သျှမ်းပြည် မူဆယ်ခရိုင် ကွတ်ခိုင်မြို့နယ် မိုင်းယုကျေးရွာအုပ်စုအတွင်းရှိ တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တပ်စခန်း တစ်နေရာကို စစ်ရဟတ်ယာဥ်ဖြင့် ဗုံးကြဲတိုက်ခိုက် ခဲ့ကြောင်း သိရသည်။

ယနေ့ စက်တင်ဘာလ ၂၆ ရက် မွန်းလွဲပိုင်း ၂ နာရီခွဲ ဝန်းကျင် မိုင်းယုကျေးရွာအုပ်စု၊ ငေါ့ငါးရွာအနီးရှိ (TNLA) တပ်စခန်းနေရာကို စစ်ကောင်စီမှ လေယာဥ်ဖြင့် ဗုံး ၃ လုံးထက်မနည်း ဗုံးကြဲချ တိုက်ခိုက် လိုက်ခြင်းဖြစ်ကြောင်း မြေပြင်စစ်ရေး သတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“လေယာဥ်က တစ်စီးပဲ။ အမြင့်ပေ ၂၀၀ မီတာလောက်ကနေ ပျံသန်းလာတာ၊ ဗုံး ၃ လုံး ကြဲချပြီး လေယာဥ်ပေါ်ကနေ စက်သေနတ်နဲ့လည်း ပစ်သွားတယ်။ အဲ့ဒီ နေရာက TNLA စခန်းရှိတယ်၊ ထိခိုက်မှု သတင်းတော့ မသိရသေးဘူး” ဟု မြေပြင် စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

ယမန်နေ့ စက်တင်ဘာလ ၂၅ ရက် ညပိုင်း ၁၀ နာရီခွဲဝန်းကျင်မှာလည်း မူဆယ်မြို့နယ် စယ်လန့်ကျေးရွာအတွင်း စစ်ကောင်စီ နှင့် TNLA တို့အကြား တိုက်ပွဲပြန်လည် ဖြစ်ပွားခဲ့ပြီး စစ်ကောင်စီဘက်မှ တိုက်လေယာဉ်တစ်စီးဖြင့် လွိုင်မောက် နှင့် လွိုင်နမ့်ကတ် အနီးသို့ ဗုံးကြဲတိုက်ခိုက်ခဲ့ကြောင်း သိရသည်။

ယင်းကဲ့သို့ TNLA နှင့် စစ်ကောင်စီကြား တိုက်ပွဲပြင်းထန်လာသောကြောင့် စယ်လန့်ကျေးရွာရှိ ဒေသခံများသည် လေကြောင်းတိုက်ခိုက်မှု ကာကွယ်ရန်အတွက် ကတုတ်ကျင်း တူးထားရကြောင်းလည်း သိရှိရသည်။

စစ်ကောင်စီဘက်မှ လေကြောင်းလိုင်းဖြင့် ယမန်နေ့ မူဆယ်မြို့နယ်အတွင်း ဗုံးကြဲ တိုက်ခိုက်ခြင်း နှင့် ပတ်သက်ပြီး TNLA တပ်စခန်း၏ အဆောက်အဦးတချို့ ထိခိုက်ပျက်စီးခဲ့ပြီး ထိခိုက်သေဆုံးမှု တစ်စုံတစ်ရာမရှိကြောင်း ယနေ့ စက်တင်ဘာ (၂၆) ရက်တွင် PSLF/TNLA ၏ ပြန်ကြားရေး နှင့် သတင်းဌာန လူမှုကွန်ရက် စာမျက်နှာမှ ထုတ်ပြန်ထားသည်။

TNLA တပ်၏ မှတ်တမ်းများအရ စစ်ကောင်စီတပ် နှင့် TNLA တပ်ကြား ဇူလိုင်လ (၂၃) ရက်မှ စက်တင်ဘာလ (၂၂) ရက်နေ့အထိ နှစ်ဖက်တပ်ဖွဲ့၏ ထိတွေ့တိုက်ပွဲ စုစုပေါင်း (၅၅) ကြိမ် ဖြစ်ပွားခဲ့ကြောင်းလည်း PSLF/TNLA က ထုတ်ပြန်ထားသည်။