စက်တင်ဘာလ ၂၇ ရက်နေ့ ညနေပိုင်း ၄ နာရီ ၅၅ မိနစ်တွင် လားရှိုးမြို့ပြင် ခိုဆန်တန် ကျေးရွာ အနီး ရှိ DENKO စက်သုံးဆီဆိုင် (ပန့်ဆီဆိုင်) တွင် ဗုံးပေါက်ကွဲမှု ဖြစ်ပွားခဲ့ကြောင်း အနီး ပတ်ဝန်းကျင်တွင် နေထိုင်သည့် အမည်မဖော်လို ဒေသခံ အမျိုးသားတစ်ဦးက သျှမ်းသံဝောာ်ဆင့်ကို ပြောသည်။
“ပေါက်ကွဲသံ တစ်ချက် အကျယ်ကြီး ကြားရပြီးတော့ မီးက ထလောင်တာ။ အဲ့ကနေ မီးတောက်တွေ တဖြည်းဖြည်းကြီးလာပြီး လူတွေလည်း ဝရုန်းသုန်းကားတွေ ဖြစ်ကုန်တယ်။ အစကတော့ မီးငြိမ်းဖို့ ကြိုးစားကြသေးတယ်၊ ဒါပေမဲ့ မီးညွှန့်က တအားကြီးတော့ မနိုင်ဘူးလေ” ဟု အနီးပတ်ဝန်းကျင်မှ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ဗုံးပေါက်ကွဲမှုသည် မည်သည့်အဖွဲ့အစည်း၏ လက်ချက်ဖြစ်သည်ကို မသိရကြောင်း နှင့် မီးသတ်ကားများ ရောက်ရှိလာပြီး ၁ နာရီကျော် မီးငြိမ်းသတ်မှု ပြုလုပ်ခဲ့ရကြောင်းလည်း သိရသည်။
အဆိုပါ ဗုံးပေါက်ကွဲမှုကြောင့် DENKO ပန့်ဆီဆိုင်မှ ဝန်ထမ်းများ၊ ဆီလာဖြည့်သူများမှ ထိခိုက်ဒဏ်ရာ ရရှိသူ (၁၀) ဦးထက် မနည်း ရှိပြီး သေဆုံးသူလည်း (၂) ဦးထက်မနည်း ရှိနေကြောင်း ကူညီဆောင်ရွက် ပေးနေသည့် ပရဟိတသမား တစ်ဦးက သျှမ်းသံတော်ဆင့်ကို ပြောသည်။
“ကျနော်တို့ အတည်ပြုရသလောက်တော့ ကျား (၈) ဦး၊ မ (၄) ဦး ဒဏ်ရာပြင်းထန်လို့ ဆေးရုံကို ပို့ထားလိုက်ပါပြီ။ သေဆုံးသူက နှစ်ဦး (ကျား) ပါ။ ထိခိုက်မှုကတော့ ကား (၂) စီး၊ ဆိုင်ကယ် (၁) စီး မီးလောင်ပျက်စီးပါတယ်။ ဆိုင်လည်း မီးလောင်သွားပါပြီ” ဟု အမည်မဖော်လို ပရဟိတသမားက သျှမ်းသံတော်ဆင့်ကို ပြောသည်။
မီးလောင်ပျက်စီးမှုတွင် သစ္စာရှင် Express ကား တစ်စီး၊ ခွေးဘီလူး အမျိုးအစား ကား တစ်စီး နှင့် ဆိုင်ကယ် တစ်စီးတို့ ပါဝင်ကြောင်းလည်း ပရဟိတ သမား၏ ပြောပြချက်အရ သိရသည်။
ဗုံးပေါက်ကွဲမှု အပြီး မီးများ ငြိမ်းသတ်ပြီးသွားသည့် အချိန်တွင် စစ်ကောင်စီတပ်သားများ၊ ရဲတပ်ဖွဲ့ဝင်များက လာရောက်စစ်ဆေးမှု ပြုလုပ်ခဲ့ကြောင်းလည်း သိရသည်။
ပြီးခဲ့သည့် စက်တင်ဘာလ (၂၂ )ရက်နေ့တွင် ယာဉ်ထိန်းရဲ တစ်ဉီး ပစ်သတ်ခံရသည့် အပြင် စက်တင်ဘာလ ၁၉ ရက်နေ့ကလည်း လားရှိုးမြို့ အမှတ် (၂) ရပ်ကွက်ရှိ CS Hotel အနီး ပေါက်ကွဲမှုဖြစ်ပြီး (၄) ဦးထိခိုက်ဒဏ်ရာရကာ (၂) ဦးသေဆုံးမှု ရှိခဲ့သည်။
လားရှိုးမြို့သည် စစ်ကောင်စီတပ်ဖွဲ့ရှိသော်လည်း လက်နက်ကိုင် တပ်ဖွဲ့များ မြို့ပေါ်အထိ ဆက်ကြေး ကောက်ယူမှုများ၊ ဗုံးခွဲတိုက်ခိုက်မှုများ နှင့် စစ်ကောင်စီ လက်အောက်ခံ စခန်းများ ပစ်ခတ် တိုက်ခိုက် ခံရမှု မကြာခဏ ဖြစ်ပွားလေ့ရှိသည်။
Leave a Comments